Kae ʻOua ke Tau Toe Feʻiloaki
Nonoʻo Fakapona pea Pikitai Ai
Ne u tupu hake ʻi ha kiʻi kolo ʻi Kānata. ʻI hoku taʻu 13, naʻe mole ʻa e ngāue ʻa ʻeku tamaí pea hiki homau fāmilí ki ʻEtimonitoni ke maʻu haʻamau moʻui. Hili pē ha ngaahi māhina siʻi ʻemau hiki ki he koló, naʻe kē lahi ʻeku faʻeé mo ʻeku tamaí ʻo iku ki he tokoto falemahaki ʻeku faʻeé ʻi ha māhina ʻe ono. Naʻe ʻosi atu ha vahaʻataimi peá ne tali ke toe foki ange ʻeku tamaí ki homau ʻapí. Naʻá ku loto mamahi ʻaupito ai, peá u ʻalu ʻo inu kava mālohi mo ngāue ʻaki e faitoʻo kona tapú ke fakafiemālieʻi ʻa e ʻita naʻe ʻalu hake ʻi hoku lotó.
Ko e taimi ʻeni naʻá ku felōngoaki ai mo e ongo faifekaú. ʻI heʻeku feʻiloaki mo e ngaahi fāmili ʻi he uooti ʻi homau koló, naʻá ku fakaʻofoʻofaʻia ʻi he fefakaʻapaʻapaʻaki ʻa e ngaahi hoa malí pea mo e ʻofa naʻe fakahā ʻe he mātuʻá ki heʻenau fānaú. Naʻe papitaiso au ʻi hoku taʻu 16.
Naʻe hā ʻi he fuofua taʻu ʻo ʻeku kau ki he Siasí ʻe fie maʻu ke u kātakiʻi ha ngaahi meʻa fakamamahi. Kuó u mavahe mei he ngaahi kaungāmeʻa pea mo e sīpinga moʻui naʻe hoko ko hoku hūfangaʻanga mei he vātau ʻi hoku ʻapí. Meʻapango naʻe hangē ʻoku ʻikai ʻomi ʻe hoku uōtí ʻa e fakafiemālie mo e fakakaungāmeʻa foʻoú ke tokoni. Naʻe ʻikai te u ongoʻi ʻoku talitali lelei au peá u fakakaukau ke u toe foki pē ki heʻeku tōʻonga moʻui motuʻá ka naʻe fakatukupaaʻi au ʻe ha faifekau ke u tauhi moʻoni ki heʻeku ngaahi fuakava ʻi he papitaisó. Naʻá ku toe fai ha tukupā neongo naʻe ʻikai ko hoku lotó ia, peá u ongoʻi ʻo hangē naʻá ku piki ki ha maea naʻe kamata ke homo mei hoku nimá.
Naʻe ʻikai fuoloa kuo uiuiʻi au ke u hoko ko e palesiteni ʻo e kalasi Loumailé. Naʻá ku ongoʻi taʻefeʻunga ʻaupito; naʻe tokolahi e kau Loumaile ia he uōtí naʻa nau feʻunga angé. ʻI he taimi ne fanongonongo mai ai hoku uiuiʻí, naʻe fakahā ʻe ha taha ʻo e fānau fefine he uōtí ʻa ʻene taʻefiemālie ki aí. Naʻá ne pehē, “ ʻOku lava fēfē ke nau uiuiʻi koe? ʻOku siʻi ʻaupito hoʻo maʻulotú. Ko e hā e meʻa ʻokú ke ʻiloʻí?”
Ko ʻene moʻoni; naʻe ʻikai ke u ʻilo ha meʻa. Ne u ongoʻi fakapapau ʻe hoko hoku uiuiʻí ko ha meʻa ke māmālohi pē ai ha tokolahi ʻo e kau Loumailé—kau ai pē mo au. Naʻe faingataʻa ʻaupito ke tali e tuʻunga ko ʻeni naʻe ʻi aí. Ne u ʻosi meimei fakafisi pē au.
ʻI heʻeku fakataha mo Mālini ʻĒveni, ko e ʻetivaisa ki heʻeku kalasí, naʻá ku talaange kuo ʻi ai e fuʻu fehālaaki kuo fai ʻe ha tokotaha. Ka naʻá ne fakapapauʻi mai naʻe ʻi ai e ʻuhinga naʻe uiuiʻi ai aú. Naʻe kamata ke ne ngāue taʻemālōlō mo au, peá u ʻalu maʻu pē ki hono ʻapí ke ako hoku ngaahi fatongiá. Naʻá ne fakalotolahiʻi au peá u lava ʻo tataki ʻa e fakatahaʻangá ʻo ʻikai toe manavahē.
Ne tuʻo taha hono ʻomai kiate au ʻe Sisitā ʻĒveni ha kiʻi kaati naʻe fakalea peheni, “Ko hoʻo aʻu pē ki he ngataʻanga hoʻo maeá, hanga ʻo nonoʻo fakapona pea pikitai ai.” Naʻá ne talamai ʻoku fakafofongaʻi ʻe he maeá ʻa e moʻuí, pea ko e ʻikai pē ke tau fai ʻa e ngaahi ngāue ʻoku māʻoniʻoní, ko ʻetau tuku ia ke homo e maeá mei hotau nimá. Naʻe fakafofongaʻi ʻe he nonoʻo fakaponá ʻa e fili ke pikitai ki he ongoongoleleí mo e tuʻunga malu ʻokú ne ʻomaí.
Naʻá ku manatuʻi ʻa e lēsoni ko iá ʻi he ngaahi māhina hoko maí. Naʻá ku ako taimi kakato ʻi he akoʻanga māʻolungá mo toʻo kalasi feʻaveaki. Naʻá ku ngāue he efiafí mo e ngaahi ʻaho Tokonakí. Naʻá ku totongi ʻeku akó, nāunau akó, valá, mo e loki ne u nofo totongi aí. Naʻe lahi e taimi ne u ongoʻi loto foʻi aí. Ko ha taʻahine ivi lahi nai au ke fai tokotaha pē ʻa e ngaahi meʻa ko ʻení? ʻIkai, ka naʻá ku nonoʻo ha fakapona peá u pikitai ai.
ʻI he ʻahó ni, kuó u ʻosi mei he ʻunivēsití, peá u ngāue mo e ngaahi fāmilí. Naʻá ku mali he temipalé pea ʻoku toko fā ʻeku fānaú. Kuo nau ʻosi hū he temipalé mo ngāue fakafaifekau. Pea kuó u ngāue ʻi he ngaahi tuʻunga fakatakimuʻa ʻi he houalotu ʻa e Kau Finemuí. Ko e taimi kotoa pē ʻoku ou maʻu ai e ngaahi fatongiá ni, ʻoku ou toʻo ʻa e faingamālie kotoa pē ʻoku ou maʻú ke vahevahe mo e toʻu tupú ʻa e pōpoaki ʻa Sisitā ʻĒvení. Naʻe liliu ʻe heʻene tokangá mo ʻene pōpoakí ʻa ʻeku moʻuí.
Naʻe ʻikai te u mei maʻu ʻa e ngaahi tāpuaki lahi ʻoku ou fiefia ai he ʻaho ní kapau naʻe ʻikai te u ako ke nonoʻo ha fakapona pea pikitai ki ai.
Faitaaʻi ʻe John Luke