សំណួរ និង ចម្លើយ
« តើខ្ញុំអាចមានទំនុកចិត្តគ្រប់គ្រាន់ល្មម ដើម្បីនិយាយទៅកាន់ប៊ីស្សពរបស់ខ្ញុំអំពី បញ្ហានានា ឬកង្វល់ដោយរបៀបណា ? »
អ្នកអាចមានអារម្មណ៍ភ័យខ្លាច ដើម្បីនិយាយទៅប៊ីស្សពរបស់អ្នកអំពីអ្វីដែលអ្នកកំពុងពុះពារ ហើយនោះគឺជារឿងធម្មតាទេ ។ ជារឿយៗ យើងមានការភ័យខ្លាចចំពោះបទពិសោធន៍ថ្មី ឬចំពោះការនិយាយជាមួយនឹងមនុស្សពេញវ័យ ។
ប៉ុន្តែ ប៊ីស្សពរបស់អ្នកត្រូវបានហៅដោយព្រះ ។ លោកត្រូវបានហៅ ដោយសារលោកបានប្ដេជ្ញាចិត្តក្នុងនាមជាសិស្សរបស់ព្រះយេស៊ូវគ្រីស្ទ ។ លោកនឹងធ្វើយ៉ាងល្អបំផុតដោយចិត្តរាបសា និង ការយោគយល់ ។ គោលបំណងរបស់លោក គឺដើម្បីជួយអ្នកមកកាន់ព្រះអង្គសង្គ្រោះ ដើម្បីឲ្យអ្នកអាចរកឃើញសេចក្តីសុខសាន្ត ។ ជាដំបូង អ្នកអាចមានអារម្មណ៍ខ្មាស់អៀន ដើម្បីនិយាយទៅកាន់លោកអំពីសំណួរ ឬអំពីបាបរបស់អ្នក ប៉ុន្តែលោកនឹងមិនគិតមើលងាយអ្នកឡើយ ។ តាមពិតទៅ លោកនឹងរីករាយដែលអ្នកមានបំណង ដើម្បីកែលម្អ ។ ហើយលោកនឹងរក្សាការសន្ទនារបស់អ្នក ជាការសម្ងាត់ ។
អ្នកមិនចាំបាច់រែកពន់បន្ទុករបស់អ្នកតែម្នាក់ឯងទេ ។ ប៊ីស្សពរបស់អ្នកអាចជួយអ្នករកឃើញចម្លើយទៅ នឹងសំណួររបស់អ្នក ហើយបើចាំបាច់ លោកនឹងជួយអ្នកឲ្យកែប្រែចិត្ត ហើយយកឈ្នះលើអារម្មណ៍ខុសឆ្គង ភាពអស់សង្ឃឹម ឬភាពមិនសក្ដិសម តាមរយៈដង្វាយធួនរបស់ព្រះគ្រីស្ទ ។
នៅពេលដែលអ្នកនិយាយទៅកាន់ប៊ីស្សពរបស់អ្នក អ្នកនឹងមានអារម្មណ៍ពីក្ដីស្រឡាញ់របស់លោកចំពោះអ្នក ។ ទោះបីជា លោកមានទំនួលខុសត្រូវសម្រាប់វួដទាំងមូលក្តី ការផ្ដោតសំខាន់របស់លោកគឺជា សុខុមាលភាពនៃយុវជន និងយុវនារីដែរ ។ អ្នកមិនរំខានលោកដោយការសូមជំនួយនោះទេ ។
អ្នកអាចអធិស្ឋានទៅព្រះវរបិតា សម្រាប់កម្លាំង និងភាពក្លាហានដើម្បីនិយាយទៅកាន់ប៊ីស្សពរបស់អ្នក ។ ទ្រង់បានអនុញ្ញាតឲ្យប៊ីស្សពអ្នកជួយអ្នក ហើយប៊ីស្សពអ្នក ចង់ធ្វើដូច្នោះដែរ ។ នៅពេលដែលអ្នកទៅដោយបើកដួងចិត្ត និងប្រាថ្នាដើម្បីបានល្អប្រសើរជាងមុន អ្នកនឹងរកឃើញថា អ្នកចាកចេញពីការិយាល័យរបស់លោក ដោយមានអារម្មណ៍ល្អប្រសើរជាងពេលមុន ។
លោកនឹងមិនគិតមើលងាយអ្នកឡើយ
ប៊ីស្សពនៃវួដរបស់អ្នក គឺត្រូវបានផ្ដល់នូវសិទ្ធិអំណាច ដើម្បីដឹកនាំអ្នកតាមរយៈជំហាននៃការកែប្រែចិត្ត ។ ពេលខ្លះ ការងាកទៅរកប៊ីស្សពរបស់អ្នក គឺជាវិធីតែមួយគត់សម្រាប់អ្នក ដើម្បីកែប្រែចិត្តយ៉ាងពេញលេញ តាមរយៈព្រះអង្គសង្គ្រោះ ។ នៅពេលដែលខ្ញុំត្រូវការនិយាយទៅកាន់ប៊ីស្សពរបស់ខ្ញុំ លោកបានជួយខ្ញុំឲ្យស្វែងរកព្រះអង្គសង្គ្រោះ ហើយជំនះលើមុខរបួសជ្រៅបំផុតដែលខ្ញុំមាន ។ ប៊ីស្សពរបស់អ្នក ចង់ជួយអ្នក ។ ការហៅបម្រើរបស់លោក គឺដើម្បីយកចិត្តទុកដាក់ចំពោះអ្នក ហើយលោកនឹងមិនគិតមើលងាយអ្នក ដោយសារតែអ្វីដែលអ្នកត្រូវការជួបលោកដើម្បីដោះស្រាយនោះឡើយ ។
ម៉ាឌីសុន ឌី អាយុ 18 ឆ្នាំ យូថាហ៍ សហរដ្ឋ អាមេរិក
ប៊ីស្សពរបស់អ្នក នឹងពេញចិត្តដើម្បីជួយ
ខ្ញុំធ្លាប់មានអារម្មណ៍មិនស្រួលក្នុងការសម្ភាសន៍ ប៉ុន្តែនៅទីបំផុត ខ្ញុំបានដឹងថាប៊ីស្សពរបស់ខ្ញុំ គឺតែងតែពេញចិត្តដើម្បីជួយខ្ញុំដោះស្រាយបញ្ហារបស់ខ្ញុំ ។ សូមជឿទុកចិត្តលើប៊ីស្សពរបស់អ្នក លោកគឺជាអ្នកគង្វាល ហើយវួដទាំងមូលគឺជាហ្វូងចៀមរបស់លោក ។
ជេមស៍ អរ អាយុ 19 ឆ្នាំ កូកាបាំបា ប្រទេស បូលីវី
លោកនឹងមិនក្បត់សេចក្ដីទុកចិត្តរបស់អ្នកឡើយ
ខ្ញុំបានដឹងថា ប៊ីស្សពគឺប្រហែលជាមនុស្សពេញវ័យគួរឲ្យទុកចិត្តបំផុត ដែលក្មេងជំទង់អាចស្វែងរកជំនួយពី ។ លោកនឹងមិនក្បត់សេចក្ដីទុកចិត្តរបស់អ្នកឡើយ — អ្វីគ្រប់យ៉ាងដែលអ្នកចែករំលែកជាមួយលោកនៅក្នុងការិយាល័យលោក ។ ពេលខ្លះ វាមានការលំបាកខ្លាំងណាស់ ដើម្បីចែករំលែកបញ្ហារបស់អ្នក ប៉ុន្តែការនិយាយផ្ទាល់មុខជាមួយនរណាម្នាក់ ដែលស្រឡាញ់ និងយកចិត្តទុកដាក់ ហើយចង់បានអ្វីដែលល្អបំផុតសម្រាប់អ្នក ធ្វើឲ្យវាងាយស្រួលជាងមុន ។
នីកូល អេស អាយុ 18 ឆ្នាំ មកពីរដ្ឋអៃដាហូ ប្រទេស ស.រ.អា
អ្នកអាចពឹងផ្អែកលើលោក
ប៊ីស្សព ឬប្រធានសាខារបស់អ្នក គឺជាអ្នកបម្រើពិតរបស់ព្រះអម្ចាស់ ។ អ្នកអាចពឹងផ្អែកលើលោកសម្រាប់ការណែនាំ នៅពេលដែលអ្នកស្វែងរកការបំផុសគំនិត ពីព្រះវិញ្ញាណបរិសុទ្ធ និងពីព្រះគម្ពីរ ។ អ្នកត្រូវតែយល់ថា ប៊ីស្សពនៅទីនោះដើម្បីជួយ ហើយថាលោកត្រូវបានដឹកនាំដោយព្រះ ។
ស្តានីស្លវ អរ អាយុ 19 ឆ្នាំ មកពីទីក្រុងដូនេស ប្រទេស អ៊ុយក្រែន
សូមចងចាំថា លោកស្រឡាញ់អ្នក
បើអ្នកមានអ្វីដែលអ្នកពិតជាចង់ពិភាក្សាជាមួយនឹងប៊ីស្សព វាប្រហែលជាងាយស្រួលជាង ដោយជជែកជាមួយលោក អំពីសាលារៀន និងរឿងទូទៅជាមុនសិន ។ បើអ្នកភ័យខ្លាច ដោយសារអ្នកត្រូវការនិយាយនឹងលោកអំពីបញ្ហាការកែប្រែចិត្ត សូមគ្រាន់តែចងចាំថាលោកស្រឡាញ់អ្នក ។ អ្នកមិនត្រូវភ័យខ្លាចអំពីអ្វីដែលលោកនឹងគិតពីអ្នកឡើយ ព្រោះថាមូលហេតុអ្វីបានជាលោកមើលងាយអ្នក ចំពោះការចង់ខិតទៅជិតព្រះគ្រីស្ទកាន់តែខ្លាំងនោះ ?
អាស្លី ឌី អាយុ 17 ឆ្នាំ រដ្ឋអារីហ្សូណា ស.រ.អា
អធិស្ឋានដើម្បីឲ្យបានដឹង
សូមសួរខ្លួនឯងថា ហេតុអ្វីបានជាអ្នកមានអារម្មណ៍មិនកក់ក្តៅក្នុងការនិយាយទៅកាន់ប៊ីស្សព ។ តើអ្នកគិតថាលោកនឹងមិនអាចជួយអ្នកដោះស្រាយបញ្ហារបស់អ្នកឬ ? អធិស្ឋានដើម្បីឲ្យបានដឹងថា ប៊ីស្សពស្រឡាញ់អ្នក ហើយត្រូវបានហៅឲ្យជួយអ្នក ។
អាដាម អេច អាយុ 13 ឆ្នាំ រដ្ឋ កាលីហ្វូញ៉ា ស.រ.អា
ទោះបីជាអ្នកធ្វើខុសក៏ដោយ
វាអាចមានការពិបាក និងខ្មាសអៀន ដើម្បីសារភាពនូវអ្វីៗទាំងឡាយទៅកាន់ប៊ីស្សពរបស់អ្នក ប៉ុន្តែពេលអ្នកដើរចេញពីការិយាល័យនោះ អ្នកនឹងមានអារម្មណ៍ធូរស្រាល ហើយអ្នកនឹងដឹងថាព្រះវរបិតាសួគ៌ស្រឡាញ់អ្នក ។ ទ្រង់ចង់ឲ្យអ្នកបានរីករាយ ទោះបីជាអ្នកធ្វើខុសក៏ដោយ ។
អាមែនដា ដឹបបលយូ អាយុ 16 ឆ្នាំ យូថាហ៍ សហរដ្ឋ ស.រ.អា
លោកនៅទីនេះដើម្បីជួយ
ប៊ីស្សពគឺជាអ្នកគង្វាលក្នុងវួដរបស់អ្នក ។ សូមចងចាំថា លោកនឹងព្យាយាមឲ្យអស់ពីសមត្ថភាព ដើម្បីជួយអ្នក ហើយលោកមានអំណាចនៃព្រះទ្រទ្រង់លោក ។ អ្នកអាចអធិស្ឋានទៅព្រះវរបិតា សុំកម្លាំង និងភាពក្លាហាន ដើម្បីអាចនិយាយទៅកាន់ប៊ីស្សពរបស់អ្នក ។ នៅទីបញ្ចប់ អ្នកនឹងរីករាយដែលអ្នកបានទៅរកលោក — ហើយវានឹងសមថ្លៃនឹងការខិតខំនោះ ។
សេមួល អេច អាយុ 14 ឆ្នាំ មកពីរដ្ឋអៃដាហូ ប្រទេសស.រ.អា