Seminelí pe Sipotí
Naʻe ʻikai ke u kei ongoʻi ʻe au ʻoku ʻi ai ha potupotutatau. Naʻe ʻikai ke u kei lava ʻo fokotuʻutuʻu hoku taimi ki he lotú, ngaahi meʻa fakaakó mo e sipotí.
ʻI heʻeku kamata he akoʻanga māʻolungá, naʻá ku kau ʻi he timi ʻatelita hoku ʻapiakó. Naʻá ku manako ʻaupito he lelé—talu ʻeku taʻu hiva mo ʻeku lele—pea naʻá ku ngāue mālohi ki ai. Naʻá ku ʻalu ki he fakamālohisino he taimi efiafí ʻo ʻikai siʻi hifo he tuʻo tolu he uike. Ne u maʻu foki mo e ngaahi faingamālie ke fakafofonga hoku koló ʻi he ngaahi feʻauhi fakapuleʻanga ʻi Kositā Liká.
Naʻe faʻa fai pē ʻa e fakamālohisinó ʻo aʻu ki he fuoloa e poʻulí. Naʻe toe faingataʻa ange ai ʻa e ʻā hengihengi hake ki he seminelí, ʻa ia naʻe kamata he 5 pongipongí, ka ne hokohoko atu pē ʻeku feilaulaú.
Ka ʻi he vaeua pē ʻeku ʻi he akoʻanga māʻolungá, ʻi he hoko hoku taʻu 16, ne u ʻiloʻi naʻe ʻikai te u loto ʻaki e seminelí. Naʻá ku ʻalu ki ai, ka naʻe ʻikai ke u mālōlō lelei, mateuteu, pe tokanga ʻo hangē ko ia naʻe mei malava ke u faí. Ne u ʻiloʻi foki naʻe hanga ʻe heʻeku helaʻia he ʻā fuoloá mo e ʻā hengihengi haké ʻo uesia ʻeku tafaʻaki fakatuʻasinó, pea naʻe ʻikai ke lelei ʻeni ki heʻeku timí.
Neongo naʻá ku longomoʻui maʻu pē ʻi he kau ki he ngaahi ʻekitivitī lahi pea lava pē ke u fokotuʻutuʻu hoku taimí he taimi ko iá ki he Siasí, ngaahi meʻa fakaakó, mo e sipotí, ka naʻe ʻikai ke u kei ongoʻi ʻe au naʻe ʻi ai ha potupotutatau. Naʻe kamata ke u fifili pe naʻe fie maʻu mai ke u tukuange ha meʻa. Ko ha ʻekitivitī fakatupulaki mo fakatupu moʻui lelei e lelé, pea naʻá ku sai ai. Ko ha faingamālie ia kiate au ke fakaʻaongaʻi hoku ngaahi talēnití mo fokotuʻu ha ngaahi sīpinga ʻo ʻete mapuleʻi kitá. Pea ko e lāngilangi foki ke te hoko ko ha taha ʻatelita ʻi hoku ʻapiakó. Naʻe ʻi ai hoku ngaahi kaungāmeʻa lelei ʻi heʻeku timí, pea kau ka mavahe mei ai, te u ongoʻi lahi ʻa e ngaahi feohi ko iá.
ʻI he tafaʻaki ʻe tahá, naʻe ʻi ai ʻeku taumuʻa ke u ʻosi mei he seminelí, pea naʻá ku ʻiloʻi kapau te u kei kau pē he timí, he ʻikai te u lava ʻo ʻosi.
ʻI heʻeku fua tautau ʻeku filí, naʻá ku fakakaukau pe ko e hā e meʻa ʻe lelei taha ki he tapa kotoa ʻo ʻeku moʻuí, ʻi he ngaahi taʻu ʻoku ou ʻi he akoʻanga māʻolungá aí pea mo e toenga ʻo ʻeku moʻuí. Naʻá ku fakakaukau ki heʻeku ngaahi taumuʻa taimi lōloá. Naʻá ku ʻiloʻi ʻe ʻi ai e kaunga ʻeku tōʻonga he seminelí ki hono toenga ʻo ʻeku moʻuí—ki ʻitāniti. Naʻá ku ʻiloʻi leva e meʻa naʻe fie maʻu ke u faí.
ʻI he fakaʻosinga ʻo hoku taʻu ua ʻi he akoʻanga māʻolungá, ne u talaange ki heʻeku faiakó mo kinautolu ʻi heʻeku timí he ʻikai te u toe kau atu ki he timí. Naʻa nau ʻohovale. Naʻe ʻikai mahino ki ha taha hono ʻuhinga ʻeku tukuange ʻa e lelé ʻa ia ne u fuʻu manako aí—ʻa ia ko ha meʻa ne u fai ʻi he meimei vahe ua ʻe taha ʻo ʻeku moʻuí—koeʻuhí “kau ʻalu ki he lotú he 5 pongipongí.” Naʻá ku fakamatalaʻi ange ko hoku fatongia mo e meʻa ke u fakamuʻomuʻa pea ʻi heʻeku fili ko ia e ngaahi meʻa totonu ko ʻení, te u hoko ai ko ha tokotaha fiefia ange. Meʻamālie, neongo naʻe ʻikai mahino kiate kinautolu ʻeku filí, ka naʻe fakaʻapaʻapaʻi ia ʻe he tokolahi hoku toʻú.
Lolotonga e taʻu ʻe ua hono hoko ʻi he akó, ne u maʻu ai ha taimi lahi ange ke lau e folofolá pea fakalaulauloto ki ai. Pea tupu ʻi he ʻikai ke u fuʻu fakavavevave he taimi kotoá, ne lahi ange ʻeku faʻa maʻu e ueʻi ʻa e laumālié. Naʻe ʻomi ʻe he ngaahi meʻa ko iá ʻa e potupotutatau, melino, mo e fiefia ne teʻeki ke u aʻusia ki muʻa.
Ne u ʻosi mei he seminelí ʻi he fakaʻosinga ʻo e akoʻanga māʻolungá. Naʻe mahuʻinga ʻaupito kiate au ʻa e lavameʻa ko iá. Ne u manako ki he folofolá mo e ngaahi talanoa mo e lēsoni ʻi aí, ne u ako ke u mapuleʻi au ʻi heʻeku tuʻu hengihengia haké, pea ne tāpuekina au ʻaki ha ngaahi feohi fakakaumeʻa lelei ʻa ia ne fakamālohia ʻe heʻemau fakataha ʻi he taimi hengihengi ʻo e pongipongí ʻi he ʻaho takitaha. Kae mahuʻinga tahá, ne u ako ʻi he seminelí ke u fakapapauʻi ʻoku ou fakamuʻomuʻa maʻu pē ʻa e ʻEikí.
ʻOku hokohoko atu hono faitāpuekina ʻeku moʻuí ʻe he sīpinga ko iá lolotonga ʻeku ako ʻi he ʻunivēsití he taimi ní. ʻOku faingataʻa ange ʻeku ngaahi kalasí ʻi he ngaahi kalasi he akoʻanga māʻolungá. ʻOku lahi ange hoku ngaahi fatongia ʻi he Siasí. Pea tupu mei heʻeku ʻulungāanga ʻaki hono fakamuʻomuʻa ʻo e ʻEikí, naʻe faingofua ke u kei hokohoko atu ʻi hono fokotuʻutuʻu e ngaahi meʻa ke fakamuʻomuʻá, pea ʻoku ou ʻamanaki pē te u lava ʻo hokohoko atu ʻa e sīpinga ko iá ʻi he toenga ʻo ʻeku moʻuí.
Tā fakatātaaʻi ʻe Scott Greer