Ko ha Fakamoʻoni Naʻe Maʻu ʻi he Hopo ʻa e Laʻaá
Ne u tupu hake ko ha mēmipa ʻo e Siasí. Naʻe akoʻi kiate au ʻe heʻeku ongomātuʻá ʻa e ngaahi tefitoʻi moʻoni ʻo e ongoongoleleí pea naʻe papitaiso, hilifakinima mo foaki kiate au ʻa e lakanga fakataulaʻeikí ʻe heʻeku tamai moʻui tāú. Ne u ongoʻi e mālohi ʻo e Laumālié ʻi heʻeku moʻuí, ka ne u toki maʻu pē ha fakamoʻoni ki hono moʻoni ʻo e Fakaleleí ʻi ha faʻahitaʻu Pekia ʻe taha ʻi hoku taʻu hongofulu tupú.
Naʻe fakataha mai ha fānau semineli ʻe laungeau ki ha fakataha fakamoʻoni ki muʻa pea mafoa e atá. ʻOku ou pehē ne u fai ʻeku fakamoʻoní he pongipongi ko ʻení, ka ʻoku ʻikai ke u fakapapauʻi ia. Ko e meʻa ʻoku ou ʻiloʻí naʻe ueʻi hoku lotó ʻe he Laumālié lolotonga e fakatahá ʻi he hopo hake ʻa e laʻaá ʻi ha faʻahitaʻu Toetuʻu foʻoú, ʻo ne fakamoʻoni ki hono moʻoni ʻo Sīsū Kalaisi, ʻEne moʻuí, ʻEne ngaahi akonakí, ʻEne Fakaleleí, mo ʻEne Toetuʻú. Kuo tuʻo lahi ʻeku ongoʻi hono fakapapauʻi mai ʻo e fakamoʻoni ko iá lolotonga e taʻu ʻe 30 tupu kuó u fakamoʻoniʻi ai ʻa Sīsū Kalaisi heʻeku hoko ko ha faifekau, tamai, kaungāmeʻa mo e taki ʻi he Siasí. Ka ko e meʻa naʻá ne pukepuke aú ko e fakamoʻoni ko ia ne u maʻu mei he Laumālié he pongopongi Toetuʻu ko iá.