យើងត្រូវតែទៅព្រះវិហារបរិសុទ្ធឥឡូវនេះ !
ម៉ារី ហូមស៍ អេវិន រដ្ឋកាលីហ្វ័រញ៉ា ស.រ.អា
រចនាដោយ ប្រេដលី អេជ ខ្លាក
នៅព្រឹកថ្ងៃអាទិត្យមួយ សមាជិកដែលទើបបានជ្រមុជទឹកម្នាក់ ត្រូវបានណែនាំឲ្យស្គាល់នៅក្នុងវួដ ។ ឈ្មោះរបស់គាត់គឺ លីឌៀ ។ គាត់បានយកឈ្នះលើដួងចិត្តយើងមួយរំពេច ។
លីឌៀ ជាស្ត្រីចំណាស់ ហើយពិការភ្នែក ពីការប្រយុទ្ធប្រឆាំងនឹងជំងឺទឹកនោមផ្អែមជាច្រើនឆ្នាំ ។ គាត់បានស្គាល់សមាជិកក្នុងវួដនេះយ៉ាងរហ័ស ដោយសម្លេង និងសម្រឹបជើងរបស់ពួកគេ ។ គាត់នឹងហៅឈ្មោះរបស់យើង និងចាប់អង្រួនដៃយើង ហើយយើងមិនដែលគិតថាគាត់ពិការភ្នែកនោះទេ ។
បន្ទាប់ពីការតម្រូវឲ្យរង់ចាំមួយឆ្នាំបានផុតទៅ នោះលីឌៀបានជួបជាមួយនឹងប៊ីស្សព និងប្រធានស្តេក ដើម្បីទទួលយកប័ណ្ឌចូលព្រះវិហារបរិសុទ្ធរបស់គាត់ ។ នៅក្នុងថ្នាក់ស្រ្តីនាថ្ងៃ អាទិត្យមួយគាត់បានទាញខ្ញុំចុះទៅជិតគាត់ ហើយប្រាប់ថា « ប្រធានស្តេកបានប្រាប់ខ្ញុំថា ខ្ញុំត្រូវតែទៅព្រះវិហារបរិសុទ្ធឲ្យឆាប់តាមដែលអាចធ្វើទៅបាន ។ តើអ្នកនាំខ្ញុំទៅបានទេ ? »
វាជាសប្ដាហ៍ដំបូងនៃខែធ្នូ — ជាពេលវេលាដ៏មមាញឹកសម្រាប់ពួកយើងរាល់គ្នា ។ ខ្ញុំបានព្យាយាមដោះសារដូចសព្វមួយដងថា « តើយើងមិនអាចចាំដល់ខែមករាទេឬអី ? »
« ទេ យើងត្រូវទៅឥឡូវនេះ ! »
ស្ត្រីមួយក្រុមពីវួដនេះ បានទៅព្រះវិហារបរិសុទ្ធជារៀងរាល់ខែ ដូច្នេះខ្ញុំបានទៅស៊ើបសួរពួកគេអំពីការធ្វើដំណើរទៅព្រះវិហារបរិសុទ្ធជាមួយនឹងលីឌៀ ។ ពួកគេរវល់ខ្លាំងណាស់ ។ ប៉ុន្តែ ដោយទឹកភ្នែកនៅក្នុងភ្នែកគាត់ លីឌៀបានប្រាប់យើងម្ដងទៀតថា ប្រធានស្ដេកបានប្រាប់គាត់ឲ្យទៅព្រះវិហារបរិសុទ្ធឲ្យឆាប់តាមដែលអាចធ្វើទៅបាន ។
នៅចំណុចនោះ យើងបានយល់ព្រមដើម្បីធ្វើដំណើរចម្ងាយ 241 គ. ម. នៅសប្ដាហ៍បន្ទាប់ ។ នៅក្នុងការធ្វើដំណើរនោះ ឡានរបស់យើងបានពេញទៅដោយការជជែកគ្នា និងមិត្តភាពរបស់ស្រ្តីទាំងប្រាំបីនាក់ ។ លីឌៀពោរពេញទៅដោយភាពរីករាយ តាមរយៈបទពិសោធន៍ពីការទៅព្រះវិហារបរិសុទ្ធរបស់គាត់ និងពរជ័យនៃការទទួលអំណោយទានពិសិដ្ឋរបស់គាត់ ។
នៅសប្ដាហ៍ទីមួយនៃខែ មករា ស្ថានភាពរបស់លីឌឿបានដុនដាបឡើង ហើយគាត់បានចូលមន្ទីរពេទ្យសម្រាប់ការសង្គ្រោះបន្ទាន់ ។ មួយសប្ដាហ៍ក្រោយមក គាត់បានទទួលមរណភាព ។ ប៉ុន្តែ លីឌៀនាំទៅជាមួយខ្លួននូវពរជ័យដ៏អស់កល្ប ដែលគាត់បានទទួលនៅក្នុងព្រះវិហារបរិសុទ្ធប៉ុន្មានសប្ដាហ៍មុននេះ ។
ក្រោយមក ខ្ញុំបានប្រាប់ដល់ប្រធានស្ដេកអំពីរឿងនៃដំណើរទៅព្រះវិហារបរិសុទ្ធរបស់យើង ហើយបានប្រាប់គាត់ថា ខ្ញុំចាប់អារម្មណ៍ជាខ្លាំងចំពោះការបំផុសគំនិតដែលគាត់បានទទួល ក្នុងការប្រាប់លីឌឿឲ្យត្រូវទៅព្រះវិហារបរិសុទ្ធជាបន្ទាន់ ។
គាត់បានឆ្លើយថា « ខ្ញុំពិតជាមិនមានន័យថា គាត់ត្រូវទៅឥឡូវនេះទេ » ។ « ខ្ញុំតែងតែប្រាប់អ្នកដែលកាន់ប័ណ្ឌចូលព្រះវិហារបរិសុទ្ធថ្មីឲ្យឆាប់ទៅព្រះវិហារបរិសុទ្ធ ។ ព្រះវិញ្ញាណបានមានព្រះបន្ទូលទៅកាន់លីឌៀ មិនមែនជាខ្ញុំទេ ! »
លីឌៀបានបង្រៀនយើងទាំងអស់ឲ្យស្ដាប់តាមព្រះវិញ្ញាណ ហើយធ្វើតាមការបំផុសគំនិតនោះភ្លាម ។ ខ្ញុំមានអំណរគុណចំពោះការរំឭករបស់គាត់ ដើម្បីស្ដាប់តាមសម្លេងតូចរហៀង ។