Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he pulusinga ko ʻení ha ngaahi fakamatala mo e ʻekitivitī ʻa ia ʻe lava ke fakaʻaongaʻi ʻi he efiafi fakafāmili ʻi ʻapí. Ko e niʻihi pē ʻeni ʻo ha ngaahi sīpinga.

“Moʻui Taau ke Hū he Temipalé,” peesi 12: Te mou lava ʻo aleaʻi ʻa e ngaahi tefito fekau’aki mo e lekomeni temipalé ʻi he fakamatalá, ke hoko ko ha konga ʻo e lēsoní. Fakaafeʻi ʻa e kau mēmipa ʻo e fāmilí ke nau fakalaulauloto ki he ngaahi tefitó lolotonga hoʻo lau kinautolú. Poupouʻi ʻa e tokotaha kotoa pē ke moʻui taau mo e ngaahi moihū ʻi he temipalé.

“Ko Hoʻo Kau ‘i he Misi ‘a Līhaí,” peesi 26: Toe fakamanatu ʻa e fakamatalá mo homou fāmilí. ʻI he konga fakaʻosí, ʻoku kole mai ai ʻe Palesiteni Poiti K. Peeka, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá ke tau toe lau ʻa e 1 Nīfai 8 mo ha ngaahi veesi kehe ʻi he Tohi ʻa Molomoná ʻoku nau akoʻi ʻa e palani ʻo e fakamoʻuí. Fakakaukau ke lau ʻa e ngaahi potufolofola ko ʻení mo fakakaukau ki he talaʻofa ne fai ʻe Palesiteni Pēká.

“Ne Tuku Ia ‘e he ʻEikí ʻi Hota Halá,” peesi 48: ʻI hoʻo lau ʻa e talanoa ko ʻení, fakaafeʻi homou fāmilí ke nau fakafanongo pea mo aleaʻi ʻa e ʻuhinga ne fakakaukau ai ʻa e tangata ʻi he kaá ke fanongo ki he ngaahi lēsoni ʻa e kau faifekaú. Palani ke fakatātaaʻi pe aleaʻi ha ngaahi founga ke fakahoko ʻo hangē ko ia ne mei fakahoko ʻe he Fakamoʻuí ʻi he ngaahi tūkungá takitaha.

“Ko ha Faiako Taʻu 10,” peesi 58: Hili hoʻo lau ange ʻa e talanoá, fakakaukau ke fakaafeʻi e kau mēmipa ʻo e fāmilí ke nau fakakaukauʻi ha ngaahi faingamālie ʻe lava ke nau hoko ai ko ha faiako mo e ngaahi tefito ʻo e ongoongoleleí te nau akoʻí. Koeʻuhí ke nau maʻu ha faingamālie ke nau ako faiako ai, ʻe lava ke ke fokotuʻu ha taimi-tēpile ʻe lava ai ʻa e mēmipa ʻo e fāmilí ke nau faiako ʻi he taimi efiafi fakafāmili ʻi ʻapí pe ʻi ha ngaahi toe tūkunga kehe.

Fakatupulaki ʻo e Fakamoʻoní—mo e Paʻanga Fakafaifekaú

Hili ʻemau fanongo ki hono fakalotolahiʻi ʻe he kau taki ʻo e Siasí ʻa e toʻu tupú ke nau fakahū ha paʻanga ki he ngāue fakafaifekau taimi kakató, ne mau fakahoko leva ha efiafi fakafāmili ʻi ʻapi makehe mo ʻema ongo kiʻi fānaú, ko ʻAlana (taʻu 10) mo ʻUluliki (taʻu 7). Ne mau aleaʻi ai hono mahuʻinga ke fakahū ha paʻanga ki he ngāue fakafaifekau taimi kakató, peá ma foaki ange kiate kinaua ha ongo kiʻi meʻa tānakiʻanga paʻanga ke tokoni ke na kamata tānaki ki ai.

Hili e efiafi ko iá, ne taʻe-ʻamanekina e lahi e paʻanga ne tānakí. ʻOku tānaki mo fakahū ʻe ʻUluliki ʻa e kiʻi sēniti kotoa pē ʻokú ne maʻú; ʻoku tānaki ʻe he ongo kiʻi tamaikí ni e paʻanga ʻokú na maʻu mei hona kāingá. ʻI ha māhina pē tolu, kuo tānaki ʻe ʻUluliki ha paʻanga feʻunga ke totongi e ʻuluaki māhina ʻo ʻene ʻi he ngāue fakafaifekaú, pea meimei aʻu hake pē ki ai mo ʻAlana. Naʻe toe fakapapauʻi foki ʻe he ongo kiʻi tamaikí ke na totongi vahehongofulu ʻi he paʻanga naʻá na maʻú, pea mātaʻia ʻe homau fāmilí ha ngaahi tāpuaki mālohi lahi pea tupulaki ʻena fakamoʻoni ki he ngāué pea mo e feilaulaú.

Luisi mo ʻOnutuleia Peleila, São Paulo, Palāsila

Ko e Efiafi Fakafāmili ʻi ʻApi ʻOku Mou Saiʻia Taha Aí

ʻOmai ha fakamatala ʻo hoʻomou efiafi fakafāmili ʻi ʻapi ʻoku mou saiʻia taha aí ki he [e-mail].