Jean B. Bingham

Peresitedi Raraba ni iSoqosoqo ni Veivukei

Ni sa vakaitikotiko oti ena vica vata na vanua e Amerika, sa dau vakavinavinakataka o Sisita Jean B. Bingham na kena dau vakarautaka na kosipeli e dua na yalodei ena loma ni veiveisau ni draki ni bula.

A sucu ena 1952 mai Provo, Utah, Amerika, vei rau o Robert kei Edith Joy Barrus, a tubu cake o koya kei iratou e ono na tacina kei na rua na ganena. A vuli ena imatai ni itabavuli mai Texas kei Minnesota, Amerika, ka qai vakaotia na vulitorocake e New Jersey. O koya kei iratou ga na tacina eratou gonevuli YDE ena nodratou koronivuli me yacova nodratou toki ki New Jersey, na vanua a marau ena nona kila ni tiko e dua na goneyalewa ena nodratou tabanalevu vou ena nona kalasi.

Ni oti nodrau vakamau kei Bruce Bingham ena Valetabu na Provo Utah ena 22 ni Tiseba, 1972, eratou a toki ki Illinois me tomana nona vuli.

A sucu e rua na gone vei rau o Baraca kei Sisita Bingham, ka rau kaya ni nodrau talega o ira erau a susuga. A rawata o koya e dua na diqiri veitokani ni bula vakamatavuvale, ia ena gauna sa vulitorocake kina na nodrau itini, a lesu tale ki vuli ka rawata e dua na masita diqiri ni veivakavulici.

Na imatai ni veikacivi nei Sisita Bingham ena iSoqosoqo ni Veivukei a yaco mai ni oti ga vakalailai na sucu ni nodrau ulumatua. “Au a kacivi meu vakavulica na lesoni ni nodra vuli na tina. Sa dua na madigi cecere me da vuli mai na nodra ivakaraitaki eso tale na marama vakakina na ivolavakarau.”

Dau veilakoyaki vakalevu sara o Sisita Bingham ena nona lewena tiko na matabose raraba ni Lalai vakakina ni daunivakasala ena Mataveiliutaki Raraba ni Lalai. Sa raica o koya na bolebole kei na veivakalougatataki ni lewena na Lotu ena veiwasewase e vuravura raraba.

E nuitaka ni ra na dau vakadinadinataka na marama ena iSoqosoqo ni Veivukei na vinaka e dui tu vei ira. “E ka ni veitemaki na noda veidutaitaki keda vei ira tale eso, e veisaqasaqa ka veibasai kei na veika e vinakata me baleti keda na Tamada Vakalomalagi.” E kaya o koya ni iSoqosoqo ni Veivukei, e vukei ira na marama yadua me ra tara cake na kila se o cei o ira ena yalava tawamudu. “Ni da yavutaka noda bula vei Jisu Karisito, eda kila vakaidina se o cei o keda,” e kaya o koya.