ការយល់ដឹងអំពី ពររបស់លោកអយ្យកោរបស់អ្នក
អ្នកនិពន្ធរស់នៅរដ្ឋ អិលលីណោយ ស.រ.អា. និង នូវ យ៉ោក ស.រ.អា. ។
ការស្គាល់ពីផ្នែកនានានៃពរជ័យរបស់អ្នក អាចជួយអ្នកឲ្យរកឃើញការដឹកនាំនៅក្នុងជីវិតរបស់អ្នក ។
Man in maze © Digital Vision Vections/Getty Images
ជីវិតនេះពោរពេញទៅដោយការសម្រេចចិត្ត ៖ តើខ្ញុំគួរតែចូលរៀនសាលាណាមួយ ? តើខ្ញុំគួរតែសិក្សាមុខវិជ្ជាអ្វី ? តើខ្ញុំគួរបម្រើបេសកកម្មឬទេ ? តើខ្ញុំគួររៀបការជាមួយនរណា ? ប្រសិនបើគេឲ្យផែនទីផ្ទាល់ខ្លួនមួយដល់អ្នក ដើម្បីស្វែងរកការសម្រេចចិត្តនានាអំពីជីវិតនេះ តើអ្នកនឹងធ្វើតាមផែនទីនោះដែរឬទេ ?
ព្រះវរបិតាសួគ៌ និង ព្រះយេស៊ូវគ្រីស្ទ បានប្រទានផែនទីបែបនោះដល់យើង—គឺពររបស់លោកអយ្យកោ—ដើម្បីផ្តល់ការណែនាំដល់ជីវិតរបស់យើង ។ ទោះបីជាយើងត្រូវបានប្រទានឲ្យនូវអំណោយទាននៃសិទ្ធិជ្រើសរើស ដើម្បីធ្វើការសម្រេចចិត្តដោយសេរីដោយផ្ទាល់ខ្លួនក្តី ក៏ពររបស់លោកអយ្យកោ អាចផ្តល់ការយល់ដឹងអំពីផ្លូវនានា ដែលនឹងនាំសុភមង្គលដ៏មហិមាមកដល់យើង ។
ប៉ុន្តែការមានតែផែនទីតែមួយមុខនោះគឺពុំគ្រប់គ្រាន់ឡើយ ។ យើងត្រូវតែសិក្សា យល់ ហើយអនុវត្តអត្ថន័យនានាដែលមាននៅក្នុងផែនទីនោះ ។ ដូចគ្នានេះផងដែរ នៅពេលអ្នកយល់ច្បាស់អំពីពាក្យពេចន៍ ដែលបានប្រើនៅក្នុងពររបស់លោកអយ្យកោរបស់អ្នក—ជាមគ្គទេសក៍ផ្ទាល់ខ្លួនអំពីជីវិតរបស់អ្នក—នោះអ្នកអាចញែកដឹង ថាអ្នកជានរណា ហើយថាអ្នកនឹងក្លាយជាមនុស្សបែបណានៅក្នុងព្រះនេត្រនៃព្រះ ។
ការយល់ដឹងអំពីពូជពង្សរបស់អ្នក
ដំបូង ហើយសំខាន់បំផុត ពររបស់លោកអយ្យកោរបស់អ្នកប្រកាសអំពីពូជពង្សរបស់អ្នក ឬ បញ្ជាក់ប្រាប់ថាអ្នកនៅក្នុងកុលសម្ព័ន្ធជាក់លាក់ណាមួយ នៃកុលសម្ព័ន្ធទាំងដប់ពីររបស់យ៉ាកុប ( ដែលក្រោយមកត្រូវបានហៅថាជា អ៊ីស្រាអែល ) ។ ទោះបីជាយើងទាំងអស់គ្នាពុំមែនជាពូជអំបូរពិតប្រាកដរបស់យ៉ាកុបក្តី ព្រះគម្ពីរបង្រៀនយើងថា សមាជិកសាសនាចក្រគឺត្រូវបានយកមកចិញ្ចឹមនៅក្នុងវង្សអ៊ីស្រាអែល ៖ « ចំពោះមនុស្សជាច្រើនដែលទទួលដំណឹងល្អនេះ នោះនឹងត្រូវបានហៅតាមឈ្មោះអ្នក ហើយនឹងត្រូវបានរាប់ថាជាពូជអ្នក ហើយនឹងក្រោកឡើង ហើយជូនពរដល់អ្នកជាឪពុករបស់គេ » ( អ័ប្រាហាំ ២:១០ ) ។
ស្សែលីសា ស្គ្រូពែល មកពី រដ្ឋ យូថាហ៍ ស.រ.អា. និយាយថា « ការដឹងថាខ្ញុំមកពីវង្សនៃលោកយ៉ាកុប ជួយខ្ញុំឲ្យយល់អំពីគោលបំណងនៅក្នុងជីវិតនេះ និង មូលហេតុដែលខ្ញុំត្រូវបានហៅឲ្យបម្រើក្នុងមុខងារជាក់លាក់នានានៅក្នុងព្រះវិហារ » ។
ពររបស់លោកអយ្យកោរបស់អ្នកក៏ពិពណ៌នាអំពីពរជ័យដែលទាក់ទងនានា ដែលកើតមានមកជាមួយនឹងកុលសម្ព័ន្ធជាក់លាក់របស់អ្នក ។ ឧទាហរណ៍ សមាជិកសាសនាចក្រជាច្រើនគឺនៅក្នុងកុលសម្ព័ន្ធអេប្រាអិម ជាកុលសម្ព័ន្ធដែលមានការទទួលខុសត្រូវពិសេស ដើម្បីផ្សាយសារលិខិតនៃដំណឹងល្អដែលបានស្តារឡើងវិញដល់ពិភពលោក ( សូមមើល ចោទិយកថា ៣៣:១៣–១៧, គ. និង ស. ១៣៣:២៦–៣៤ ) ។
ស្វែងរកដំបូន្មានផ្ទាល់ខ្លួន
នៅពេលប្រើផែនទីបានត្រឹមត្រូវ នោះវាជួយឲ្យអ្នកធ្វើដំណើរមិនវង្វេងផ្លូវឡើយ ។ ស្រដៀងគ្នានេះដែរ នៅក្នុងដំណើរនៃជីវិតនេះ ពររបស់លោកអយ្យកោរបស់អ្នកអាចផ្តល់ដំបូន្មាន និង ការណែនាំដល់ជីវិតរបស់អ្នក ។ ពររបស់លោកអយ្យកោរបស់អ្នកពុំគ្រាន់តែប្រាប់អ្នកអំពីអ្វីដែលអ្នកត្រូវធ្វើឡើយ ប៉ុន្តែវាអាចផ្តល់ការយល់ដឹងផ្ទាល់ខ្លួនអំពីផ្លូវណាមួយ—ប្រសិនបើដើរដោយសេចក្តីជំនឿ—នោះអាចជួយអ្នកឲ្យដឹង ថានៅពេលណាដែលជីវិតរបស់អ្នកកំពុងធ្វើអ្វីៗស្របតាមព្រះឆន្ទៈរបស់ព្រះវរបិតាសួគ៌ ។ នៅពេលអ្នកសិក្សា ពររបស់លោកអយ្យកោរបស់អ្នក ហើយព្យាយាមរស់នៅក្នុងឥរិយាបថមួយដែលយាងព្រះវិញ្ញាណនៃព្រះអម្ចាស់ នោះអ្នកអាចរកឃើញនូវសុវត្ថិភាព អំណរ និង ការណែនាំ ។
ហ្គាព្រីយ៉ែល ប៉ារេឌេស មកពីទីក្រុង លីម៉ា ប្រទេសពេរ៉ូ និយាយថា« ដំបូន្មានមួយចំនួនដែលបានផ្តល់ដល់ខ្ញុំនៅក្នុងពរជ័យនោះ គឺថាខ្ញុំអាចអនុវត្តវាបានពេញលេញជាមួយគ្រួសារខ្ញុំ និង បន្ទាប់ពីខ្ញុំត្រូវបានផ្សារភ្ជាប់ជាមួយភរិយាខ្ញុំតែប៉ុណ្ណោះ ។
ថ្មីៗនេះយើងមានចម្ងល់ថា តើពួកយើងអាចធ្វើអ្វីខ្លះ ដើម្បីពង្រឹង និង កសាងគ្រួសារថ្មោងថ្មីរបស់យើង ។ យើងបានទទួលចម្លើយតាមរយៈពររបស់លោកអយ្យកោរបស់ខ្ញុំ ។ នៅក្នុងពរជ័យនោះ បានណែនាំខ្ញុំឲ្យផ្តល់អាទិភាពលើការគោរពគ្នា ការអត់ធ្មត់ និង មានសេចក្តីស្រឡាញ់នៅក្នុងគ្រួសារ ដោយសារនេះគឺជាគ្រឹះសំខាន់មួយចំនួននៃដំណឹងល្អរបស់ព្រះយេស៊ូវគ្រីស្ទ ។
« នៅពេលយើងបានផ្តោតចិត្តទុកដាក់លើរឿងនេះ ភរិយារបស់ខ្ញុំ និង ខ្ញុំបានយកឈ្នះលើបញ្ហានានា ។ យើងនៅតែមានឧបសគ្គម្តងម្កាល ជាគ្រួសារ ប៉ុន្តែយើងមានភាពរីករាយ ។ ខ្ញុំមានអារម្មណ៍ថា ព្រះអម្ចាស់កំពុងរំឭកខ្ញុំអំពីរបៀបដែលខ្ញុំអាចមានគ្រួសារ ដែលទ្រង់បានសន្យាដល់ខ្ញុំ ។ ខ្ញុំដឹងថា ព្រះអម្ចាស់មានបន្ទូលតាមរយៈ ពររបស់លោកអយ្យកោ ហើយថាដំបូន្មាននៅក្នុងពរជ័យនោះគឺត្រូវបានប្រើប្រាស់នៅក្នុងជីវិតរបស់យើង » ។
សូមស្តាប់តាមការព្រមាន
ផែនទីនឹងពុំគូសបង្ហាញអំពីគ្រោះថ្នាក់ទាំងអស់ ដែលនៅតាមផ្លូវដោយស្វ័យប្រវត្តិនោះទេ ប៉ុន្តែសំណាងណាស់ ជារឿយៗ ពររបស់លោកអយ្យកោប្រាប់អំពីការព្រមាននានា ដើម្បីការពារយើងនៅតាមផ្លូវនោះ ។ ការព្រមានទាំងនេះ ជួយការពារយើងពីឥទ្ធិពលរបស់សាតាំង ការព្រមានផ្សេងទៀតអាចបំភ្លឺយើងអំពីរបៀបដែលយើងអាចយកឈ្នះលើភាពខាងសាច់ឈាមដែលមាននៅក្នុងខ្លួនយើង ។
សម្រាប់ ខាធ្លីន ខារ មកពីរដ្ឋ យូថាហ៍ ការព្រមានមួយចំនួននៅក្នុងពររបស់លោកអយ្យកោរបស់នាង ពុំមានភាពច្បាស់លាស់ភ្លាមៗសម្រាប់នាងឡើយ ប៉ុន្តែក្រោយពីការសិក្សាអំពីពរជ័យរបស់ខ្លួន នោះនាងទទួលបានការយល់ដឹងថ្មី ។
« ពេលខ្ញុំបានទទួល ពររបស់លោកអយ្យកោ ខ្ញុំត្រូវបានព្រមានអំពីមនុស្សដែលព្យាយាម និង ទាក់ទាញខ្ញុំឲ្យចេញពីសេចក្តីពិតដោយការនិយាយអ្វីៗដែលផ្គាប់ចិត្តខ្ញុំ ។ ខ្ញុំពុំបានគិតច្រើនអំពីរឿងនោះឡើយ ខ្ញុំមានជំនឿរឹងមាំលើគោលលទ្ធិដែលបានបង្រៀនដល់ខ្ញុំ ។
« ប៉ុន្តែ នៅឆ្នាំបន្ទាប់មកនោះ ដំបូងខ្ញុំបានជួបគំនិត និង ទស្សនៈដែលហាក់បីដូចជាបានផ្តោតទៅលើភាពយុត្តិធម៌ និង សេចក្តីស្រឡាញ់ ប៉ុន្តែតាមពិតទៅវាមិនដូច្នោះទេ ។ គំនិត និងទស្សនៈទាំងនេះហាក់បីដូចជាមកពីគ្រប់ទិសទី ៖ ប្រព័ន្ធផ្សព្វផ្សាយ សាលារៀន សូម្បីតែមិត្តភក្តិស្និទ្ធស្នាល ។ ទោះបីជាយ៉ាងណាក្តី ខ្ញុំបានដឹងថាទស្សនៈទាំងនេះ ផ្ទុយទៅនឹងផែនការរបស់ព្រះ ខ្ញុំបានឃើញថា ខ្ញុំចង់គាំទ្រទាំងគំនិតថ្មីបែបលោកិយទាំងនេះ និង សាសនាចក្រ ។ មិនយូរប៉ុន្មានក្រោយមក ខ្ញុំបានដឹងថា ‹ គ្មានអ្នកណាអាចនឹងបម្រើចៅហ្វាយពីរនាក់បានទេ › ( ម៉ាថាយ ៦:២៤ ) ហើយថាខ្ញុំពុំគួរពឹងផ្អែកលើប្រាជ្ញារបស់មនុស្សឡើយ ។ ព្រះវរបិតាសួគ៌បានដោះស្រាយចម្ងល់របស់ខ្ញុំ តាមរយៈព្រះគម្ពីរ និងមានបន្ទូលនាំភាពសុខសាន្តមកក្នុងគំនិត និងដួងចិត្តរបស់ខ្ញុំ ។ ជាលទ្ធផល ទីបន្ទាល់របស់ខ្ញុំបានប្រែជារឹងមាំ ហើយខ្ញុំបានប្រែកាន់តែរឹងប៉ឹង នៅក្នុងការការពារនូវអ្វីដែលខ្ញុំដឹងថាជាការពិត » ។
ការអភិវឌ្ឍអំណោយទាន និងទេពកោសល្យ
ពររបស់លោកអយ្យកោរបស់អ្នកក៏ប្រាប់អ្នកអំពីអំណោយទានខាងវិញ្ញាណ និង ទេពកោសល្យ ដែលព្រះអម្ចាស់បានប្រទានឲ្យអ្នក ដើម្បីកសាងនគររបស់ទ្រង់ ។ ប្រសិនបើពរជ័យរបស់អ្នកប្រាប់អំពីទេពកោសល្យ ដែលអ្នកមិនស្គាល់ នោះអាចមកពីអ្នកពុំទាន់មានឱកាសរកឃើញ ឬ អភិវឌ្ឍទេពកោសល្យនោះ ។ អ្នកអាចប្រើ និង ធ្វើឲ្យទេពកោសល្យនេះ និង ទេពកោសល្យជាច្រើនផ្សេងទៀតរីកចម្រើនបាន តាមរយៈការស្វែងរក និងសូមជំនួយពីព្រះអម្ចាស់ដោយឧស្សាហ៍ព្យាយាម ។
ការអភិវឌ្ឍទេពកោសល្យ ជួយអ្នកឲ្យទទួលស្គាល់អ្វីៗដែលពិសេស ដែលអ្នកអាចរួមចំណែកក្នុងកិច្ចការរបស់ព្រះអម្ចាស់ ។ ចូហាន់ណា ប្លេកវែល មកពី រដ្ឋ កាលីហ្វូញ៉ា ស.រ.អា. ពិចារណាអំពីអំណោយទាន និងទេពកោសល្យនានានៅក្នុងពរជ័យរបស់នាង ពេលនាងមានអារម្មណ៍ថាត្រូវបានល្បួងឲ្យប្រៀបធៀបខ្លួននាងជាមួយមនុស្សដទៃទៀត ៖ « នៅពេលខ្ញុំអាន ពាក្យពេចន៍ទាំងនោះនៅក្នុងពររបស់លោកអយ្យកោរបស់ខ្ញុំ វារំឭកខ្ញុំថា ខ្ញុំត្រូវបានប្រទានពរឲ្យមានអំណោយទាន ដែលខ្ញុំត្រូវការចាំបាច់ផ្ទាល់ខ្លួនខ្ញុំ ដើម្បីយកឈ្នះលើការសាកល្បង និង ការចូលរួមនៅក្នុងការពន្លឿនកិច្ចការរបស់ព្រះអម្ចាស់ ។
ពរជ័យរបស់ខ្ញុំប្រាប់ខ្ញុំអំពីសមត្ថភាពរបស់ខ្ញុំ ឲ្យស្រឡាញ់ អភ័យទោស និង មានចិត្តក្លាហានដើម្បីប្រាស្រ័យទាក់ទងជាមួយអ្នកនៅជុំវិញខ្ញុំ ។ នៅពេលខ្ញុំបានអនុវត្តតាមអំណោយទានទាំងនេះ ព្រះអម្ចាស់បានប្រទានពរដល់ខ្ញុំ ឲ្យមានបំណងប្រាថ្នាកាន់តែខ្លាំង ដើម្បីប្រឈមមុខ និង ទាក់ទងជាមួយមនុស្ស និង វប្បធម៌ថ្មីៗ ។ ជាលទ្ធផល ទីបន្ទាល់របស់ខ្ញុំបានកើនឡើងថា យើងទាំងអស់គ្នាគឺជាកូនចៅរបស់ព្រះវរបិតាសួគ៌ដែលពេញដោយក្តីស្រឡាញ់ ហើយខ្ញុំអាចបម្រើអ្នកដទៃ ពេលយើងម្នាក់ៗព្យាយាមក្លាយឲ្យដូចជាព្រះគ្រីស្ទ » ។
ស្វែងរកពរជ័យដែលបានសន្យា
ជាចុងក្រោយ ពររបស់លោកអយ្យកោរបស់យើងបើកបង្ហាញអំពីពរជ័យដែលបានសន្យារបស់ព្រះវរបិតាសួគ៌ដល់យើង ប្រសិនបើយើងនៅបន្តស្មោះត្រង់ចំពោះទ្រង់ ។ គ្មានការធានាថា តើការសន្យាទាំងនេះនឹងត្រូវបានបំពេញនៅពេលណានោះទេ ប៉ុន្តែយើងអាចដឹង ដរាបណាយើងរស់នៅដោយគោរពប្រតិបត្តិតាមដំណឹងល្អ នោះការសន្យាទាំងនោះនឹងត្រូវបានបំពេញ ទោះបីជានៅក្នុងជីវិតនេះ ឬ នៅជីវិតបន្ទាប់ទៀតក្តី ។
សើជីអូ ហ្គូធារ៉េស មកពីរដ្ឋ ណាវ៉ាដា ស.រ.អា. ពឹងផ្អែកលើការសន្យាដែលមាននៅក្នុង ពររបស់លោកអយ្យកោរបស់គាត់ នៅពេលគាត់មានអារម្មណ៍ភ័យព្រួយអំពីផែនការក្នុងវិជ្ជាជីវៈនាពេលអនាគតរបស់គាត់ ៖ « នៅពេលណា ខ្ញុំមានអារម្មណ៍ស្មុគស្មាញអំពីភាពមិនប្រាកដប្រាជាអំពីអនាគតខ្ញុំ នោះមានពរជ័យមួយនៅក្នុងពររបស់លោកអយ្យកោ ដែលបានលួងលោមចិត្តខ្ញុំឲ្យមានភាពសុខសាន្តជានិច្ច ។ ការសន្យានេះជួយខ្ញុំឲ្យដឹងថា ដរាបណាខ្ញុំខិតខំ ហើយបន្តស្មោះត្រង់ នោះខ្ញុំនឹងមានធនធានចាំបាច់នានាដែលអាចមើលថែដល់គ្រួសាររបស់ខ្ញុំ និង ដើម្បីកសាងសាសនាចក្រ ។ ខ្ញុំពុំដឹងពិតប្រាកដនៅឡើយទេថា តើវិជ្ជាជីវៈណាមួយដែលខ្ញុំចង់ធ្វើនោះទេ ប៉ុន្តែការមានការសន្យានេះ ជួយខ្ញុំឲ្យមានជំនឿ និង ទំនុកចិត្ត » ។
ប្រសិនបើអ្នកធ្លាប់ឆ្ងល់ថា តើព្រះវរបិតាសួគ៌មានព្រះទ័យយ៉ាងណាខ្លះចំពោះអ្នក នោះអ្នកមិននៅឯកោឡើយ ។ ព្រះអម្ចាស់បានជ្រាបដឹងថា អ្នកនឹងជួបនូវជម្រើសផ្សេងៗជាច្រើនដែលអ្នកអាចចាប់យកនៅក្នុងជីវិតនេះ ដូច្នោះទ្រង់បានប្រទានផែនទីផ្ទាល់ខ្លួនមួយដល់អ្នក ដើម្បីរក្សាជីវិតអ្នកឲ្យស្របទៅនឹងដំណឹងល្អរបស់ទ្រង់ ។ ពររបស់លោកអយ្យកោពុំអាចធ្វើការសម្រេចចិត្តឲ្យយើងឡើយ ប៉ុន្តែពរជ័យនេះអាចនាំយើងទៅរកវិវរណៈផ្ទាល់ខ្លួន ។ តាមរយៈពររបស់លោកអយ្យកោរបស់យើង នោះយើងត្រូវបានបង្ហាញអំពីរបៀប ដែលយើងគឺជាផ្នែកមួយនៃផែនការរបស់ព្រះអម្ចាស់ ដើម្បីប្រមូលពួកអ៊ីស្រាអែល តាមរយៈការរៀនអំពីកុលសម្ព័ន្ធរបស់ពួកយើង យើងត្រូវបានផ្តល់ឲ្យនូវការទូន្មានផ្ទាល់ខ្លួន ការព្រមាន និង ការសន្យា ហើយយើងត្រូវបានបង្រៀនអំពីអំណោយទាន និង ទេពកោសល្យពិសេសៗ ដែលព្រះវរបិសួគ៌បានប្រទានដល់ពួកយើង ដើម្បីបម្រើទ្រង់ ។ ដរាបណាអ្នកព្យាយាមរស់នៅ ស្របតាមចំណុចទាំងអស់ ដែលមាននៅក្នុងពររបស់លោកអយ្យកោរបស់អ្នកផ្ទាល់ នោះអ្នកអាចដឹងថា ការសម្រេចចិត្តរបស់អ្នកគឺនៅក្នុងព្រះទ័យរបស់ព្រះអម្ចាស់ដែលបានសម្រេចឲ្យអ្នក ។