Elder Joni L. Koch
Vitusagavulu, Vakaitutu Raraba
O Elder Joni Luiz Koch e ikarua ni itabatamata ena Lotu mai Brazil. Erau a lakova e vicavata na matalotu na nona itubutubu o Luiz kei Etelca Gascho Koch, ena veiyabaki taumada ni nodrau veiwatini, me rau kunea na dina vakayalo.
Ni oti e vica na auwa ena nona cabora o tinana e dua na masu titobu ka yalataka me muria na Kalou, erau sa tadu na daukaulotu ena nodrau katuba na nona itubutubu. Ni bera ni oti e ono na vula, erau sa papitaiso.
A sucu ena 1962, ka tubucake o Elder Koch mai Joinville, Santa Catarina, Brazil. Nodra veivakayarayarataki na iliuiu ni Lotu, me vaka e dua na qasenivuli yalodina ni Lalai, dua na bisopi vaka na tama, kei na dua na peresitedi ni iteki daukauwai, a vukea nona yalataka me bulataka na kosipeli.
Ni oti nona daukaulotu tudei ena Tabana ni Kaulotu na Brazil São Paulo North, a vulica o Elder Koch na veika vakaiwiliwili ena Brigham Young University mai Provo, Utah, Amerika. “Ena dua noqu lesu i Brazil, au a sikova nona tabanalevu e dua na itokani, kau sotava kina o koya ena qai watiqu e muri,” e kaya o Elder Koch. “A lako mai vei au ka taroga kevaka au sa vakawati.” Ni oti e walu na vula, ni veimusumusuki tu veiyawaki—ka 15 ga na siga ni sota—a vakamautaki Liliane Michele Ludwig ena 26 ni Epereli, 1988, ena Valetabu mai São Paulo Brazil. E rua na luvedrau.
Ni taurivola oti mai BYU ka rawata mai e dua na diqiri liu ni masita ni veiliutaki vakabisinisi, a cakacaka o Elder Koch ena tabana ni vakauiyaya e vuravura raraba. Ena loma ni 25 na yabaki, a cakacaka o koya ena vuqa na veimataqali kabani me yacova nona kacivi me veiqaravi tudei ena Lotu.
Sa veiqaravi oti o Elder Koch vakabisopi, peresitedi ni iteki, ka Vitusagavulu ni iWasewase. A veiqaravi voli vakaperesitedi ni Tabana ni Kaulotu na Mozambique Maputo ena gauna e kacivi kina me Vitusagavulu Vakaitutu Raraba.
“A tarai cake vakamalua noqu ivakadinadina ni toso na gauna mai na veika vakayalo au sotava ena kena bulataki na kosipeli,” e kaya o Elder Koch. “Na iVola i Momani e dua na iusutu bibi ena qaqa ni noqu ivakadinadina baleta na Turaga o Jisu Karisito, Nona Lotu, kei na Parofita o Josefa Simici.”