Feʻaongaʻaki
ʻI hono palani mo fakahoko ʻe he kau takí mo e toʻu tupú ʻa e ngaahi ʻekitivitií, te nau lava ʻo tokoni ke fakatupu ha ngaahi manatu—mo ha ngaahi fakamoʻoni—e nofoʻia kinautolu ʻo taʻengatá.
Mahalo ko e fehuʻi “Ko e hā ʻetau meʻa ʻe fai he uike ni?” ko ha fehuʻi ia ʻoku faʻa fanongo ki ai e kau takí—pea mahalo ʻoku ʻikai ke nau fie fanongo ki ai—ʻi heʻetau feinga ko ia ke tokoniʻi e toʻu tupú ʻi hono palani mo fakahoko ha ngaahi ʻekitivitī ʻa e Mutualé ʻe ʻaongá. Pea lolotonga ʻoku tau faʻa ʻiloʻi pē ʻa e tali ki he fehuʻi ko iá, ʻoku ʻi ai mo e fehuʻi faingataʻa ange ia, “Ko e hā e meʻa ʻoku tau lavaʻi ʻi hono fakahoko ʻo e meʻa ʻoku tau fai he uike ní?”
ʻI ha lea ʻa Palesiteni Tōmasi S. Monisoni kimuí ni mai ki he kau taki ʻo e toʻu tupú, naʻá ne faleʻi ʻo pehē “ko e tefitoʻi fatongia ʻo hono tokoniʻi ʻo e toʻu tupú ke nau fili ʻa e totonú ʻi heʻenau fehangahangai mo ha filí, ko ha tefitoʻi lao ia he ʻahó ni ʻo hangē pē ko ia ʻi he kamataʻangá.”
Naʻá ne pehē, “ ʻOange kiate kinautolu ha ngaahi meʻa ke nau manatu ki ai pea ʻe nofoʻia kinautolu ʻo taʻengatá pea ʻe ui ʻe he ʻEikí ʻa ho hingoá ko e monūʻia.” Naʻá ne toutou lea ʻaki, ʻo hangē ko ia ʻokú ne faʻa faí, ʻo pehē, ʻoku ueʻi fakalaumālie ʻe he ʻEikí ʻa kinautolu ʻokú Ne uí.1
Naʻe fakaafeʻi ʻe he Liahoná ha kau taki ʻe niʻihi ʻo e Siasí ke nau fakamanatuʻi ha houalotu Mutuale pe ʻekitivitī kehe pē ʻa e toʻu tupú naʻe makehe pea ke nau vahevahe ʻa e meʻa naʻa nau lavaʻi aí. Mahalo ʻe fakafiemālie ki he kau taki ʻo e ʻaho ní ʻa e ngaahi meʻa peheni ʻoku nau aʻusiá, ʻi heʻenau ʻiloʻi ʻoku tokoni ʻenau ngaahi ngāue mateakí ke fakatupu ha ngaahi manatu ʻoku mahuʻinga—mo ha ngaahi fakamoʻoni taʻengata.
Ngaahi faitā ʻa Christina Smith mo Craig Dimond
Tā valivali ʻo Sisitā Dalton © Busath.com