ពលិកកម្មដ៏ ឥតកំណាញ់ និងដ៏ពិសិដ្ឋរបស់ ព្រះអង្គសង្គ្រោះ
ដោយប្រធាន ប៊យដ៏ ឃេ ផាកកឺ
ប្រធានកូរ៉ុម នៃពួកសាវកដប់ពីរនាក់
ដកស្រង់ចេញពីសុន្ទរកថា « ការដឹងការពិតដ៏មានតម្លៃបំផុត » ដែលបានផ្តល់នៅក្នុងការប្រជុំធម្មនិដ្ឋាន នៅសាកលវិទ្យាល័យ ព្រិកហាំយ៉ង់ ថ្ងៃទី 6 ខែ វិច្ឆិកា ឆ្នាំ 2011 ។ សម្រាប់អត្ថបទទាំងមូលជាភាសាអង់គ្លេស សូមចូលទៅកាន់គេហទំព័រ speeches.byu.edu ។
ព្រះអម្ចាស់តែងតែគង់នៅទីនោះ ។ ទ្រង់បានរងទុក្ខ និងសងទោសកំហុស បើអ្នកព្រមទទួលយកទ្រង់ជាព្រះប្រោសលោះរបស់អ្នក ។
យើងទាំងអស់គ្នារស់នៅក្នុងបំណុលខាងវិញ្ញាណ ។ ដោយហេតុដូច្នេះហើយ បញ្ជីបំណុលចេះតែកើនឡើងៗ ។ បើអ្នកសងបំណុលនោះជាបន្តបន្ទាប់ នោះអ្នកមានការបារម្ភតែបន្តិចបន្តួចប៉ុណ្ណោះ ។ មិនយូរប៉ុន្មាន អ្នកចាប់ផ្ដើមរៀនពីវិន័យ ហើយដឹងថាមានថ្ងៃទូទាត់មួយនៅខាងមុខ ។ ចូររៀនដើម្បីរក្សាការសងបំណុលខាងវិញ្ញាណរបស់អ្នក ឲ្យបានទៀងទាត់ជាជាងទុកឲ្យវាប្រមូលការប្រាក់ និងប្រាក់ពិន័យ ។
ដោយសារអ្នកត្រូវបានសាកល្បង នោះគឺត្រូវបានរំពឹងទុកជាមុនថា អ្នកនឹងធ្វើខុសខ្លះៗ ។ ខ្ញុំសន្មតថាអ្នកបានធ្វើនូវរឿង ដែលអ្នកសោកស្ដាយក្នុងជីវិត រឿងដែលអ្នកមិនអាចទាំងសុំនូវការអភ័យទោសផង ហេតុនោះហើយអ្នកស្ពាយបន្ទុកមួយ ។ ឥឡូវនេះដល់ពេលត្រូវប្រើពាក្យ កំហុស ដែលអាចធ្វើឲ្យ ប្រឡាក់ដូចជាទឹកខ្មៅដែលដិត ជាប់ហើយមិនងាយនឹងលុបចេញ បាន ។ លទ្ធផលរបស់កំហុស គឺការខកចិត្តសោកស្ដាយចំពោះការបាត់បង់ពរជ័យ និងឱកាស ។
បើអ្នកកំពុងតែពុះពារជាមួយនឹងកំហុស នោះអ្នកមិនខុសអី្វពីប្រជាជន នៃព្រះគម្ពីរមរមននោះទេ ជាអស់អ្នកដែលព្យាការីបាននិយាយថា « ដោយអំពើទុច្ចរិតរបស់គេ នោះសាសនាចក្របានចាប់ផ្ដើម ចុះអន់ថយហើយ ពួកគេបានចាប់ផ្ដើមមិនជឿវិញ្ញាណ នៃការព្យាករណ៍ និងវិញ្ញាណនៃវិវរណៈ ហើយសេចក្ដីជំនុំជំរះទាំងឡាយនៃព្រះបានសម្លឹងមើលគេចំពីមុខ » ( ហេលេមិន 4:23 ) ។
ជាញឹកញាប់ យើងព្យាយាមដោះស្រាយបញ្ហាដោយ ការប្រាប់គ្នាទៅវិញទៅមក និងប្រាប់ខ្លួនយើងថាវាមិនអីទេ ។ តែនៅជ្រៅខាងក្នុង យើងមិនជឿដល់វាទេ ។ ក៏មិនជឿខ្លួនយើងថា យើងនិយាយបែបនេះដែរ ។ យើងដឹងច្បាស់ជាងនោះ ។ វាពិតជាមានបញ្ហា !
ព្យាការីទាំងឡាយតែងបង្រៀនពីការប្រែចិត្ត ។ អាលម៉ាបានមានប្រសាសន៍ថា « មើលចុះទ្រង់នឹងយាងមក ប្រោសលោះអស់អ្នកណាដែលនឹងទទួលបុណ្យជ្រមុជទឹក ចំពោះការប្រែចិត្តស្របតាម សេចក្ដីជំនឿជឿដល់ព្រះនាមទ្រង់ » ( អាលម៉ា 9:27 ) ។
អាលម៉ាបានប្រាប់កូនប្រុសដ៏ចចេសរបស់គាត់ដោយចំៗថា « ឥឡូវនេះការប្រែចិត្តពុំអាចមានដល់មនុស្សទេ លើកលែងតែមានទោស ដែលនៅអស់កល្បជានិច្ច ដូចជាជីវិតនៃព្រលឹងដែរ ដែលបានភ្ជាប់ទុកផ្ទុយទៅនឹងផែនការ នៃសុភមង្គល » ( អាលម៉ា 42:16 ) ។
មានគោលបំណងសំខាន់ពីរសម្រាប់ជីវិតរមែងស្លាប់ ។ ទីមួយគឺ ដើម្បីទទួលរូបកាយដែលអាច ត្រូវបានសំអាត និងលើកតម្កើងហើយរស់នៅរហូត ។ គោលបំណងទីពីរ គឺដើម្បីត្រូវបានសាកល្បង ។ ក្នុងការសាកល្បង យើងពិតជានឹងធ្វើកំហុស ។ តែបើយើងនឹងមានកំហុស យើងអាចរៀនពីកំហុសរបស់យើង ។ « បើយើងថាយើងមិនដែលធ្វើបាបសោះ នោះឈ្មោះថាយើងធ្វើឲ្យទ្រង់ទៅជាអ្នកកុហកវិញ ហើយព្រះបន្ទូលទ្រង់មិននៅក្នុងយើងទេ » ( យ៉ូហានទី 1 1:10 ) ។
ប្រហែលជាអ្នកអាចមានអារម្មណ៍ទន់ខ្សោយនៅក្នុងគំនិត និងរូបកាយ ហើយមានបញ្ហា ឬមានបន្ទុកដោយទម្ងន់នៃបំណុលខាងវិញ្ញាណដែលត្រូវ « ហួសកំណត់ » ។ ពេលអ្នកជួបប្រទះនឹងគ្រានៃការត្រិះរិះដោយស្ងប់ស្ងាត់ទាំងនោះ ( ដែលយើងភាគច្រើនព្យាយាមគេចវេះ ) តើមានរឿងដែលមិនទាន់បានដោះស្រាយ មួយចំនួនដែលរំខានអ្នកឬទេ ? តើអ្នកមានវិប្បដិសារីណាមួយក្នុងមនសិការរបស់អ្នកទេ ? តើអ្នកនៅតែមានកំហុសចំពោះរឿងតូចតាច ឬធំក្នុងកម្រិតណាមួយទេ ?
ជាញឹកញាប់ណាស់ យើងទទួលសំបុត្រពីពួកអ្នកដែលបានធ្វើកំហុសដ៏ធំ ឬមានបន្ទុកធ្ងន់ក្រៃលែង ។ ពួកគេទទូចថា ៖ « តើខ្ញុំអាចទទួលបានការអភ័យទោសទេ ? តើខ្ញុំអាចផ្លាស់ប្ដូរបានទេ ? » ចម្លើយគឺបាន !
សាវកប៉ុលបានបង្រៀន ពួកកូរិនថូសថា « ដ្បិតគ្មានសេចក្តីល្បួងណាកើតដល់អ្នករាល់គ្នា ក្រៅពីសេចក្តីល្បួង ដែលត្រូវខាងមនុស្សលោកទេ រីឯព្រះទ្រង់ក៏ស្មោះត្រង់ដែរ ទ្រង់មិនឲ្យកើតមានសេចក្តីល្បួងហួសកំឡាំងអ្នករាល់គ្នាឡើយ គឺនៅវេលាណាដែលត្រូវល្បួង នោះទ្រង់ក៏រៀបផ្លូវឲ្យចៀសរួច ដើម្បីឲ្យអ្នករាល់គ្នាអាចនឹងទ្រាំបាន » ( កូរិនថូសទី 1 10:13 ) ។
ដំណឹងល្អបង្រៀនយើងថា ការបានធូរស្រាលពីទារុណកម្ម និងកំហុសអាចទទួលបានតាមរយៈការប្រែចិត្ត ។ លើកលែងតែពួកអ្នកមួយចំនួនតូច — ដែលបានក្បត់ទៅចូលរួមជាមួយអារក្សសាតាំង ក្រោយពីការដឹងនូវភាពពេញលេញថា គ្មានទម្លាប់ គ្មានការញៀន គ្មានការបះបោរ គ្មានការរំលង គ្មានការបំពានតូច ឬធំណា ដែលរួចផុតពីការសន្យានៃការអភ័យទោសដ៏ពេញលេញនោះឡើយ ។ មិនថាមានអ្វីកើតឡើងក្នុងជីវិតអ្នកនោះទេ ព្រះអម្ចាស់បានរៀបចំផ្លូវសម្រាប់ឲ្យអ្នកត្រឡប់មកវិញ បើអ្នកនឹងស្ដាប់តាមការបំផុសគំនិតពីព្រះវិញ្ញាណបរិសុទ្ធ ។
អ្នកខ្លះពេញទៅដោយការជម្រុញដ៏បង្ខំមួយ ជាការល្បួងមួយដែលវិលចុះឡើងក្នុងគំនិត ប្រហែលរហូតដល់ក្លាយជាទម្លាប់ បន្ទាប់មកជាការញៀន ។ យើងងប់ងល់នឹងការរំលង និងអំពើបាបខ្លះ និងភាពសមហេតុសមផលខ្លះផងដែរ ដែលយើងមិនមានកំហុសទេ ដោយព្រោះយើងកើតមកក្នុងភាពនោះ ។ យើងក្លាយជាជាប់អន្ទាក់ ហើយដោយហេតុនេះ វានាំមកនូវការឈឺចាប់ និងទារុណកម្មដែលមានតែព្រះអង្គសង្គ្រោះប៉ុណ្ណោះអាចព្យាបាលបាន ។ អ្នកមានអំណាចដើម្បីបញ្ឈប់ និងត្រូវបានប្រោសលោះ ។
សាតាំងវាយប្រហារមកលើក្រុមគ្រួសារ
មានម្ដងនោះ ប្រធាន ម៉ារ៉ុន ជី រ៉មនី ( ឆ្នាំ 1897–1988 ) បានប្រាប់ខ្ញុំថា « ចូរកុំគ្រាន់តែប្រាប់ពួកគេ ដើម្បីពួកគេអាចយល់ តែសូមប្រាប់ពួកគេ ដើម្បីពួកគេមិនអាចយល់ខុសវិញ » ។
នីហ្វៃបាននិយាយថា « ត្បិតព្រលឹងខ្ញុំត្រេកអរចំពោះការច្បាស់លាស់ ត្បិតដោយរបៀបនេះហើយ ដែលព្រះអម្ចាស់ដ៏ជាព្រះទ្រង់ បានធ្វើកិច្ចការនៅក្នុងចំណោមកូនចៅមនុស្ស ។ ត្បិតព្រះអម្ចាស់ដ៏ជាព្រះ ទ្រង់បានប្រទានពន្លឺដល់យោបល់ » ( នីហ្វៃទី 2 31:3 ) ។
ដូច្នេះចូរស្ដាប់ ! ខ្ញុំនឹងនិយាយដោយច្បាស់លាស់ដូចជាមនុស្សម្នាក់ដែលត្រូវបានហៅ និងមានកាតព្វកិច្ចដើម្បីធ្វើដូច្នេះ ។
អ្នកដឹងថាមានបច្ចាមិត្ត ។ ព្រះគម្ពីរកំណត់ន័យពីវាក្នុងពាក្យទាំងនេះថា ៖ « សត្វពស់ពីដើមនោះដែលជាអារក្ស … ដែលជាបិតានៃសេចក្ដីកុហក » ( នីហ្វៃទី 2 2:18 ) ។ វាត្រូវបានបណ្ដេញចេញតាំងពីដើមមក ( សូមមើល គ និង ស 29:36–38 ) ហើយមិនបានទទួលរូបកាយរមែងស្លាប់ទេ ។ វាបានស្បថថានឹងបង្អាក់ « ផែនការនៃសុភមង្គលដ៏មហិមា » ( អាលម៉ា 42:8 ) ហើយក្លាយជាខ្មាំងសត្រូវដល់គ្រប់ទាំងសេចក្ដីសុចរិត ។ វាផ្ដោតការវាយលុករបស់វាលើក្រុមគ្រួសារ ។
អ្នករស់នៅក្នុងជំនាន់មួយដែលបញ្ហានៃរូបអាសគ្រាម កំពុងតែរាលដាលទូទាំងពិភពលោក ។ វាពិបាកនឹងគេចពីវា ។ រូបអាសគ្រាម ផ្ដោតទៅលើផ្នែកនៃធម្មជាតិរបស់អ្នក ដែលតាមរយៈផ្នែកនេះ អ្នកមានអំណាចដើម្បីបង្កើតជីវិត ។
ការផ្ដេកផ្ដួលទៅលើរូបអាសគ្រាម នាំទៅកាន់ការលំបាកការលែងលះ រោគា និងបញ្ហាជាច្រើនប្រភេទ ។ គ្មានផ្នែកណាមួយរបស់វា ដែលគ្មានទោសនោះទេ ។ ការប្រមូលវាទុក មើលវា ឬយកវាក្នុងទម្រង់ណាក៏ដោយ គឺដូចជាទុកពស់ពិសនៅក្នុងកាបូបស្ពាយរបស់អ្នកអញ្ចឹង ។ វាស្មើនឹងការដាក់ខ្លួនអ្នកឲ្យពស់ពិសដ៏សាហាវ ចឹកស្លាប់ខាងវិញ្ញាណដែលមិនអាចជៀសរួចដែរ ។ ដោយពិភពលោកបែបនេះ នោះមនុស្សម្នាក់អាចងាយយល់ថា អ្នកជិតនឹងអាចប្រឈមជាមួយវាបាន ដែលស្ទើរតែឥតទោស ក្នុងការអានវា មើលវាដោយមិនបានដឹងពីលទ្ធផលដ៏អាក្រក់ទាំងឡាយ ។ បើការនេះពិពណ៌នាពីអ្នក ខ្ញុំសូមព្រមានអ្នកថាបញ្ឈប់វាទៅ ។ បញ្ឈប់វាឥឡូវនេះភ្លាមទៅ !
ព្រះគម្ពីរមរមនបង្រៀនថាគ្រប់ « មនុស្សលោកបានប្រៀនប្រដៅគ្រប់គ្រាន់ឲ្យដឹងខុស និង ត្រូវ » ( នីហ្វៃទី 2 2:5 ) ។ វារួមទាំងអ្នកដែរ ។ អ្នកដឹងនូវអ្វីដែលត្រូវ និងអ្វីដែលខុស ។ ចូរប្រុងប្រយ័ត្នកុំប្រព្រឹត្តិរំលងនឹងព្រះបញ្ញត្តិនោះឲ្យសោះ ។
ទោះជាកំហុសភាគច្រើន អាចត្រូវបានសារភាព ដោយសម្ងាត់ទៅកាន់ព្រះក្ដី ក៏មាននូវការរំលងមួយចំនួនដែលតម្រូវច្រើនជាងនោះ ដើម្បីទទួលបានការអភ័យទោស ។ បើកំហុសរបស់អ្នកធ្ងន់ធ្ងរ សូមជួបប៊ីស្សពអ្នក ។ បើមិនដូច្នេះទេ ការសារភាពធម្មតាដោយស្ងៀមស្ងាត់ និងដោយផ្ទាល់ខ្លួននឹងធ្វើបាន ប៉ុន្តែសូមចាំថាព្រឹកព្រលឹមនៃការអភ័យទោសដ៏អស្ចារ្យនោះ អាចមិនមកទាំងអស់ក្នុងពេលតែមួយនោះទេ ។ បើអ្នកជំពប់ជើងដួលចុះលើកទីមួយ សូមក្រោកឈរឡើងវិញ ការយកឈ្នះការបាក់ទឹកចិត្ត ជាផ្នែកមួយនៃការសាកល្បង ។ សូមកុំបោះបង់ ។ ហើយដូចខ្ញុំបានផ្ដល់ដំបូន្មានពីមុនថា ពេលអ្នកសារភាព និងបោះបង់អំពើបាបទាំងឡាយរបស់អ្នក ហើយសូមកុំក្រឡេកមើលទៅក្រោយ ។
ព្រះអង្គសង្គ្រោះបានរងទុក្ខ ជំនួសអំពើបាបរបស់យើង
ព្រះអម្ចាស់តែងតែគង់នៅទីនោះ ។ ទ្រង់បានរងទុក្ខ និងសងទោសកំហុស បើអ្នកព្រមទទួលយកទ្រង់ជាព្រះប្រោសលោះរបស់អ្នក ។
ព្រោះយើងជាមនុស្សរមែងស្លាប់ យើងអាចមិនយល់ទាំងស្រុងពី របៀប ដែលព្រះអង្គសង្គ្រោះទ្រង់ បានបំពេញពលិកម្មដ៏ធួនរបស់ទ្រង់នោះទេ ។ ប៉ុន្តែ សម្រាប់ពេលឥឡូវនេះ របៀប ដែល ទ្រង់រងទុក្ខគឺមិនសំខាន់ដូចជា មូលហេតុ ដែលទ្រង់រងទុក្ខនោះទេ ។ តើហេតុអ្វីទ្រង់ធ្វើការណ៍នោះ សម្រាប់អ្នកសម្រាប់ខ្ញុំ សម្រាប់មនុស្សគ្រប់រូប ? ទ្រង់បានធ្វើបែបនេះ ដោយព្រោះក្ដីស្រឡាញ់ចំពោះព្រះជាព្រះវរបិតា និងចំពោះមនុស្សគ្រប់គ្នា ។ « គ្មានអ្នកណាមានសេចក្ដីស្រឡាញ់ធំជាងនេះ គឺដែលអ្នកណានឹងប្ដូរជីវិត ជំនួសពួកសម្លាញ់របស់ខ្លួននោះទេ » ( យ៉ូហាន 15:13 ) ។
ក្នុងសួនច្បារ គែតសេម៉ានី ព្រះគ្រីស្ទបានចេញពីពួកសាវករបស់ទ្រង់ទៅអធិស្ឋាន ។ អ្វីដែលបានកើតឡើងគឺហួសពីអំណាចរបស់យើងដើម្បីយល់ដឹង ! តែយើងពិតជាដឹងថា ទ្រង់បានសម្រេចដង្វាយធួន ។ ទ្រង់ព្រមលើកដាក់លើអង្គទ្រង់នូវកំហុស និងអំពើបាប មន្ទិលសង្ស័យ និងការភ័យខ្លាចនៃពិភពលោកទាំងមួល ។ ទ្រង់បានរងទុក្ខជំនួសយើង ដើម្បីយើងមិនបាច់ត្រូវរងទុក្ខ ។ មនុស្សរមែងស្លាប់ជាច្រើនបានរងទារុណកម្ម ហើយស្លាប់ជាការស្លាប់ដ៏ឈឺចាប់ និងគួរឲ្យខ្លាចក្រៃលែង ។ តែការឈឺចាប់របស់ទ្រង់លើសពីការឈឺចាប់ទាំងអស់នោះទៀត ។
ក្នុងវ័យរបស់ខ្ញុំ ខ្ញុំបានដឹងថា អ្វីជាការឈឺចាប់ខាងរូបកាយ ហើយវាពុំមែនជាអ្វីដែលសប្បាយទេ ! គ្មាននរណាម្នាក់ចាកចេញពីជីវិតនេះទៅ ដោយមិនបានរៀនអ្វីសោះពីការរងទុក្ខនោះទេ ។ តែទារុណកម្មផ្ទាល់ខ្លួនដែលខ្ញុំមិនអាចទ្រាំទ្របាន នោះគឺពេលខ្ញុំបានដឹងថា ខ្ញុំបានធ្វើឲ្យមនុស្សដទៃទៀតរងទុក្ខ ។ ពេលនោះហើយ ដែលខ្ញុំបានយល់បន្ដិចពីការឈឺចាប់ដែលព្រះអង្គសង្គ្រោះ បានជួបក្នុងសួនច្បារគែតសេម៉ានី ។
ការរងទុក្ខរបស់ទ្រង់ គឺខុសពីការរងទុក្ខផ្សេងទៀតទាំងអស់ ឬដោយព្រោះទ្រង់បានយកដាក់លើអង្គទ្រង់ នូវទោសទាំងអស់ដែលធ្លាប់មានលើគ្រួសារមនុស្សជាតិ ។ សូមស្រម៉ៃពីការណ៍នោះ ! ទ្រង់គ្មានជំពាក់បំណុលដើម្បីនឹងសងសោះឡើយ ។ ទ្រង់ពុំបានធ្វើខុសសោះឡើយ ។ ទោះយ៉ាងណា ការបូកបញ្ចូលគ្នាទាំងអស់នៃកំហុស ទុក្ខព្រួយ ការឈឺចាប់ និងសេចក្ដីទាបថោក ទារុណកម្មទាំងខាង ផ្លូវចិត្ត អារម្មណ៍ និង ផ្លូវកាយទាំងអស់ ដែលមនុស្សលោកស្គាល់ — គឺទ្រង់បានភ្លក់នូវបទពិសោធន៍ទាំងអស់ ។ មានតែមួយអង្គនៅក្នុងកំណត់ត្រាប្រវត្តិសាស្រ្តមនុស្សទាំងអស់ ដែលគ្មានទោសសោះដែលមានអំណាចនឹងធ្វើឲ្យធួនដល់បាប និងការរំលងរបស់មនុស្សទាំងអស់ ហើយអាចស៊ូនឹងការឈឺចាប់ ដែលមានពេលធ្វើដង្វាយធួននោះ ។
ទ្រង់ព្រមលះបង់ជីវិតទ្រង់ ហើយមានបន្ទូលដ៏មានខ្លឹមសារថា « គឺយើងនេះហើយ ដែលទទួលយកអំពើបាបទាំងឡាយ នៃមនុស្សលោកមកលើខ្លួន » ( ម៉ូសាយ 26:23 ) ។ ទ្រង់ត្រូវបានគេឆ្កាង ទ្រង់បានសុគត ។ ពួកគេមិនអាចយកជីវិតពីទ្រង់ទេ ។ គឺទ្រង់ទេតើដែលព្រមសុគតនោះ ។
ការអភ័យទោសដ៏ពេញលេញ គឺអាចធ្វើឡើងបាន
បើអ្នកបានដួលចុះ ឬសូម្បីវង្វេងមួយរយៈ បើអ្នកមានអារម្មណ៍ថាឥឡូវនេះបច្ចាមិត្តសង្កត់អ្នកជាប់នោះ អ្នកអាចឈានទៅមុខដោយជំនឿ និងដោយមិនវង្វេងទៅមកក្នុងលោកិយនេះទៀតឡើយ ។ មានពួកអ្នកដែលត្រៀមរួចជាស្រេច ដើម្បីដឹកនាំអ្នកឲ្យត្រឡប់ទៅភាពសុខសាន្ត និងសុវត្ថិភាពវិញ ។ ដូចដែលបានសន្យាក្នុងព្រះគម្ពីរថា សូម្បីព្រះគុណនៃព្រះបានមក « បន្ទាប់ពីអ្វីៗទាំងអស់ដែលយើងអាចធ្វើបាន » ( នីហ្វៃទី 2 25:23 ) ។ ចំពោះខ្ញុំ លទ្ធភាពក្នុងការសម្រេចបាននូវការណ៍នេះ គឺជាសេចក្ដីពិតដែលមានតម្លៃបំផុតដើម្បីដឹង ។
ខ្ញុំសូមសន្យាថា ព្រឹកព្រលឹមដ៏ស្រស់បំព្រងនៃការអភ័យទោស អាចមកដល់ ។ ពេលនោះ « សេចក្ដីសុខសាន្តរបស់ព្រះដែលហួសលើសពីអស់ទាំងគំនិត » ( ភីលីព 4:7 ) ចូលមកក្នុងជីវិតអ្នកម្ដងទៀត ជាអ្វីមួយដែលដូចជាព្រះអាទិត្យរះ ហើយអ្នកដូចជាទ្រង់ដែរ « នឹងលែងនឹកចាំពីអំពើបាបរបស់អ្នកទៀតជាដរាបទៅ » ( យេរេមា 31:34 ) ។ តើអ្នកនឹងដឹងដោយរបៀបណា ? អ្នកនឹងដឹង ! ( សូមមើល ម៉ូសាយ 4:1–3 ។ )
នោះជាអ្វីដែលយើងបង្រៀនដល់អ្នកដែលមានបញ្ហា ។ ទ្រង់នឹងលូកព្រះហស្ថ ហើយដោះស្រាយបញ្ហា តែអ្នកត្រូវសងថ្លៃនោះវិញ ។ វាពុំបានមកដោយមិនធ្វើដូច្នោះឡើយ ។ ទ្រង់ជាអ្នកគ្រប់គ្រង មានន័យថាទ្រង់បានសងថ្លៃដែលចាំបាច់ តែទ្រង់ចង់ឲ្យអ្នកធ្វើនូវអ្វីដែលអ្នកគួរធ្វើ សូម្បីតែវាឈឺចាប់ក្ដី ។
ខ្ញុំស្រឡាញ់ព្រះអម្ចាស់ ហើយខ្ញុំស្រឡាញ់ព្រះវរបិតាដែលបានបញ្ជូនទ្រង់មក ។ បន្ទុកនៃការខកចិត្ត អំពើបាប និងកំហុសរបស់យើង អាចដាក់នៅចំពោះព្រះភ័ក្រទ្រង់ និងក្នុងលក្ខខណ្ឌដ៏សប្បុរសរបស់ទ្រង់ គ្រប់ចំណុចនីមួយៗនៅក្នុងបញ្ជី អាចត្រូវបានបានគូសថា « បានបង់យ៉ាងពេញថ្លៃ » ។
« ព្រះយេហូវ៉ាទ្រង់មានបន្ទូលថា មកចុះយើងនឹងពិភាក្សាជាមួយគ្នា ទោះបើអំពើរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ ទោះបើក្រហមឆ្អៅក៏ដោយ គង់តែនឹងបានដូចជារោមចៀមវិញ » ។ នេះគឺជាអ្វីដែលអេសាយ បានបន្តថា « បើសិនជាឯងរាល់គ្នាស្ម័គ្រចិត្តតាមហើយស្ដាប់បង្គាប់ » ( អេសាយ 1:18–19 ) ។
ចូរមកឯទ្រង់
បទគម្ពីរដែលថា « ឲ្យចេះមានប្រាជ្ញានៅក្នុងយុវវ័យរបស់កូនចុះ មែនហើយចូររៀននៅក្នុងយុវវ័យរបស់កូន ឲ្យចេះកាន់តាមព្រះបញ្ញត្តិទាំងឡាយនៃព្រះ » ( អាលម៉ា 37:35 ) ជាការអញ្ជើញដែលអមមកជាមួយនូវការសន្យា នៃក្ដីសុខសាន្ត និងការការពារពីបច្ចាមិត្ត ។ « កុំឲ្យអ្នកណាមើលងាយអ្នក ដោយព្រោះនៅក្មេងនោះឡើយ ចូរធ្វើជាគំរូដល់ពួកអ្នកជឿ ដោយពាក្យសម្ដីកិរិយាប្រព្រឹត្ត សេចក្ដីស្រឡាញ់ សេចក្ដីជំនឿ និងសេចក្ដីបរិសុទ្ធ » ( ធីម៉ូថេទី 1 4:12 ) ។
កុំរំពឹងថាអ្វីទាំងអស់ នឹងដំណើរទៅដោយរលូនអស់មួយជីវិតអ្នកឡើយ ។ សូម្បីពួកអ្នកដែលរស់នៅដូចដែលគេគួររស់នៅ ក៏មានពេលខ្លះវានឹងពិបាកដែរ ។ ចូរប្រឈមនឹងឧបសគ្គនៃជីវិត ដោយសុទុដ្ឋិនិយម និងភាពប្រាកដប្រជា ហើយអ្នកនឹងមានភាពសុខសាន្ត និងជំនឿដើម្បីគាំទ្រអ្នកក្នុងពេលនេះ និងពេលអនាគត ។
ចំពោះអ្នកទាំងឡាយ ដែលមិនទាន់មានពរជ័យទាំងអស់ ដែលអ្នកមានអារម្មណ៍ថាគឺជាតម្រូវការចាំបាច់ដែលអ្នកចង់បាន និងត្រូវការ ខ្ញុំជឿយ៉ាងមុតមាំថា គ្មានបទពិសោធន៍ ឬឱកាសណាដែលចាំបាច់ដល់ការប្រោសលោះ និងការសង្គ្រោះដែលនឹងបដិសេធអ្នកដែលរស់នៅដោយស្មោះត្រង់ឡើយ ។ ចូរបន្តរស់នៅដោយសក្ដិសម ត្រូវមានសង្ឃឹម អត់ធ្មត់ និងពេញដោយការអធិស្ឋាន ។ ការណ៍ទាំងឡាយមានផ្លូវមួយដើម្បីបានសម្រេច ។ អំណោយទានព្រះវិញ្ញាណបរិសុទ្ធ នឹងដឹកនាំសកម្មភាពរបស់អ្នក ។
បើអ្នកជាបុគ្គលម្នាក់ដែលកំពុងពុះពារជាមួយនឹងកំហុស ការខកចិត្ត ឬការក្រៀមក្រំ ដែលជាលទ្ធផលនៃកំហុសដែលអ្នកបានធ្វើ ឬពរជ័យដែលមិនទាន់មកដល់នោះ សូមអានការបង្រៀន ដែលជាការលើកទឺកចិត្ត ដែលមានក្នុងទំនុកតម្កើង « មកឯព្រះយ៊េសូវ » ។
មកឯព្រះយេស៊ូវ អស់អ្នកដែលផ្ទុកធ្ងន់អើយ
នឿយព្រួយ ហើយបាក់ទឹកចិត្តព្រោះបាបកម្ម ។
ទ្រង់នឹងដឹកនាំអ្នក ទៅទីដ៏សុខសាន្ត
អ្នកទុកចិត្តទ្រង់អាចសម្រាក សម្រាក ។
មកឯព្រះយេស៊ូវ ទ្រង់ស្ដាប់អ្នកជានិច្ច
ទោះជាអ្នកវង្វេងក្នុងផ្លូវងងឹត
ទ្រង់នឹងដឹកនាំអ្នកដោយសេចក្ដីស្រឡាញ់
នាំពីងងឹត ទៅពន្លឺ ពន្លឺ ។
មកឯព្រះយេស៊ូវ ទ្រង់ឮអ្នកយ៉ាងពិត
បើអ្នកសុំក្ដីស្នេហ៍ ទ្រង់ដោយរាបសារ ។
ឱ ! អ្នកមិនដឹងថា ទេវតាគង់នៅជិត
នៅឯនគរភ្លឺខាងលើ ខាងលើ ?1
ខ្ញុំប្រកាស ធ្វើជាសាក្សីពិសេសរបស់ព្រះអម្ចាស់ យេស៊ូវគ្រីស្ទ ជាមួយនឹងបងប្អូនប្រុសជាពួកសាវករបស់ខ្ញុំ ។ សាក្សីនោះត្រូវបានបញ្ជាក់សាជាថ្មី គ្រប់ពេលដែលខ្ញុំបានទទួលអារម្មណ៍នៅក្នុងខ្លួនខ្ញុំ ឬនៅក្នុងឥទ្ធិពលលាងសម្អាតផ្សេងទៀត អំពីពលិកម្មដ៏ពិសិដ្ឋរបស់ទ្រង់ ។ សាក្សីរបស់ខ្ញុំ និងសាក្សីនៃបងប្អូនប្រុសរបស់ខ្ញុំ ជាការពិត ។ យើងស្គាល់ព្រះអម្ចាស់ ។ ទ្រង់មិនមែនជាមនុស្សចម្លែកទេ ចំពោះពួកព្យាការី អ្នកមើលឆុត និងអ្នកបើកសម្តែងរបស់ទ្រង់ ។
ខ្ញុំយល់ថា អ្នកមិនល្អឥតខ្ចោះនោះទេ ប៉ុន្តែអ្នកកំពុងតែធ្វើដំណើរនៅតាមផ្លូវនោះ ។ ចូរមានភាពក្លាហាន ។ សូមដឹងថា អ្នកដែលមានរូបរាងកាយ មានអំណាចលើអ្នកដែលគ្មាន ។2 សាតាំងត្រូវបានបដិសេធពីរូបកាយ ដូច្នោះប្រសិនបើអ្នកប្រឈមជាមួយនឹងការល្បួង ចូរដឹងថាអ្នកមានអំណាចខ្លាំងជាងការល្បួងទាំងអស់នោះ ប្រសិនបើអ្នកនឹងអនុវត្តនូវសិទ្ធជ្រើសរើសដែលបាន ប្រទានឲ្យអ័ដាម និងអេវ៉ានៅក្នុងសួនច្បារ ហើយបានបន្តមកដល់ជំនាន់នេះ ។
ប្រសិនបើអ្នកឆ្ពោះទៅមុខដោយសេចក្តីសង្ឃឹម និងបំណងដើម្បីធ្វើនូវអ្វីដែលព្រះអម្ចាស់សព្វព្រះទ័យឲ្យអ្នកធ្វើ — នោះ គឺជាអ្វីដែលត្រូវបានរំពឹងទុក ។