Tomani na Veiqaravi ni iApositolo e Vuravura Raraba
Tomani tiko nodra veiqaravi e vuravura raraba na Parofita kei na apositolo (raica V&V 107:23). Ena ono na vula sa oti:
Ena dua na kakaburaki Veiraici Mata ka a vakayacori mai Palmyra, New York, Amerika, erau a vakayaloqaqataki ira kina na itabagone ena Lotu o Peresitedi Henry B. Eyring kei Elder Jeffrey R. Holland me ra rawata na nodra dui ivakadinadina yadua. “Mo ni kila vakataki kemuni ni dina na veika oqo,” e kaya o Peresitedi Eyring.
Mai Mexico, a vakaveikilaitaki o Peresitedi Russell M. Nelson ena Chamber of Deputies (na itagede e ra ni Boselawa), ka vakacaucautaki na Lotu ena veika vinaka sa cakava tiko ena taqomaki ni bulagalala vakalotu kei na vaqaqacotaki ni matavuvale. A sota talega o Peresitedi Nelson kei ira na lewenilotu kei na daukaulotu ka tukuna ni o ira na lewenilotu “era mataivalu bulabula baleta na vinaka ena nodra dui tikotiko.”
Mai Arizona, Amerika, a vakauqeti ira kece na lewe ni Lotu o Elder Dallin H. Oaks me ra taqomaka na galala vakalotu. (Raica eso tale na itukutuku ena religiousfreedom.lds.org.)
A vosa o Peresitedi Dieter F. Uchtdorf vei ira na lewe ni Tabana na Parleys Creek (Swahili) e Salt Lake City, Utah, Amerika. E vuqa vei ira na lewe ni tabana era isenivalu mai na veimatanitu e Aferika, o Peresitedi Uchtdorf sa isenivalu oti vakarua. “Dau nanuma tikoga se evei ga na vanua eda tiko kina, na noda itikotiko na kosipeli,” e kaya o koya.
Erau a tiko o Elders M. Russell Ballard kei D. Todd Christofferson ena soqo ni nona vakatikori na bisopi vou ni Roman Catholic Diocese of Salt Lake City ka kidavaki koya mai ki na itikotiko.
Ena Vanua Tabu, erau a duavata o Elder Holland kei Elder Quentin L. Cook kei na dua na matailawalawa iliuliu ni Yalododonu Edaidai kei ira na vakailesilesi vaka-Jiu mai Amerika ka ra a soqoni vata ena dua na vanua kilai e Jerusalemi me vakatakilakilataki na ika 175 ni ivakananumi kei Elder Orson Hyde (1805–78) ena Kuoramu ni iApositoloLe Tinikarua ena nona vakatabuya na vanua koya me nodra vanua ni vakasoqoni vata na Jiu.
A veisiko talega o Elder Holland vei ira na lewenilotu kei na daukaulotu e Japani, Korea, kei Guam, ka rawa me “keirau vakadeitaka tale vei ira e dua na vunilagi [serau],” e kaya o koya. A tukuna ni kakaburaki bula ena veivanua ni lotu “sa rawa kina vei keda me da yacova yani na vanua rabailevu duadua me baleta noda itukutuku,” noda semati vei ira na udolu vakaudolu na lewenilotu.
Mai New York, Amerika, a vakaitavi o Elder David A. Bednar ena dua na mataveivosaki baleta na vakamau, ka kaya ni sa dua na cakacaka cecere duadua ni noda gauna—me da duavata na veimatalotu duidui—me da vukei ira na tamata me ra kila na ibalebale dina kei na inaki ni vakamau.
Ni veisiko tiko vei ira na Yalododonu Edaidai mai Japani kei Korea, e kaya o Elder Bednar ni sotava tiko na Lotu na toso berabera ia toso tikoga mai Esia. E kaya o koya “Eda sega ni rawa ni levea ia eda na vakauqeti ena nodra gumatua, dauloloma, ka yalodina na Yalododonu Edaidai oqo.” A vosa talega o Elder Bednar vei ira e udolu na lewe ni Lotu ka veivakavulici ena 7 vei ira na 21 na tabana ni kaulotu ena Yatu Filipaini.
Mai Mexico, a vakasalataki ira na lewe ni Lotu o Elder Neil L. Andersen me ra uabaleta na itatarabe ka tarova tiko nodra curu ki na valetabu, rokova na siga ni Vakacecegu, ka vaqaqacotaka na isema vakamatavuvale. E sureti ira o koya me taucoko vakalevu cake nodra kauta mai na iVakabula ki na nodra bula.
A veisiko tale o Elder Quentin L. Cook ki na Yatu Filipaini, ni oti e 20 na yabaki ni nona a veiqaravi mai kea ni se qai kacivi vou me Vakaitutu Raraba. E kaya ni sa vakaruataki na levu ni Lotu ena Yatu Filipaini mai na gauna oya. “Ena vanua a tu kina na tabana,” e kaya o koya, “sa tu kina oqo na iteki. O ira na gonelalai keitou dau kila ena gauna oya era sa lesu mai na kaulotu. O ira na lesu mai na kaulotu era sa peresitedi ni iteki. E vakasakiti ni da raica na tubu ni Lotu.”
Mai Bolivia kei Peru, e veivakasalataki o Elder Cook vei ira na lewenilotu me ra vakanamata ki na vakabauta na Turaga o Jisu Karisito. E kaya ni ra duatani na itabagone kei na itabagone qase cake mai kea ena nodra vakaraitaka nodra lomana na iVakabula kei na Nona Veisorovaki kei na Tucake tale.
Ena iWasewase na Africa West, e kaya o Elder Gary E. Stevenson ni nona veisiko a vakarautaka na madigi me vakananumi na loloma kei na reki era kunea na Yalododonu Edaidai ena kosipeli, dina ga ni ra sotava tu na “bolebole kei na kalouca.”
E muri, mai Uruguay, Chile, kei Argentina, a vosa o Elder Stevenson ena dua na koniferedi ni Me iSakisaki ni iTabagone. E kaya ni vuqa vei ira na itabagone “era sa vakatulewa tiko me ra lako i kaulotu ka tudei ena nodra lalawa me ra vakamau ena valetabu ka … [rawata] na vuli torocake.”
E vakasalataki ira na lewenilotu kei na daukaulotu ena iWasewase na Central America o Elder Ronald A. Rasband me ra dinata na nodra veiyalayalati ka rai vua na Turaga ena veigauna dredre. A sikova e dua na nodra valenibula na gone tauvi kenisa e Guatemala, tauca na vosa ilutua ena dua na soqoni e vakarautaka na Lotu me baleta na galala vakalotu e El Salvador, ka sota vata kei na peresitedi mai Nicaragua.
Mai Toga, a sota o Elder Dale G. Renlund vata kei na kuini kei na so tale na lewe ni matavuvale vakatui. A sikovi Ositerelia kei Niu Siladi, talega ka ra kerei koya kina na lewenilotu me qai tukuna na nodra iloloma vei Peresitedi Thomas S. Monson.