A Ka Kecega sa Kaya vei Kemudou ko Koya, Dou Kitaka

Mai vei Elder L. Whitney Clayton

Ena Mataveiliutaki ni Vitusagavulu

Ni da lewa me da kitaka na “ka kecega sa kaya na [Kalou]” vei keda, eda sa yalataka kina ena yalodina me da vakadodonutaka noda itovo e veisiga ki na loma ni Kalou.

A vakayacora na iVakabula nai matai ni Nona cakamana kilai ena dua na soqo ni vakawati e Kena Kalili. A tiko kina na Tinana, o Meri, kei ira na Nona tisaipeli era tiko talega kina. A mani vakila o Meri na kena cuqeni na itavi e so me rawa vinaka kina na magiti. Donuya na soqo, a yaco e dua na leqa—a oti koso na waini mai vei iratou na itaukei ni vakawati. A kauwai sara o Meri ka lako vei Jisu. Rau a veivosaki vakalekaleka, qai vuki o Meri kivei ira na dauveiqaravi ka kaya:

“A ka kecega sa kaya vei kemudou ko koya, dou kitaka.

“Ia sa tu mai kina e ono na saqa vatu ni wai. … [A sega ni vakayagataki na veisaqa wai oqo me maroroi kina na wai ni gunu ia me baleta ga na soqo ni veivakasavasavataki e so mai na lawa i Mosese.]

“Sa kaya vei ira [na dauveiqaravi] ko Jisu, Vakasinaita na saqa ni wai ena wai. A ra sa vakasinaita me vuabale sara.

“A sa kaya vei ira ko koya, Dou qai takiva, ka kauta vua sa lewa na magiti. A ra sa kauta.

“[Sa qai] … tovolea na wai sa vuki me waini ko koya sa lewa na magiti” ka kurabui sara ni qai vakarautaki mai na waini vinaka duadua ena ivakacagau ni magiti.¹

Eda nanuma wasoma na ka e yaco oqo baleta ni sa dua na ivakaraitaki levu sara ni kaukauwa ni Kalou na veisautaki ni wai ki na waini—e a cakamana. O ya sa dua na itukutuku bibi, ia sa dua tale tiko na itukutuku bibi ena ivola i Joni. O Meri sa “ka talei ka digitaki,”² sa kacivi mai vua na Kalou me vakasucuma, susuga, ka vakatubura na Luve ni Kalou saraga. E sa kilai Koya vakalevu cake mai vua tale e dua e vuravura. Sa kila o koya na veivakurabuitaki dina ni Nona sucu. E sa kila ni tawacala o Koya ka “sa sega ni vosa me vakataki ira na vo ni tamata, ena sega talega vakakina ni vakavulici; ni sega ni gadreva me vakavulici koya e dua ga na tamata e rawa.”³ Sa kila tu o Meri na kaukauwa matalia e tu Vua me walia kina na leqa e so, me vakataka e dua ka talei ena vakarautaki ni waini me baleta na soqo ni vakawati. Me vaka na Tinana, sa tautauri dei sara o koya ki Vua ka vakakina ena Nona kaukauwa vakalou. Na nona ivakasala vakadodonu kivei ira na dauveiqaravi a sega ni virikotori, sega ni vakasamataki, ka sega ni yalani: “A ka kecega sa kaya vei kemudou ko koya, dou kitaka.”

Se goneyalewa voli o Meri ena gauna a rairai kina vua na agilosi o Keperieli. E liu a “kidroa” o koya ni vakatokai me “daulomani” ka “kalougata vakalevu … vei ira na yalewa tani … ka sa vakanananu e lomana se vakabeka evei nai valavala ni veikidavaki vakaoqo.” A vakadeitaka vua o Keperieli ni sega ni dodonu me rere—ni sa vinaka na itukutuku e mai talaucaka. Ena “kunekunetaka … na Luve i Koya sa Cecere Sara” ka “vakasucuma talega e dua na gonetagane … [ka] na lewa na mataqali i Jekope ka sega ni mudu.”

A vakananuma vakadomoilevu o Meri, “Ena yaco vakabeka evei na ka oqo, niu sa sega ni veiyacovi kaya e dua na tagane?”

Sa vakamacalataka na agilosi, ka vakalekaleka ga, na kena vakadeitaki vua “ni [sa] sega ni dredre vua na Kalou e dua na ka.”

A sauma ena yalomalua o Meri ni na kitaka na ka cavaga e tukuna na Kalou, ka sega ni cikeva me kila na veika vakatabakidua ka veibasai kaya vakaidina na veitaro tawayalani e baleta na revurevu ni nona bula. A soli koya ka sega ni kila vinaka sara na vuna e taroga tiko kina vua se na cava ena yaco kina e muri. A vakadonuya taumada ka tawayalani o Meri na vosa ni Kalou,⁴ ka sega ni kila vinaka sara me baleta na ka e tiko mai liu. Ena vosa e so ka vakaraitaka na nuidei levu kei na vakabauta na Kalou, a kaya o Meri, “Raica na vada ni Turaga; me yaco ga vei au me vaka na nomuni vosa.”⁵

Ni da lewa me da kitaka na “ka kecega sa kaya na [Kalou]” vei keda, eda sa yalataka kina ena yalodina me da vakadodonutaka noda itovo e veisiga kei na loma ni Kalou. Na veivalavala rawarawa ni vakabauta me vaka na vulici ni ivolanikalou e veisiga, lolo, kei na vakarabailevutaki ni noda veikacivi ena muataki keda ki na dua na ivakarau vakayalo levu sara me sotava na gagadre ni bula vakayago. Ni toso na gauna, ena yaco na cakamana mai na itovo rawarawa ni vakabauta. Ena veisautaka na noda vakabauta mai na dua na sorenitei lailai ki na dua na kaukauwa levu cake ena noda bula taucoko. Oti, ni yaco mai vei keda na bolebole, na noda yavutaki tu vei Karisito ena vakavuna na tudei ni yaloda. Na Kalou ena vakaukauwataka noda malumalumu, vakalevutaka noda reki, ka vakayacora “me vinaka vei [keda] na veika kece.”⁶

Ena vica na yabaki sa oti, au a veivosaki vata kei na dua na bisopi gone ka dau taura na gauna e veimacawa, ena nodra vakasalataki na lewe ni nona tabanalevu. A dikeva o koya na veika oqo. Na leqa era a sotava voli na lewe ni nona tabanalevu, e kaya o koya, era sotava na lewe ni Lotu ena veivanua kecega—na veika vaka na iwalewale ni kena tauyavutaki e dua na vakawati mamarau, sotavi dredre ena vakayagataki gauna ena cakacaka, matavuvale, kei na itavi vaka Lotu; bolei na Vosa ni Vuku, cakacaka, se iyaloyalo vakasisila; se na rawa vakacegu me baleta e dua na lawatu ni Lotu se taro ni veika e a yaco ena gauna makawa ka sega ni vakaibalebale vei ira.

Nona ivakasala vei ira na lewe ni tabanalevu e oka kina na lesuvi tale ni cakacaka eso ni vakabauta, me vaka na vulici ni iVola i Momani—me vaka eda vakasalataki kina mai vei Peresitedi Thomas S. Monson—saumi ikatini, kei na veiqaravi ena yalodina ki na Lotu. Ena veigauna eso nodra isaunitaro vua e vakaraitaka na vakatitiqa: “Au sega ni duavata kei iko Bisopi. Eda kila kece oqori na veika vinaka me caka. Eda veivosakitaka na veika oqori ena veigauna kece ena Lotu. Ia e sega ni macala vei au ni ko kila vinaka tiko na ka au tukuna. Na cava me mai betena kina ki na veika au sotava voli na vakayacori ni veika oqori?”

E sa taro donu. Ni toso na gauna, au sa dikeva rawa ni o ira ka matau ni cakava voli na “veika lalai ka rawarawa”⁷ talairawarawa voli ena iwalewale lalai e so—sa ra vakalougatataki ena vakabauta kei na kaukauwa e ulabaleta sara na veivalavala taumada ni talairawarawa vakaiira ka, vakaidina, ena rairai tawakilai vakaoti kivei ira. Ena rairai dredre toka me veidutaitaki na ivalavala ni talairawarawa matau e veisiga kei na iwali e so ki na veileqa drakidrakita eda sotakaya taucoko. Ia rau sa veiwekani. Ena ka au kila, na kena tuvalaki vakadodonu na veitovo matau se ivakarau ni vakabauta lalai ni veisiga, ni vosataki vakayalo, sa sala vinaka duadua meda taqomaki keda kina mai na leqa ni bula e so, ena kedra ituvaki cavaga. Na veicakacaka lalai ni vakabauta, e dina ni ra sega soti ni ka lelevu se sega sara ga ni veisemati kei na leqa eda sotava tiko, sa dau vakalougatataki keda ena veika kece eda cakava.

Vakasamataki Neamani mada, o koya a “kavetani ni valu i … Siria” ka sa “tamata qaqa e nai valu,” ia e vukavuka o koya. A tukuna me baleta e dua na parofita e Isireli e dua na goneyalewa dauveiqaravi ka rawa ni vakabulai Neamani, ka sa lako vata kei ira na nona tamata dauveiqaravi, sotia kei na iloloma ki Isireli, ka ra tadu yani ena vale nei Ilaisa. Na dauveiqaravi i Ilaisa, sega ni o Ilaisa vakaikoya, a tukuna vei Neamani ni ivakaro ni Turaga sai koya ga mo “lako ka sili vakavitu ena [Uciwai] na Joritani.” E ka rawarawa. De dua a kinoca o koya na qaqa na ivakamacala rawarawa oqo me sega saraga na betena, rawarawa tu ga, se lolovira mai na kena irogorogo me veivakacudrui sara kina vua na vakatutu oya. Vaka matailalai, a sega ni vakaibalebale vei Neamani na ivakasala nei Ilaisa ka, “sa cudru ka lako tani.”

Ia era a toro voleka vua na dauveiqaravi i Neamani ka raica tu ni na rawa vua me cakava “e dua na ka levu” kevaka a kerei koya kina o Ilaisa. Era raica rawa mai na nona kerei walega me cakava e dua na itavi lailai ka rawarawa, me sa kua li ni cakava, dina ga ni sega ni kila deivaki na vuna? A dikeva tale o Neamani na ka a cakava ena nona vakatitiqa voli, ia ena yalo talairawarawa a, “lako … sobu, ka silimi koya vakavitu ena Joritani” ka sa vakabulai ena veivakurabuitaki.⁸

E so na isau ni talairawarawa e basika totolo sara, e so e basika duadua ga ni oti na noda vakatovolei. Ena Mataniciva Talei, eda wilika kina me baleta na nona gumatua o Atama me muria na ivakaro ni vakacabo isoro. Ni tarogi koya na agilosi se cava e vakacabo isoro tiko kina, qai kaya o koya, “Au sega ni kila, ia sa vakaroti au vakakina na Turaga.” A vakamacalataka na agilosi ni nona isoro sa “ivakatautauvata ni nona vakacabori Koya na Le Duabau ga nei Tamada.” Ia na ivakamacala oya e matata ni qai yaco mai ni oti na nona sa vakaraitaka voli o Atama na nona yalodina me talairawarawa vua na Turaga ena “vuqa na siga” ka sega ni kila na vuna me vakacabora kina na isoro oya.⁹

Na Kalou ena vakalougatataki keda tu ga ena noda talairawarawa deivaki ki na Nona kosipeli ka yalodina sara ki na Nona Lotu, ia e dredre sara me vakaraitaka o Koya vei keda na Nona ituvatuva ni gauna me baleta na kena caka. E sega ni dau vakaraitaka vei keda o Koya na iyaloyalo taucoko mai na ivakatekivu. O ya na vanua e basika kina na vakabauta, nuinui, kei na dinati ni Turaga.

Sa kerea na Kalou meda vosota vata kei Koya—meda dinati Koya ka muri Koya. Sa vakamasuti keda meda “kakua ni vakatitiqa ni [da] sa sega ni raica.” E vakaroti keda ni sega ni dodonu meda namaka na isau ni taro rawarawa se iwali totolo e so mai lomalagi. Era yaco na veika ni da duri dei tu donuya na “vakatovolei ni [noda] vakabauta,” se vakacava sara na bibi ni veivakatovolei meda vosota se vakamalua na isau sa na rairai basika tiko mai.¹⁰ Au sega ni vosa tiko ena “talairawarawa mataboko”¹¹ ia na nuidei vakasamataki ena loloma vinaka sara kei na ituvatuva ni Turaga.

Na vakatovolei ni noda vakabauta ena umani tu ga kina na bulataki dodonu ni ivakavuvuli rawarawa e veisiga ni vakabauta era dau vakadreta na parofita ni Kalou. Sa na qai yaco duadua ga kina, na Nona yalayala ni da na ciqoma na isau vakalou eda a diva tu. Se vakadua ga na noda vakadinadinataka noda lomasoli meda kitaka na ka e kerea vei keda ka sega ni cikeva se wawa voli meda kila na gauna cava, na iwalewale, kei na vuna e so eda sa vakatarai kina meda “tauca vakaidina na vua ni [noda] vakabauta, kei na [noda] gugumatua, kei na vosota, kei na vosota vakadede.”¹² Na talairawarawa dina e vakadonuya vakailiu ka tawayalani na ivunau ni Kalou.¹³

Eda vakilai yaloda se sega, eda sa digitaka taucoko “o koya [eda] na qarava” ena veisiga.¹⁴ Eda vakaraitaka na noda malele ni qarava na Turaga mai na kena vakayacori ena sala dei, kei na yalodina na ivalavala e so ni sokalou ena veisiga. Sa yalataka tu na Turaga ni na dusimaka na noda ilakolako,¹⁵ ia me cakava oya o Koya, sa dodonu meda toso ki liu, ka nuitaka voli ni sa kila o Koya na sala baleta ni sai Koya “na sala.”¹⁶ Meda dui vakasinaita na noda bola ni wai me vuabale sara. Ni da muri Koya, na noda bula ena veisautaki, me vaka na wai kina waini. Sa yaco meda dua na ka levu cake mai na kena eda rawa ni vinaka cake mai ena kena eda na rawata ga. Vakadinata na Kalou, kei na “ka kecega sa kaya vei kemudou ko koya, dou kitaka.” Ena yacai Jisu Karisito, emeni.