សារលិខិតបង្រៀនសួរសុខទុក្ខ
ក្រុមគ្រួសារត្រូវបានតែងតាំងឡើងដោយព្រះ
សូមសិក្សាអត្ថបទនេះប្រកបដោយការអធិស្ឋាន និងស្វែងរកការបំផុសគំនិត ដើម្បីដឹងពីអ្វីដែលត្រូវចែកចាយ ។ តើការយល់ដឹងពី « ក្រុមគ្រួសារ ៖ ការប្រកាសដល់ពិភពលោក » បង្កើនជំនឿរបស់អ្នកទៅលើព្រះ ហើយប្រទានពរដល់អ្នកទាំងឡាយដែលអ្នកថែទាំតាមរយៈការបង្រៀនសួរសុខទុក្ខយ៉ាងដូចម្តេច ? សម្រាប់ព័ត៌មានបន្ថែម សូមចូលទៅកាន់គេហទំព័រ reliefsociety.lds.org ។
សេចក្ដីជំនឿ ក្រុមគ្រួសារ ការសង្គ្រោះ
រូបថតពីខាងមុខព្រះវិហារបរិសុទ្ធ ប៊ុយណូហ្សែ អាហ្សង់ទីន
ខារ៉ូល អិម ស្ទេហ្វិន ទីប្រឹក្សាទីមួយក្នុងគណៈប្រធានសមាគមសង្គ្រោះទូទៅបានមានប្រសាសន៍ថា « នៅក្នុងទំនុកបទរបស់ [ ចម្រៀងថ្នាក់កុមារ ] ‹ ក្រុមគ្រួសារគឺមកពីព្រះ › …យើងត្រូវបានរំឭកពីគោលលទ្ធិដ៏បរិសុទ្ធ ។ យើងពុំត្រឹមតែបានដឹងថា ក្រុមគ្រួសារគឺមកពីព្រះប៉ុណ្ណោះទេ យើងក៏ដឹងផងដែរថា យើងម្នាក់ៗគឺជាផ្នែកនៃក្រុមគ្រួសាររបស់ព្រះ ។ …
ផែនការរបស់ព្រះវរបិតាសម្រាប់កូនចៅទ្រង់ គឺជាផែនការនៃសេចក្ដីស្រឡាញ់ ។ វាជាផែនការដែលរួបរួមកូនចៅរបស់ទ្រង់—ដែលជាក្រុមគ្រួសារទ្រង់—ជាមួយទ្រង់ » ។១
អែលឌើរ អិល ថម ភែរី ( ឆ្នាំ ១៩២២–២០១៥ ) ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ថា ៖ « យើងក៏ជឿដែរថា ស្របតាមទំនៀមទម្លាប់ដ៏រឹងមាំគ្រួសារ មិនត្រឹមតែជាស្ថាប័នគ្រឹះនៃសង្គម សេដ្ឋកិច្ច និង វប្បធម៌មួយដែលមានស្ថេរភាពខាងគុណតម្លៃប៉ុណ្ណោះទេ—ប៉ុន្តែក្រុមគ្រួសារក៏ជាស្ថាប័នគ្រឹះនៃភាពអស់កល្ប និង នៃនគរ និង រដ្ឋាភិបាលរបស់ព្រះផងដែរ ។
យើងជឿថា អង្គភាព និង រដ្ឋាភិបាលនៃស្ថានសួគ៌ នឹងត្រូវបានស្ថាបនាឡើងជុំវិញគ្រួសារ និង សាច់ញាតិទាំងឡាយ » ។២
បូនី អិល អូស្ការសុន ជាប្រធានយុវនារីទូទៅបានមានប្រសាសន៍ថា ៖ « មនុស្សគ្រប់គ្នា មិនថាមានស្ថានភាពអាពាហ៍ពិពាហ៍យ៉ាងណា ឬ មានកូនប៉ុន្មានទេ អាចធ្វើជាអ្នកការពារផែនការរបស់ព្រះអម្ចាស់ ដែលបានពិពណ៌នានៅក្នុងសេចក្ដីប្រកាសអំពីគ្រួសារបាន ។ ប្រសិនបើវាគឺជាផែនការរបស់ព្រះអម្ចាស់ វាគួរតែជាផែនការរបស់យើងដែរ ! »៣
បទគម្ពីរបន្ថែម
គោលលទ្ធិអំពីគ្រួសារ
ស៊ិស្ទើរ ជូលី ប៊ី ប៊េក អតីតប្រធានសមាគមសង្គ្រោះទូទៅបានបង្រៀនថា សាសនាវិទ្យាមួយអំពីគ្រួសារ គឺវាផ្អែកទៅលើការបង្កបង្កើត ការធ្លាក់ និងដង្វាយធួនរបស់ព្រះយេស៊ូវគ្រីស្ទ ៖
« ការបង្កើតផែនដី បានផ្ដល់នូវកន្លែងមួយដែលក្រុមគ្រួសារអាចរស់នៅបាន ។ ព្រះបានបង្កើតបុរស និងស្ដ្រីដែលជាធាតុដ៏សំខាន់ពីររួមបញ្ចូលគ្នានៃគ្រួសារមួយ ។ វាគឺជាផ្នែកមួយនៃផែនការរបស់ព្រះវរបិតាសួគ៌ដែលថាអ័ដាម និងអេវ៉ា ត្រូវបានផ្សារភ្ជាប់ និងបង្កើតជាក្រុមគ្រួសារដ៏អស់កល្បមួយ ។
… ការធ្លាក់បានធ្វើឲ្យពួកគាត់មានលទ្ធភាព ដើម្បីមានកូនប្រុស និងកូនស្រីទាំងឡាយ ។
ដង្វាយធួនរបស់ [ ព្រះគ្រីស្ទ ] អនុញ្ញាតឲ្យគ្រួសារត្រូវបានផ្សារភ្ជាប់ជាមួយគ្នាដ៏អស់កល្បជានិច្ច ។ វាអនុញ្ញាតឲ្យគ្រួសារទាំងឡាយ មានការរីកចម្រើន និងមានភាពឥតខ្ចោះអស់កល្បជានិច្ច ។ ផែនការនៃសុភមង្គល ដែលត្រូវបានហៅថាជាផែនការនៃសេចក្ដីសង្គ្រោះផងដែរ គឺជាផែនការមួយដែលបានបង្កើតឡើងសម្រាប់ក្រុមគ្រួសារ ។ …
… នេះគឺជាគោលលទ្ធិរបស់ព្រះគ្រីស្ទ ។ … ប្រសិនបើគ្មានក្រុមគ្រួសារ នោះគ្មានផែនការ គ្មានហេតុផលសម្រាប់ជីវិតរមែងស្លាប់នេះឡើយ » ។៤