Mavahe mei he Pātí!
Sanilisa ʻOlesi Hasolopaaki, Kalefōnia, ʻAmelika
Ne u maʻu ha faingamālie ʻi he ngaahi taʻu kuo hilí ke u fakafofongaʻi e siteiti ʻo ʻIutaá ʻi he fakataha fakamāmani lahi ʻi ʻOhaiō maʻanautolu e kau kakau mei he ngaahi ʻapiako māʻolungá.
Naʻe kau ai ha ngaahi paati maʻá e kau sipotí. ʻI he fuofua pō ne u ʻalu ai ki ha paati ʻe taha, ne u fakakaukau ʻe hangē pē ko e ngaahi paati fakafiefia naʻa mau fai ʻi ʻapí—ʻo e inu lēmani mo e fanga kiʻi vaʻingá. Ka ne u fuʻu ʻohovale ʻi he taimi pē ko ia ne u hū ai ki he lokí, ne mahino kiate au ʻa e moʻoni ʻo e ngaahi meʻa ʻoku hokó.
Ne mahino kiate au he taimi pē ko iá e meʻa naʻe fakamatala ki ai e ngaahi makasini ʻa e Siasí ʻo pehē, “ Te ke hā makehe ʻi he taimi ko ia ko koe tokotaha pē ʻoku kau ki he Siasí.” Naʻe ʻosi ʻiloʻi ʻe hoku ngaahi kaungā sipotí ko e tokotaha Siasi au. Naʻe fakalongolongo e lokí, pea hangē naʻe siofi au ʻe he tokotaha kotoa pē heʻeku ala ʻo kai mei he poulu pinatí.
Naʻe pehē mai ha tokotaha, “ ʻEi, ko e Māmonga koe ē?”
Naʻá ku malimali ʻi he loto fiefia peá u pehē ange, “ ʻIo, pea ʻoku ou fiefia heʻeku hoko ko e Māmongá.”
Ne hoko atu e pātí, ka ne u ongoʻi ʻoku siofi ʻe he tokolahi e meʻa kotoa pē naʻá ku faí. Ne kiʻi fuoloa siʻi pē kuo kamata ke fakalalahi e longoaʻa ʻa e pātí. Naʻe ʻikai ke u fakapapauʻi pe koe hā e tuʻunga ʻe aʻu ki aí, ka ne ʻikai te u toe fie nofo ai. Ne u manavasiʻi kapau te u nofo, ʻe ʻi ai haʻanau fakakaukau hala fekauʻaki mo ʻeku ngaahi tuʻunga moʻuí. Ko e tahá, naʻe ueʻi au ʻe he Laumālié ke u mavahe mei ai. ʻI heʻeku toʻo ʻeku kato ne ʻi ai ʻeku ʻū meʻa kakaú ʻo u lue atu ki he matapaá, ne kaila ange ha taha ʻo e fānau tangatá, “ ʻEi, ʻokú ke hola meiate kimautolu?”
Ne u malimali pē mo pehē ange, “Tau toki fetaulaki ʻapongipongi.” Ne u hū leva ki tuʻa mo ongoʻi lelei naʻe fakatokangaʻi au lolotonga ʻeku taukaveʻi e ngaahi tuʻunga moʻui ʻa e ʻEikí.
ʻI he ʻaho hono hokó lolotonga ha fakataha ʻa e kau fakafofongá, naʻe tuʻu hake ha taha ʻo fai ha lea fefeka, “Naʻe ʻi ai e meʻa naʻe hoko ʻanepō pea ʻoku ʻikai ke u loto ke toe hoko ia. ʻOku mou ʻi hení ke fakafofongaʻi homou siteití, ko ia mou fai ia ke lelei pea ʻai ke taau homou ʻulungāangá!”
Peá ne toe pehē mai, “Naʻe mavahe hamou niʻihi mei ai ʻo ʻikai te mou kau he meʻa naʻe hokó. Mālō.”
ʻI he toenga ʻo e uiké, ne lahi ange hono fakaʻapaʻapaʻi aú mo e ngaahi mata anga fakakaumeʻá ʻi ha toe taimi ʻi muʻa. Naʻe fakaʻaiʻai au ʻe ha kau faiako kakau tokolahi mei he ngaahi feituʻu ʻo e ʻIunaiteti Siteití ke u hū ʻo fakafofongaʻi e ngaahi siteiti faka-hihifó he ne u fakafofongaʻi lelei ʻa ʻIutā.
Naʻe ʻikai pē ke u ʻilo e meʻa ne hoko he pātí, ka ʻoku ou fakamālō naʻe ueʻi au ʻe he Laumālié ke u mavahe mei ai.
ʻI heʻeku toʻo ʻeku kato āfeí ʻo lue ki he matapaá, naʻe kaila mai ha taha ʻo e fānau tangatá, “ ʻEi, ʻokú ke hola meiate kimautolu?”