ʻOku Muimui Mai e Ngaahi Tāpuakí ʻi he Talangofuá

Te Kuangi Ko, Taiuani

Hili ʻeku fakatotolo ki he Siasí ʻi ha māhina ʻe ua, naʻe akoʻi kiate au ʻe he ongo faifekaú ʻa e fono ʻo e vahehongofulú pea fakaafeʻi au ke u totongi vahehongofulu hili ʻeku kau ki he Siasí. Ne hangē ka ʻikai lavá koeʻuhí ko e siʻisiʻi ʻeku paʻanga hū maí, pea ngata ʻemau pōtalanoá kuo teʻeki ke u lava ʻo vahevahe ange ʻa e ongo ne u maʻú.

Naʻe fakafeʻiloaki mai e palesiteni fakakoló kiate au he lotú he Sāpate ko iá. Ne u fehuʻi ange fekauʻaki mo e vahehongofulú, peá ne palōmesi mai te ma toki talanoa toko ua hili e lotú.

ʻI heʻema talanoá ne u fakamatalaʻi ange, “Naʻe talamai ʻe he ongo faifekaú ʻoku fie maʻu ke u totongi e vahehongofulu ʻe taha ʻo ʻeku paʻanga hū maí ki he Siasí he taimi te u kau ai ki he Siasí. ʻOku ʻikai te u ʻilo pe ʻe lava ke u fai ʻeni.”

Hili e fakafanongo ʻa e palesitení ki he meʻa ne u tokanga ki aí, naʻá ne fakaava hake e Tohi ʻa Molomoná ki he3 Nīfai 24:10, peá ne lau, “Mou ʻomi ʻa e ngaahi vahehongofulu kotoa pē ki he fale tukuʻanga koloá … pea ʻahiʻahiʻi au ʻi he meʻá ni, ʻoku folofola ʻe he ʻEiki ʻo e Ngaahi Kau Taú, pe te u fakaava kiate kimoutolu ʻa e ngaahi matapā ʻo e langí, mo lilingi hifo kiate kimoutolu ha tāpuaki ʻe ʻikai ha potu ʻe faʻa hao ia ki ai.” Hili iá, naʻá ne pehē mai, “ ʻE Misa Ko, vakai fakalelei ki he konga ko ia ʻoku folofola ai ʻa e ʻEikí ʻo pehē, ʻ ʻAhiʻahiʻi au ʻi he meʻá ni.’ Ko ʻEne fakaafe ia kiate koe. ʻAhiʻahi Ia ʻaki hoʻo totongi vahehongofulu he māhina kahaʻú peá ke sio angé pe he ʻikai ke Ne tāpuakiʻi koe.”

Taimi nounou mei ai ne u kamata ʻahiʻahiʻi e vahehongofulú peá u kau ki he Siasí. Talu mei he taimi ko iá mo ʻeku fakatupulaki ha fakakaukau foʻou fekauʻaki mo hono fakaʻaongaʻi totonu ʻo e paʻangá. Ko e meʻa lahi tahá ʻeku ʻiloʻi ʻiate au pē kuo lilingi hifo ʻe he ʻOtuá ha tāpuaki, pea ʻikai ha feituʻu ʻe faʻa hao ia ki ai. Kuó u ako ʻo ʻiloʻi kuo pau ke tau tauhi e ngaahi fekau ʻa e ʻOtuá ki muʻa pea tau toki ʻamanaki atu ke maʻu ʻEne ngaahi tāpuakí.