Ko e Meʻa ʻOku Tau Tui Ki Aí

Moʻui Taau ke Hū he Temipalé

Ko e moʻoni ko e ngaahi temipalé ko e ngaahi fale ia ʻo e ʻEikí. ʻOku tau fakahoko ʻi he temipalé ha ngaahi fuakava toputapu, pe ngaahi palōmesi, mo e ʻOtuá ʻa ia ʻoku fie maʻu ke tau fakataha ai mo Ia ʻi he tuʻunga māʻolunga taha ʻo e nāunau fakalangí (vakai, T&F 131:1–4). ʻOku iku ʻa e ngaahi fuakava fakatemipale ko ʻení ki he ngaahi tāpuaki maʻongoʻonga taha ʻoku lava ke maʻu ʻo fakafou ʻia Sīsū Kalaisí.

ʻOku ʻikai ʻamanaki mai ia ke tau haohaoa ka tau toki hū ki he temipalé. Ka ko e taumuʻa ʻo e ngaahi meʻa ʻoku tau akó mo e ngaahi fuakava ʻoku tau fai ʻi he temipalé ke tokoni ke fakahaohaoaʻi kitautolu. Ka kuo pau ke tau moʻui taau ke hū ki ai.

ʻOku fakamahino ʻe he lekomeni temipalé kuo tau moʻui taau ʻi ha ʻinitaviu mo ha mēmipa ʻo ʻetau kau pīsopelikí pe palesiteni fakakoló pea mo ha ʻinitaviu foki mo ha mēmipa ʻo ʻetau kau palesitenisī fakasiteikí pe fakamisioná. Ko e ngaahi ʻinitaviu lekomeni temipalé ko ha ngaahi faingamālie ia maʻatautolu ke tau vakavakaiʻi ai ʻa ʻetau tuʻunga moʻui tāú. ʻI he ʻinitaviu takitaha, ʻe fehuʻi mai ai ʻetau kau taki lakanga fakataulaʻeikí ʻo fekauʻaki mo hotau ʻulungāanga fakatāutahá mo ʻetau tuí. ʻOku tauhi ʻe heʻetau kau taki lakanga fakataulaʻeikí ke malu ʻa e ngaahi ʻinitaviu ko ʻení pea ʻoku ʻikai toe fakahāhāholo.

Kapau ʻe ʻilo ʻe heʻetau kau taki lakanga fakataulaʻeikí ʻoku tau taau ke hū he temipalé, te tau maʻu ha lekomeni temipale. ʻOku tau fakamoʻoni hingoa ʻi heʻetau lekomení ke fakamoʻoniʻi ʻa ʻetau taau ke hū he temipalé. ʻOku fakamoʻoni foki mo ʻetau kau taki lakanga fakataulaʻeikí ʻi heʻetau lekomení ko ha ngaahi fakamoʻoni makehe pē ki heʻetau moʻui tāú. ʻOku fakangofua kitautolu ʻe he lekomeni ko ʻení ke tau hū he temipalé ʻi he taʻu ʻe ua ka hokó, ʻo kapau te tau kei moʻui taau ai pē.

Kuo fokotuʻu ʻe he Kau Palesitenisī ʻUluakí e ngaahi fehuʻi ko ia ʻoku fai ʻi he ʻinitaviu lekomeni temipalé. ʻOku fai ʻa e ngaahi fehuʻi tatau ki he tokotaha kotoa pē.

Ko ha niʻihi ʻeni ʻo e ngaahi tefito ʻe fehuʻi atu ʻe hoʻo kau taki lakanga fakataulaʻeikí:

1. Ko hoʻo fakamoʻoni ki he Tamai Hēvaní, Sīsū Kalaisi, mo e Laumālie Māʻoniʻoní.

2. Pe ʻokú ke poupouʻi e Palesiteni ʻo e Siasí.

3. Pe ʻokú ke tauhi e fono ʻo e angamaʻá, totongi vahehongofulu, faitotonu ki he niʻihi kehé, pea tauhi e Lea ʻo e Potó.

4. Pe ʻokú ke feinga ke ke maʻulotu, tauhi e ngaahi fuakava kuó ke fakahokó, pea tauhi hoʻo moʻuí ke fenāpasi mo e ngaahi fekau ʻo e ongoongoleleí.

Vakai, Ngaahi Tefitoʻi Moʻoni ʻo e Ongoongoleleí (2009), 222–23; mo e Tuʻu Maʻu ʻi he Tuí (2004), “Ngaahi Temipalé,” 141–46.

Kuo fokotuʻu ʻe he ʻEikí ʻa e ngaahi tuʻunga moʻui taau ke hū ki he temipalé, ʻo hangē ko e lea ʻa e tangata faʻu Sāmé:

“Ko hai ʻe ʻalu hake ki he moʻunga ʻo [e ʻEikí]? pe ko hai ʻe tuʻu ʻi hono potu māʻoniʻoní?

“Ko ia ʻoku nima maʻa, mo loto māʻoniʻoní” (Saame 24:3–4).

Tā ʻo e Temipale Paunitifulu ʻIutaá naʻe faitāʻi ʻe Steve Tregeagle; ʻū faitā ʻa Christina Smith, John Luke, Steve Bunderson, mo Matthew Reier; tā ʻo e faiʻanga papitaiso ʻo e Temipale Vēnolo ʻIutaá naʻe faitāʻi ʻe Tamra Hamblin

• Ko Hoʻo Lekomeni Temipalé