អព្ភូតហេតុនៃ កំដៅភ្លើងមធ្យម
តើអ្នកចង់បានវាឥឡូវនេះ—ឬ អ្នកចង់បានវាក្នុងលក្ខណៈត្រឹមត្រូវ ?
សូមស្រមៃថា មានយុវជនម្នាក់នៅផ្ទះតែម្នាក់ឯង ហើយកំពុងឃ្លានអាហារ ( វាដូចជាមិនទំនងជាបែបនេះឡើយ ប៉ុន្តែសូមសាកល្បងស្រមៃពីទិដ្ឋភាពនោះ ) ។ ឥឡូវនេះសូមស្រមៃថា យុវជនរូបនេះសម្រេចចិត្តសាកល្បងធ្វើ នំបុ័ងសាំងវ៉ិចឈីសអាំង ដោយខ្លួនគាត់ផ្ទាល់លើកដំបូង ។១ សូមគិតស្រមៃថា ឪពុកម្តាយយុវជននេះពុំធ្លាប់បង្រៀនគាត់ ពីរបៀបធ្វើឈីសអាំងនេះ ហើយថាគាត់ពុំធ្លាប់មើលឪពុកម្តាយខ្លួនជិតដិតឡើយ នៅពេលពួកគាត់ធ្វើនំនោះ ។
សូមស្រមៃថា ទោះបីជាយុវជននោះមានគ្រឿងផ្សំទាំងអស់ត្រឹមត្រូវក្តី ៖ នំបុ័ង ឈីស ប័របន្តិចនៅលើនំបុ័ង ( ហើយមានម៉ាយ៉ាណេសបន្តិចនៅក្នុងនោះ ដោយសារគាត់ប៉ិនប្រសប់ ) ។ បន្ទាប់មក គាត់បានយកខ្ទះមក ហើយដាក់លើចង្ក្រាន។ ( យើងក៏ស្រមៃថា គាត់គ្មានខ្ទះសំប៉ែតពិសេស ឬ ឧបករណ៍ផ្សេងទៀតដើម្បីធ្វើនំនេះទេ ) ។
ឥឡូវនេះសូមស្រមៃថា គាត់មានគំនិតមួយ—ជាគំនិតមួយដែលមនុស្សជាច្រើនបានព្រងើយកន្តើយនឹងវា ( ឬ ធ្វេសប្រហែស ) គិតដូចនេះ ៖ « ប្រសិនបើខ្ញុំបើកកំដៅឡើងខ្លាំង នំនោះនឹងឆាប់ឆ្អិនលឿន » ។
សូមស្រមៃថាតើមានអ្វីកើតឡើងបន្ទាប់មកទៀត ។ ( ឬ ប្រហែលជាអ្នកពុំចាំបាច់ស្រមៃនោះទេ ) ។
គាត់នឹងបាននំបុ័ងដែលស្រួយខ្លាំង ពណ៌លឿងខ្លាំងដូចមាស ឬ នំប៉័ងដែលស្អិតខ្លាំង ឈីសរលាយអស់—ប៉ុន្តែមិនបាននំបុ័ងទាំងពីរបែបនេះទេ ។ ទំនងបំផុតគឺគាត់នឹងបាននំបុ័ងដែលមើលឃើញ ឬ ស្ទាប ( ហើយប្រហែលជាភ្លក់ ) ដូចជាថ្មកម្អែលភ្នំភ្លើង ហើយមានឈីសរលាយពាក់កណ្តាល ដែលមើលទៅដូចជា មិនទាក់ចិត្តសោះ ។
ដូចអ្នកឃើញហើយថា បញ្ហារបស់គាត់នោះគឺកើតមកពីភាពល្ងង់ខ្លៅ ( ដែលអាចជាការដោះសារបាន ) និង ការគ្មានក្តីអត់ធ្មត់ ( ដែលទោះបីជាអាចយល់បាន ក៏ពិបាកនឹងដោះសារ ) ។ ប្រសិនបើគាត់ប្រព្រឹត្តកំហុសនេះដដែលនៅពេលក្រោយទៀត ទោះបីវាអាចដោះសារបានតិចតួចក្តី នោះមិនអាចបន្ទោសទៅលើភាពល្ងង់ខ្លៅឡើយ ប៉ុន្តែវាកើតឡើងទាំងស្រុងមកពីការគ្មានក្តីអត់ធ្មត់ ។
ដើម្បីធ្វើឲ្យបានត្រឹមត្រូវនោះ គាត់ត្រូវស្វែងយល់ពីអព្ភូតហេតុនៃកំដៅភ្លើងមធ្យម ។
មធ្យមមិនមែនធុញទ្រាន់ទេ
ការដាក់កំដៅភ្លើងចង្ក្រានមធ្យម គឺល្អបំផុតសម្រាប់នំបុ័ងឈីសអាំង និង ម្ហូបជាច្រើនមុខផ្សេងទៀត ដោយសារវាធ្វើឲ្យអាហារឆ្អិនបានល្អ ដោយគ្មានខ្លោចពីខាងក្រៅឡើយ ។ គុណវិបត្តិតែមួយគត់នោះគឺថា វាត្រូវការពេលច្រើន ការផ្ចិតផ្ចង់ ដែលតម្រូវឲ្យមាន ការអត់ធ្មត់ ។
ព្រះអម្ចាស់បានមានបន្ទូលថា « ចូរស៊ូនៅក្នុងសេចក្ដីអត់ធន់ចុះ រហូតដល់អ្នករាល់គ្នាបានល្អឥតខ្ចោះ » (គ. និង ស. ៦៧:១៣) ។ ទ្រង់មានបន្ទូលត្រង់នេះអំពីភាពល្អឥតខ្ចោះមួយ ដែលល្អលើសជាងការធ្វើនំបុ័ងសាំងវ៉ិចឈីសអាំង ទ្រង់មានព្រះទ័យឲ្យយើងប្រែក្លាយឲ្យកាន់តែដូចទ្រង់ ។ ព្រះយេស៊ូវគ្រីស្ទគឺជាគំរូដ៏អស្ចារ្យបំផុតនៃការអត់ធ្មត់ ។ ហើយផ្នែកមួយនៃការធ្វើតាមគំរូរបស់ទ្រង់ មានន័យថាពង្រីកទស្សនវិស័យរបស់យើង ដោយមើលអ្វីៗឲ្យបានវែងឆ្ងាយ ហើយមើលឃើញពីរង្វាន់ដ៏មហិមា ដែលកើតមកពីការដាក់វិន័យផ្ទាល់ខ្លួន សេចក្តីជំនឿ ការគោរពប្រតិបត្តិ កិច្ចខិតខំយ៉ាងខ្ជាប់ខ្ជួន និង ជាប់លាប់ ការអត់ធ្មត់ និង សេចក្តីស្រឡាញ់—និយាយម្យ៉ាងទៀតថា មានអំណត់ ។
តាមនិយមន័យ ការអត់ធ្មត់បង្ហាញឲ្យឃើញពីការរង់ចាំ ដែលស្ដាប់ទៅវាដូចជាគួរឲ្យធុញទ្រាន់ណាស់ ប៉ុន្តែដូចប្រធាន ឌៀថើរ អេស្វ អុជដូហ្វ ទីប្រឹក្សាទីពីរក្នុងគណៈប្រធានទីមួយបានបង្រៀនយើងថា វាលើសពីរង់ចាំទៅទៀត « ការអត់ធ្មត់មានន័យថារង់ចាំ និង ស៊ូទ្រាំដោយសកម្ម ។ វាមានន័យថា ទ្រាំទ្រនឹងអ្វីមួយ ហើយធ្វើឲ្យអស់ពីសមត្ថភាព—ដោយខិតខំ សង្ឃឹម ហើយអនុវត្តសេចក្ដីជំនឿ ទទួលបន្ទុកដោយអត់ធន់ ទោះជាបំណងក្នុងចិត្តយើងត្រូវបានពន្យារពេលក៏ដោយ ។ ការអត់ធ្មត់ពុំគ្រាន់តែជាការស៊ូទ្រាំធម្មតានោះទេ វាគឺជាការស៊ូទ្រាំបានយ៉ាងល្អ ! »២
វាមិនដូចជាជាដាក់នំបុ័ងសាំងវ៉ិចអាំងនៅលើខ្ទះ ហើយភ្លេចវានោះឡើយ វាគឺជាការមើលវា ហើយប្រែវាតាមពេលត្រឹមត្រូវ ។
វាមិនមែនគ្រាន់តែជាការរៀននៅសាលា ឬ ថ្នាក់សិក្ខាសាលា ឬ ព្រះវិហារនោះទេ វាគឺជាការរៀនសូត្រ ឬ ការថ្វាយបង្គំយ៉ាងសកម្ម ។
វាមិនមែនជាការរង់ចាំទីបន្ទាល់មួយអំពីព្រះគម្ពីរមរមន ដែលត្រូវប្រទានដល់អ្នក ដោយសារអ្នកបានសុំនោះឡើយ វាគឺជាការបន្តអាន សិក្សា ពិចារណា អធិស្ឋាន និង ការរស់នៅតាមព្រះសិក្ខាបទនៃព្រះគម្ពីរនោះ ។
វាមិនមែនជាការអង្គុយនៅទីនោះ ខណៈដែលមិត្តភក្តិរបស់អ្នកសើចចំអកអំពីជំនឿរបស់អ្នកឡើយ វាគឺជាការអធិស្ឋានសម្រាប់ពួកគេ ហើយពិតជាចង់ឲ្យពួកគេមានការផ្លាស់ប្តូរចិត្ត ហើយធ្វើឲ្យអស់ពីសមត្ថភាពដើម្បីសម្រេចបានកិច្ចការនោះ ។
វាមិនមែនគ្រាន់តែជាការរង់ចាំរហូតដល់អាយុ ១៦ ឆ្នាំ ដើម្បីដើរលេងជាគូឡើយ វាគឺជាការរៀនស្រឡាញ់ គោរពប្រតិបត្តិ និង ការព្យាយាមយល់ថា តើការធ្វើតាមការទូន្មានរបស់ព្យាការីនឹងប្រទានពរដល់អ្នកខ្លាំងប៉ុណ្ណា ។
បន្ថយកំដៅ
ការអត់ធ្មត់ និង ការចេះទប់ចិត្ត ឬ ការគ្រប់គ្រងខ្លួនឯង គឺជាផ្នែកនៃ « ផលផ្លែនៃព្រះវិញ្ញាណ » ( សូមមើល កាឡាទី ៥:២២–២៣ ) ។ ទោះបីមានរឿងបន្ទាន់នានាដែលតម្រូវឲ្យចាត់វិធានការណ៍ ឬ ឆ្លើយតបឲ្យបានភ្លាមៗក្តី ( គឺដូចជាអាហារមួយចំនួនដែលត្រូវការកំដៅភ្លើងខ្លាំង ) នោះអ្នកគប្បីឃើញថា អ្នកបង្កើននូវការអត់ធ្មត់ និង ការគ្រប់គ្រងខ្លួនឯងបានកាន់តែប្រសើរឡើង ។ ប្រសិនបើអ្នកមានអារម្មណ៍នោះកើតឡើង វាគឺជាសញ្ញាមួយថា ព្រះវិញ្ញាណកំពុងមាននៅក្នុងជីវិតអ្នក ។
អព្ភូតហេតុនៃកំដៅភ្លើងមធ្យម អាចផ្តល់នូវនំបុ័ងសាំងវ៉ិចឈីសអាំងដ៏ឈ្ងុយឆ្ងាញ់ នំប៊ើហ្គើរដែលមើលទៅមិនដូចជាដុំកៅស៊ូដែលមានសាច់ពណ៌ផ្កាឈូកនៅចំកណ្តាល ដំឡូងឈូសឈ្ងុយឆ្ងាញ់មិនមែនដំឡូងឈូសខ្លោចឡើយ ហើយជាបាយដែលទន់ត្រសុស មិនមែនរឹងពិបាកទំពារឡើយ ។ ប៉ុន្តែការអត់ធ្មត់នឹង « ធ្វើការឲ្យសម្រេចពេញលេញ » ( យ៉ាកុប ១:៤ ) នៅក្នុងជីវិតរបស់អ្នក ដោយជួយអ្នកឲ្យឈានទៅមុខ ដើម្បីប្រែក្លាយឲ្យកាន់តែដូចជាព្រះយេស៊ូវគ្រីស្ទ ដោយនាំព្រះចេស្តានៃព្រះវិញ្ញាណបរិសុទ្ធ ហើយសំខាន់បំផុតជួយដឹកនាំអ្នកទៅកាន់ជីវិតដ៏នៅអស់កល្បជានិច្ច ។
នៅពេលអ្នកកត់សម្គាល់ពីអ្វីៗដែលបណ្តាលឲ្យអ្នកគ្មានភាពអត់ធ្មត់ សូមគិតពីនំបុ័ងសាំងវ៉ិចឈីសអាំងនោះ ( ឬ អាហារណាផ្សេងទៀតក៏ដោយ ) និង អ្វីដែលអ្នកអាចលះបង់ ដោយទុកឲ្យភាពគ្មានការអត់ធ្មត់នេះដឹកនាំទង្វើអ្នក ។ ប្រសិនបើអ្នកធ្វើខុសដោយធ្លាក់ក្នុងភាពគ្មានអត់ធ្មត់ញឹកញាប់ នោះអ្នកគួរដឹងថាមនុស្សជាច្រើនក៏ដូច្នោះដែរ ។ អ្នកអាចប្រែចិត្ត ហើយព្យាយាមធ្វើតាមគំរូ និង ការបង្រៀនរបស់ព្រះយេស៊ូវគ្រីស្ទ ។ មាននំបុ័ងសាំងវ៉ិចឈីសអាំងជាច្រើនដែលត្រូវធ្វើ ហើយវាមិនយឺតពេលឡើយ ដើម្បីរៀនអំពីភាពគ្រប់លក្ខណ៍ដែលកើតឡើងតាមរយៈការអត់ធ្មត់នោះ ។