Ko Hono ʻAi ke Taha Hotau Lotó
Mei ha lea ʻi he konifelenisi lahi ʻo ʻOkatopa 2008
Kuo lea maʻu pē e kau palōfita ʻa e ʻEikí ke ʻi ai ʻa e uouangatahá.
Naʻe fakaafeʻi au ke u tūʻulutui hifo mo ha fāmili ʻi he taimi mohé ʻi ha taimi ne u nofo ai mo kinautolu. Naʻe kole ki he tamasiʻi siʻisiʻi tahá ke ne fai e lotú. Naʻá ne lotua e tokotaha kotoa pē ʻi he fāmilí, ʻo ne lea ʻaki honau ngaahi hingoá. Ne u kiʻi ʻāʻā hake ke u sio ki he mata ʻo e toenga ʻo e fānaú mo e ongomātuʻá. Naʻe lava pē ke u tala naʻa nau fakatahaʻi ʻenau tuí mo honau lotó ki he lotu ʻa e kiʻi tamasiʻi ko iá.
ʻOku foaki kiate kitautolu ʻa e mana ʻo e uouangatahá ʻi heʻetau lotua mo ngāueʻi iá. ʻE taha hotau lotó ʻi he uouangataha.
ʻOku tau lau ʻi he tohi Mōsaiá ʻa ia ʻoku pehē: “Pea naʻá ne fekau kiate kinautolu ke ʻoua naʻa ʻi ai ha fakakikihi ʻiate kinautolu ka ʻoku totonu ke nau sio ki muʻa ʻi he loto pē taha, ʻo maʻu ʻa e tui pē taha mo e papitaiso pē taha, pea ke taha honau lotó ʻi he uouangataha mo e feʻofoʻofani” (Mōsaia 18:21).
ʻOku lahi ange e meʻa ʻoku faitatau ai e fānau ʻa e ʻOtuá ʻi honau ngaahi faikehekehé. Felealeleiʻaki. Mahalo pē te ke manatuʻi ha lea atu hoʻo faʻeé—naʻe lea pehē mai mo ʻeku faʻeé—“Kapau ʻoku ʻikai ke ʻi ai ha lea lelei ke ke fai kau ki ha taha pea ʻoua pē naʻá ke lea.” ʻOku ou palōmesi atu te ke maʻu ha ongoʻi melino mo e fiefia ʻi hoʻo lea lelei ʻo kau ki he kakai kehé.
ʻOku ʻoatu ʻeku fakamoʻoni mamalu kiate kimoutolu ʻoku moʻui ʻa e ʻOtua ko e Tamaí. ʻOkú Ne fanongo mai mo tali ʻetau ngaahi lotú. ʻOku moʻui ʻa e Fakamoʻui ko Sīsū Kalaisí pea ʻokú Ne ʻaloʻofa kiate kitautolu. Ko Hono Siasi moʻoní ʻeni. Ko Palesiteni Tōmasi S. Monisoní ko e palōfita ia ʻa e ʻOtuá. Kapau ʻoku tau uouangataha ʻo poupou kiate ia ʻaki hotau lotó kotoa, ʻi he loto fie talangofua, te tau laka fakataha atu ʻi he mālohi ki ha feituʻu pē ʻe finangalo ʻa e ʻOtuá ke tau ō ki ai pea tau hoko ko e kakai ʻokú Ne finangalo ki aí.
Faitaaʻi ʻe Matthew Reier; tā fakatātaaʻi ʻe Avalone