Elder Taniela B. Wakolo
Vitusagavulu, Vakaitutu Raraba
Sa dau vakatabuya o Elder Taniela Biu Wakolo na veisiga kece ni nona bula mai na gauna e papitaiso kina ena Maji ni 1994 me qarava na Turaga.
A sucu ena 1967 ena yanuyanu lailai ko Lomaloma, Lau, e Viti, vei rau o Taniela Vosa kei Temalesi Buadromo Wakolo, e gone duadua o Elder Wakolo vei iratou e ono na gone. “Au a tubucake ena dua na vuvale rawarawa, ia keitou vutuniyau ena neitou veilomani vakataki keitou,” e kaya o koya.
Ni sa yabaki 12, o Elder Wakolo sa biuta nodrau vale nona itubutubu me laki vuli ena koronivuli curuibure vata kei ira e sivia ni 500 na cauravou, yabaki 12 ki na 19. “Oqori na vanua au vuli mai kina vakalevu,” e kaya o koya. “Oqori na vanua au vulica kina na bula vakaivakarau.”
Erau veitau voli kei Anita Herberta Moimoi, e dua na saumaki mai, me sivia e dua na yabaki. Erau a vakamau ena 22 ni Okosita, 1987, e Suva, Viti.
A sega ni yaco totolo mai vei Elder Wakolo na veisau, ena imatai ni walu na yabaki nodrau vakawati, a sota vata kei ira e vuqa na daukaulotu. “Au vakaotia nodra lesoni na [daukaulotu] vakava ena walu na yabaki,” e kaya o koya. “E 24 noqu daukaulotu.”
E dua vei ira na daukaulotu oqori a taroga e dua na taro rawarawa baleta na yaca ni Lotu e veisautaka nona nanuma me baleta na papitaiso. “E dodonu me vakayaca ga na Lotu vua na kena itaukei,” e kaya o koya. “Sai koya sara ga oya vei au.”
Erau a vauci vata o Elder Wakolo kei na watina ena Valetabu mai Nuku‘alofa Toga ena 1995. Erau nodrau itubutubu e rua na gone.
Era muria totolo mai nona papitaiso na madigi ni veiqaravi. Oti e rua na macawa nona papitaiso, sa kacivi ki na mataveiliutaki ni Cauravou ena tabanalevu ka me rau vakavulica vata kei watina na semineri. Ni se bera ni dua na yabaki, sa ciqoma na kaci me peresitedi ni tabana. E muri a veiqaravi vakadaunivakasala ena dua na mataveiliutaki ni iteki, peresitedi ni iteki, ka Vitusagavulu ni iWasewase. Ena gauna e kacivi kina me Vitusagavulu Vakaitutu Raraba, a vakatulewataka tiko na Tabana ni Kaulotu na Arkansas Little Rock.
A vulica o Elder Wakolo na cakacaka vakamanidia kei na veiliutaki raraba ka rawata e dua na masita diqiri ni cakacaka vakamanidia. Ena dua na gauna wale toka ga qo, a manidiataka na Valenivolavola ni Veiqaravi ni Lotu e Viti.