A Sa Vakaraici Koya Ko Jisu A Sa Lomani Koya

Mai vei Elder S. Mark Palmer

Ena Vitusagavulu

Ena dua na gauna ko vakila ni vinakati mo cakava e dua na itavi dredre, nanuma na Turaga ni vakaraici iko, lomani iko, ka sureti iko mo laiva mada ga ka mai muri Koya.

Ena vica vata na yabaki sa oti, keirau a kacivi kei watiqu, Jacqui, me keirau laki vakatulewa ena Tabana ni Kaulotu na Washington Spokane. Keirau yaco yani kina lomanibai ni kaulotu ena yalo taqaya kei na nanamaki ena vakanananu ni laki cakacaka vata kei na levu sara na itaba gone daukaulotu totoka sara. Era lako mai na veimataqali draki ni bula, ka totolo sara na nodra sa vaka sara ga me ra luvei keirau tagane kei na yalewa.

Dina ga ni lewe levu era sa matau sara ga ia, era tiko e dua na iwase era sa bau sasaga dredre sara ga mera sotava na bibi ni nodra veikacivi. Au nanuma e dua na daukaulotu ni mai kaya tiko vei au, “Peresitedi, Au sega ni taleitaki ira na tamata.” Lewe levu era kaya vei au ni sega ni tiko vei ira na yalo mera vakamuria na lawa dredre ni daukaulotu. Au lomaleqa ka vakanananu sara kina se cava e rawa ni caka me veisautaka na yalodra na daukaulotu ka ra se bera tiko ni ra vulica na kamikamica ni talairawarawa.

Dua na siga au a draiva tu yani ena dua na tolo ni gaunisala rairai vinaka sara veiloga ni witi na yasana ena sala kedrau iyala o Washington kei Idaho, ka vakarorogo tiko kina katokatoni ni Veiyalayalati Vou. Niu vakarogoca toka na itukutuku kilai levu ni cauravou vutuniyau ni lako mai Vua na iVakabula ka taroga se cava me cakava me rawata na bula tawamudu, au qai ciqoma kina e dua na ivakatakila totoka sara ka sa noqu balolo tabu tu ni vakanananu

Ni oti na nona rogoci Jisu ni tuvalaka vua na ivakaro ka sauma lesu na cauravou ni sa vakamuria tu mai na veika oqo ni a se gone au qai vakarogoca na kena veivakadodonutaki malumu mai Vua na iVakabula: “E dua na ka sa vo tiko vei iko: … volitaka na veika sa tu vei iko, sa qai lako mai, … ka muri au.”¹ Ia, ena noqu kidroa, au qai vakila niu rogoca e ono na vosa ni bera na veitikina oqori ka vaka meu a se bera vakadua ni rogoca se wilika. E vaka mera a qai tomani ga kina ivolanikalou. Au qoroya na kila veivakauqeti ka sa vaka me matatata sara mai.

Na cava soti na ono na vosa ka sa veitarai sara ga mai vakaukauwa? Vakarogoca ka saga mo kila na vosa rawarawa sara ka sega ni tiko ena kosipeli tale e so ia e tiko ga na Kosipeli e vola o Marika:

“A sa taroga na iVakabula … e dua na turaga vutuniyau ka kaya, A cava meu kitaka meu rawata kina na bula tawamudu?

Sa qai kaya vua ko Jisu, …

“Ko sa kila na vunau, Mo kakua ni ia na veibutakoci, Mo kakua ni laba, Mo kakua ni butako, Mo kakua ni veibeitaki vakailasu, Mo vakarokoroko vei rau na tamamu kei na tinamu.”

Sa qai kaya ko koya … , “A ka kece oqo kau a vakabauta ni kau a gone ka yacova na siga oqo.

“A sa vakaraici koya ko Jisu, a sa lomana, sa kaya vua, Edua na ka sa vo vei iko mo cakava, mo lako ka volitaka na nomu iyau, ka solia vei ira na dravudravua, ko na qai vakaiyau mai lomalagi: ia mo lako mai ka taura na kauveilatai ka muri au.”²

“Sa vakaraici koya o Jisu, sa lomani koya.”

Niu rogoca na veivosa oqo, e vakatawa noqu vakasama e dua na iyaloyalo ni tu vakadua na Turaga ka vakaraica na cauravou oqo. Vakaraica—me vakadikeva vagumatua ka curuma yani na yalona ka raica rawa na nona vinaka kei na ka ena rawa ni rawata ka kila rawa na veika ena ganiti koya.

Sa qai muria mai na vosa rawarawa sara—o Jisu sa lomani koya. Sa vakila e dua na tamani loloma levu baleti koya na cauravou vinaka oqo, me baleta na loloma oqo kei na loloma vata oqori sa qai tarogi koya tale o Jisu. Au raitayaloyalotaka na ituvaki ni cauravou oqo me solegi ena loloma vakaoqori ena nona kerei me cakava e dua na ka sa rui dredre sara me volitaka kece nona iyau ka laki solia vei ira na dravudravua.

Ena gauna oqori au sa qai kila ni sega walega ni yalodra e so na daukaulotu ena gadrevi me na veisau . Na yaloqu talega ena gadrevi me na veisau. Na taro sa na sega ni vakaoqo,na cava ena rawa ni cakava e dua na peresitedi ni kaulotu yalolailai me vukea e dua na daukaulotu ka sasaga tiko vakaukauwa me vakavinakataki koya? Sa na dodonu na taro me vakaoqo, “Ena rawa meu vakasinaiti vakacava ena loloma va-Karisito me na rawa kina vua me dua na daukaulotu me vakila mai vei au na loloma ni Kalou ka na gadreva me na veisau? Meu na rawa ni raici koya rawa vakacava me tautauvata na nona raica na cauravou vutuniyau na Turaga meu na raici koya ena kena ituvaki dina kei na ka era na rawa ni rawata ka sega ni veika walega ni ra sa cakava rawa tiko se sega ni rawa ni ra cakava. Au na rawa vakacava ni veiucui kei na iVakabula?

“Sa vakaraici koya o Jisu a sa lomani koya.”

Mai na gauna o ya ka toso mai ki liu niu mai tekiduru vata kei na dua na daukaulotu gone ka sasagataka tiko e so na ka dredre me baleta na talairawarawa au sa qai mai raica rawa e vuni yaloqu na nodra na rawa ni laurai e so na cauravou vakabauta tudei ka ra a digitaka mera lako mai kina kaulotu. Au sa na qai rawa ni tukuna me vaka sara ga e dua na itubutubu dauloloma:³ “Elder se Sister, kevaka meu sega ni lomani iko au na sega ni leqataka se cava ena yaco vei iko ena gauna ni nomu kaulotu. Ia, au lomani iko dina ka raica baleta niu lomani iko au leqataka vakalevu na veika o na rawa ni rawata. Kau sa na sureti iko mo sasagataka mo veisautaka na veika o kila ni dredre vei iko ka veiucui kei na veika ena gadreva na Turaga mo na rawata.”

Ena veigauna niu laki veivakatarogi vua e dua na daukaulotu au dau masulaka me tiko vei au na isolisoli ni yalololoma me rawa niu na raica e dua na daukaulotu me vaka ena raici koya na Turaga.

Ni bera na koniferedi ni zone keirau dau kidavaki ira na daukaulotu kei Sister Palmer au dau cegu ka raici ira yadudua vakatitobu e yaloka ni matadra, vakaraici ira dua na veivakatarogi sega ni vakayagataki e dua na vosa ka na sega vakadua ni cala niu na vakasinaiti ena yalololoma vei ira na luvena vakamareqeti oqo na Kalou.

Au sa vulica e levu sara na lesoni me veisautaka na bula mai na veika au a sotava o ya ena Marika wase e 10. Oqo e va na lesoni au vakabauta ka na rawa ni vukei keda yadua:

Ni da sa vulica meda raici ira na tani me vaka ena raici ira na Turaga ka sega ena matada vakataki keda sa na tubucake na noda lomani ira vakakina na noda gagadre meda vukei ira. Eda na raica na rawa ka ena nodra bula ka ra na sega beka tiko ni raica rawa. Ena loloma dina va-Karisito eda na sega ni rere meda vosa doudou ni “loloma dina ena kauta laivi na yalo taqaya.”⁴ Ka da na sega vakadua ni soreva, ni da nanumi ira ka dau dredre sara ni da lomana ka dodonu meda lomani ira sara vakalevu.
Sega ni dua na veivakavulici se na vuli ena yaco kevaka me caka ena yalo ca se cudru ka na sega ni veisau na yalo kevaka me sega ni tiko na loloma. Se eda tiko ena noda itutu vaka itubutubu, vaka qasenivuli, se vaka iliuliu, na veivakavulici dina ena yaco ena yalo ni vakaveibauti ka sega ni veivakacacani. Dodonu me dau taqomaki tu ga na noda matavuvale baleti ira na luveda ka sega ni yalo ni veiqati.
Me kakua vakadua ni yali na loloma ni ra sega ni yacova na luveda, na noda itokani, se lewe ni matavuvale na veika eda namaka vei ira. Eda sega ni kila na ka e qai yaco vua na cauravou vutuniyau ni sa lako laivi ena yalorarawa ia, au rawa ni vakadeitaka ni o Jisu e lomani koya tikoga, dina ga ni sa digitaka o koya sala rawarawa. Ena rairai yaco beka ena nona bula e muri ni sa raica na vovodea ni nona iyau e qai nanuma ka cakava na veika e tukuna vua na iVakabula ni vakaraici koya tu mai, lomani koya, ka sureti koya tu ga me muri Koya.
Me vaka ni o Koya e lomani keda, na Turaga ena namaka e levu sara na ka mai vei keda. Kevaka meda na yalo malumalumu eda na ciqoma na veisureti ni Turaga meda veivutuni, meda solibula ka da veiqaravi me ivakadinadina ni nona lomani keda. Me vaka ni veisureti ni veivutuni e veisureti talega ni kena laki ciqomi na isolisoli totoka ni veivosoti kei na vakacegu. “Sa ikoya meda kakua ni beca na nona dau veivakavulici na Turaga se vakalecalecava ni o koya e lomana na Turaga ena vakanakuitataka.”⁵

Taciqu kei na ganequ ena veigauna o vakila ni kerei vei iko mo cakava e dua na ka e dredre—mo biuta laivi e dua na itovo ca se dua na ka o vakabobulataki tu kina biuta vakatikitiki na veika vakavuravura vakalaiva e dua na itaviqaravi baleta ni sa Sigatabu vosota e dua sa vakacalai iko oti—nanuma na Turaga ni vakaraici iko tiko mai, ni lomani iko, sureti iko mo biuta ka muri Koya. Ka vakavinavinaka Vua ni lomani iko tikoga ni sureti iko tiko mo tomana tikoga.

Au vakadinadinataka na noda iVakabula o Jisu Kaisito ka vakanamata kina siga ena ovici keda yadua e tabana ni vakaraici keda tu ka ologi keda ena nona loloma cecere. Ena yacai Jisu Karisito, emeni.