Ko Hono Tali ʻo e Fakaafé
Ko e taha ʻo e ngaahi ʻekitivitī fakangalongataʻa taha ne u kau ai ʻi heʻeku kei talavoú ko ha fuʻu fakaʻaliʻali hulohula. ʻOku ou ʻilo pau ne ʻikai te u mei kau au ki ha ʻekitivitī pehē kapau ko ha fili pē ʻaʻaku. Ka ʻi hono fakaʻaiʻai aú, ne u tali e fakaafe ke u kaú, neongo naʻe ʻikai te u fuʻu fiefia ke kau ki ai he kamataʻangá.
Naʻe lahi ʻemau ako hulohulá, pea naʻe tuai hono maʻú. ʻOku ou fakamālō ki ha kau faiako mateaki, ki ha hoa hulohula faʻa kātaki, pea ki heʻeku faʻeé, ʻa ia naʻá ne tuitui hoku teungá mo fakalotolahiʻi au ke fai hoku lelei tahá.
Naʻe fai e fakaʻaliʻali hulohulá ʻi ha malaʻe ʻakapulu. Ne teʻeki ai ke u kau ʻi ha faʻahinga polokalama lahi pehē. Naʻe fakafiefiaʻi ʻe he kulupu takitaha e kakaí ʻi haʻamau fakahoko ha ngaahi hulohula kuo ʻosi akoʻi pea tui mo ha ngaahi teunga lanu fakaʻofoʻofa. Hili ko iá ne fonu moʻoni e malaʻe ʻakapulú ʻi he kau hulohulá ʻi heʻemau fai fakataha ha foʻi hulohula ke tā tuku ʻaki. Naʻe hoko ia ko ha fakaʻaliʻali fakaʻofoʻofa moʻoni.
Naʻá ku fiefia ʻi he fakaʻaliʻali hulohulá ʻo lahi ange ia ʻi he meʻa ne u fakakaukau ki aí. Ne u lava ai ke vakai ki he Siasí ʻi ha founga kehe. Naʻá ku mamata ki he fiefia ʻa ha toʻu tupu tokolahi. Ne u fetaulaki ai mo ha ngaahi kaungāmeʻa foʻou, ne u fakatupulaki ha ngaahi poto foʻou, pea ne u fakahoko ha konga siʻi ʻo ha fuʻu polokalama lahi naʻá ne fakafiefiaʻi ha toko lauiafe.
Tupu mei heʻeku tali ʻa e fakaafe ke hulohula ʻi he fakaʻaliʻali ko iá—mo e ngaahi fakaafe kehe pē ne u maʻu ʻi he Siasí—kuo faitāpuekina ʻeku moʻuí, peá u maʻu ʻa e faingamālie ke faitāpuekina mo ha niʻihi kehe. Ne u ongoʻi monūʻia ke aʻusia ha ngaahi meʻa fakaʻofoʻofa lahi ʻi heʻeku hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.