Me Tiki ni Noda Bula na Koniferedi

Sa rawa mo vakayagataka eso na itaviqaravi oqo kei na taro me tekivu kina na vuli vakai keda yadua se vakamatavuvale.

Me Baleti Ira na Gonelalai

Tabana 86: E sureti keda o Peresitedi Thomas S. Monson meda wilika na iVola i Momani ena veisiga, ka yalataka, “Na Yalo Tabu ena vakatakila na kena dina vei iko.” Me ikuri ni nomu vuli, sa rawa me nomu itovo na vulica na iVola i Momani ena veisiga kei talega nomu matavuvale. Sa rawa talega mo dramataka se cakava eso na qito me nanumi kina na veitikina kei na italanoa. Gole ki na friend.lds.org ka raica na mekasini ni 2016 ni Liaona me baleta na italanoa mai na iVola i Momani, wili jata, kei na so tale.
Tabana 117: A talanoataka o Elder Gary E. Stevenson na gauna a vakarorogo kina o tamana vua na Yalo Tabu ka vakabulai koya mai na dua na gata. Kerei rau na nomu itubutubu me dua na nomudou veivosaki vakamatavuvale baleta na taro, Ena dau vukei iko vakacava na Yalo Tabu? Wasea na veigauna e dau veivakaroti, veivakacegui, se vakadinadina vei iko na Yalo Tabu. Sa rawa sara ga mo vola kina e dua na ivola.
Tabana 87: E vakavulica o Sister Joy D. Jones ni sa rawa mo vakarau laki cakava na veiyalayalati savasava ena gauna mai muri ena nomu vulica mo maroroya na yalayala ena gauna oqo. Mo lalawataka ka yalataka mo muria. Kerea e dua na itokani me dikevi iko tiko mai ka qarauna mo maroroya na nomu yalayala.
Tabana 90: E wasea kina o Elder Yoon Hwan Choi na ivakasala mai vei tamana: “Kua ni veiraiyaki, rai cake!” Eso na gauna eda dau vagolei vakatani ka guilecava meda raica matua na Tamada Vakalomalagi kei Jisu Karisito. Mo qai nanuma tiko mo rai cake! Sa rawa mo valiliga e dua na itaba kei Jisu ena nomu rumu. Lako i tuba ka rai yani i lomalagi. Taura e dua na gauna vakanomodi ena veisiga mo vakananumi Tamada Vakalomalagi kei Jisu ka vakila na Yalo.

Me Baleti Ira na iTabagone

Tabana 93 kei na 117: O sa tarogi iko beka: Ena sala cava me tiko ga kina kei au na Yalo Tabu? E rawa vakacava meu kila na Yalo Tabu? Ena vukei au vakacava na Yalo Tabu? Rau a sauma kina oqo o Elder Ronald A. Rasband kei Elder Gary E. Stevenson kei na vuqa tale na taro. “Sa tu na noda ilesilesi tabu meda vulica ka kila na Nona veivakauqeti ena noda bula ka cakava,” a kaya o Elder Rasband. O na sotava vakacava na ilesilesi o ya?
Tabana 33: A cavuta kina vakatikina o Elder Ulisses Soares na ivolanikalou ni itoko ni Muavata: “Me kerekere ena vakabauta, me kakua ni vakatitiqa. Ko koya sa vakatitiqa, sa vaka na ua ni waitui, sa cagina ena cagi ka veitubuyaki.” (Jemesa 1:6). Ena rawa vakacava mo kakua ni veivukiyaki? Tekivu ena nomu vaqaqacotaka nomu vakabauti Jisu Karisito. Vulica vakalevu cake na veika e baleti Koya. Mo nanuma tiko na veigauna o a vakila kina na Nona loloma kei na veivakacegui.
Tabana 86 kei na 9: E sureti keda tiko o Peresitedi Thomas S. Monson, “Kevaka o sega tiko ni wilika na iVola i Momani ena veisiga, yalovinaka mo cakava.” E taroga kina o Sister Carol F. McConkie: “Eda na vakatikitikitaka beka na talevoni, na ituvatuva ni veika me caka, e sega ni oti rawa, kei na veika e leqataki ena vuravura oqo? Na masu, vulici, kei na vakarogoci ni vosa ni Kalou e sureta na Nona veivakasavasavataki kei na loloma veivakabulai ki yaloda.” Tuvanaka e dua na gauna e veisiga mo wilika kina na iVola i Momani ka me volai tiko ena nomu ituvatuva se ena nomu talevoni.

Me Baleti Ira na iTabagone Qasecake

Tabana 62: Na lalawa cava eso sa tiko me baleta na nomu bula? Na lalawa ni nomu cakacaka, matavuvale, vakakina ena qito kei na ivakarau ni bula era ka vinaka, ia “na noda lalawa cecere ka uasivi duadua e dodonu me veiraurau vakavinaka kei na ituvatuva tawamudu nei Tamada Vakalomalagi,” ka vakavulica oqo o Elder M. Russell Ballard. Ena veitaudonui vakacava na nomu ituvatuva kei na ituvatuva nei Tamada Vakalomalagi baleti iko? Ena rawa vakacava mo raicamatua cake tiko na lalawa ni laki bula tawamudu vata kei na Tamada Vakalomalagi kei Jisu Karisito.
Tabana 39: Ena tekivu ni yabaki oqo, a sureti ira na itabagone qase cake o Peresitedi Russell M. Nelson me ra “vakatabuya e dua na tiki ni [nodra] gauna ena veimacawa mera vulica na veika kece e kaya ka cakava o Jisu me vaka sa volai tu ena [ivolayavu ni lotu]” (“Prophets, Leadership, and Divine Law” [worldwide devotional for young adults, Janu. 8, 2017], broadcasts.lds.org). A tokaruataka na veisureti oqo ena koniferedi raraba ni sa dua vei iratou na va na gacagaca bibi ni kena rawati na kaukauwa ni iVakabula ki na noda bula. Vulica na vosa nei Peresitedi Nelson mo kila kina na sala mo rawata kina na “kaukauwa e veirauti me wali kina na icolacola, veivakataotaki, kei na veitemaki ni noda siga oqo.”
Tabana 100 kei na 26: O na gadreva beka e dua na mape ni gaunisala ni nomu bula? E vakavulica kina o Elder Dallin H. Oaks, “Baleta ni sa tu vei keda na dina me baleta na Lewetolu Vakalou kei na noda veimaliwai kei Iratou, na inaki ni bula, kei na ituvatuva ni noda icavacava tawamudu, sa tu vei keda na ulu ni mape ni sala kei na veivakadeitaki ni noda ilakolako ena bula oqo.” E vakavulica vata kei Elder Weatherford T. Clayton ni noda kila na ituvatuva ni veivakabulai ena vukea noda sotava na ibolebole ena gauna oqo. Vulica na nodrau itukutuku ka kerea vua na Tamada Vakalomalagi na kena rawa ni vakarautaka na dina tawamudu e dua na mape ni nomu bula.
Tabana 104: Na rere e rawa ni veimuataki, ia e vakavulica o Peresitedi Dieter F. Uchtdorf ni rere ena “sega ni veisautaki keda meda tamata e taleitaka na veika dodonu ka vinakata me talairawarawa vua na Tamada Vakalomalagi.” Ena rawa vakacava na loloma uasivi i Karisito me “iwali lesi vakalou” ni nomu rere?

Baleti Ira Na Qase

Tabana 86: Ni da vulica ena masumasu ka vakasamataka titobu na iVola i Momani ena veisiga, e kaya kina o Peresitedi Thomas S. Monson, “eda na rawa kina ni rogoca na domo ni Yalo, me da vorata na veitemaki, me da ulabaleta na vakatitiqa kei na rere, ka ciqoma na veivuke mai lomalagi ena noda bula.” Lalawataka mo wilika vakai iko kei na matavuvale na iVola i Momani ena veisiga.
Tabana 39: Vakaitavi ena bolebole a solia mai o Peresitedi Russell M. Nelson vei ira na itabagone qase cake (raica e cake ena “Me Baleti Ira na iTabagone Qasecake”). O na sotava vakacava na bolebole oqo kei na nomu matavuvale? Me veivosakitaki na veivakalougatataki e yaco mai ena kena vulici vakalevu na veika e baleta na iVakabula.
Tabana 93 kei na 117: Ni ko wilika na nodrau vosa o Elder Ronald A. Rasband kei Elder Gary E. Stevenson, raica na sala eso me tiko kei iko na Yalo kei na sala mena vukei iko kina. Raica na sala eso mo vakalevutaka kina na Nona veivakauqeti ki na nomu bula.
Tabana 39 kei na 62: E rau veivakauqeti o Peresitedi Russell M. Nelson kei Elder M. Russell Ballard vei ira na lewenilotu mera vulica “Se Bula na Karisito: Nodra iVakadinadina na iApositolo” (raica na loma ni waqana e liu). E kaya o Elder Ballard, “Biuta e dua na ilavelave ena vanua o rawa ni raica kina, ka taura na gauna mo railesuva na veitukutuku yadua e kune ena ivakadinadina veivakauqeti oqo me baleti Karisito.” Dou wilika, vakamatavuvale “Se Bula na Karisito” ka veivosakitaka na veika dou sa vulica.
Tabana 127 kei na 97: E vakavulica o Elder Quentin L. Cook ni noda yavu ni vakabauta e tara “vakamalua—dua na iyatu, dua na ka e sotavi, dua na bolebole, dua na sukaimuri, ka dua na qaqa ena veigauna yadua.” E kaya o Elder L. Whitney Clayton, “Na kena tuvalaki vakadodonu na veitovo matau se ivakarau ni vakabauta lalai ni veisiga, ni vosataki vakayalo, sa sala vinaka duadua meda taqomaki keda kina mai na leqa ni bula e so, ena kedra ituvaki cavaga.” Na cava o rawa ni cakava ena veisiga mo vaqaqacotaka kina na yavu ni nomu vakabauta?