Me iVakarau ki na Veimatanitu na Noda Rarama

Mai vei Elder Benjamín De Hoyos

Ena Vitusagavulu

Na kosipeli ni iVakabula kei na Nona Lotu vakalesuimai e solia vei keda na madigi me rawa ni yaco na noda rarama me tiki ni ivakarau cecere ki na veimatanitu.

Ena vica vata na yabaki sa oti, niu veiqaravi voli vakaqasenivuli ni semineri, au rogoca ni dua vei ira keimami cakacaka vata ni taroga e dua vei ira na nona gonevuli me vakasamataka mada na taro eso oqo: Kevaka o a bula tiko ena nona gauna na iVakabula, na cava na vuna o nanuma kina ni o na muri Koya me vaka e dua na Nona tisaipeli? Eratou qai mai duavata ni o ira na vakamuria na iVakabula ena gauna oqo era saga tiko me ra Nona tisaipeli, ka tautauvata vakakina ena veigauna sa oti.

Mai na gauna oya, au sa vakasamataka vakatitobu na taro oya kei na veika eratou a qai mai duavata kina. Au dau vakataroga wasoma se na vakaevei na noqu nanuma niu rogoca na iVakabula vakataki Koya ena Nona tukuna na veika oqo ena Vunau ena Ulunivanua:

“Oi kemudou na rarama kei vuravura. Na koro sa tara toka e ulunivanua sa sega ni tabonaki rawa.

“Sa sega talega ni tutuvaki na cina, ka me qai toka e ruku ni vakarau ni sila, ena kena itutu ga; sa qai cinavi ira kecega sa tiko e vale.

“Me caudre vakakina na nomudou rarama e matadra na tamata, me ra raica na nomudou ivalavala vinaka ka vakarokorokotaka na tamamudou sa tiko mai lomalagi” (5:14–16).

E rawa beka ni o raitayaloyalotaka se na vakaevei na nomu nanuma ni o rogoca na domona na iVakabula? Na dina, ni sega ni gadrevi me da raitayaloyalotaka. Sa yaco me ka ni veigauna vei keda noda rogoca na domo ni Turaga baleta ni gauna eda rogoca kina na domodra na Nona italai, e tautauvata saraga.

Ena 1838, tautauvata kei na itukutuku a soli mai na Vunau ena Ulunivanua, a tukuna kina na Turaga mai vua na Parofita o Josefa Simici:

“Ni sai koya oqo na yaca ena kacivi kina na noqu lotu ena veisiga mai muri, io na Lotu i Jisu Karisito ni Yalododonu Edaidai.

Au sa kaya vakaidina vei kemudou kecega: Dou tucake ka cila yani, me ivakaraitaki vei ira na veimatanitu kecega na nomudou rarama” (V&V 115:4-5).

Sa rui matalia dina na noda gauna ka vakaraitaki kina ena dua na raivotu vua na parofita o Aisea; a raica talega o koya ka parofisai me baleta na gauna oqo ni kena vakalesui mai na Lotu i Jisu Karisito kei na kena inaki, ka kaya kina, “Ia ena vakarewataka ko koya e dua na kuila vei ira na veimatanitu, ka vakasoqoni ira vata na Isireli era sa biu laivi, ka na soqona vata ko koya na Juta era sa dui veiseyaki mai na iyalayala vava kei vuravura” (Aisea 11:12).

Ena vakasama vakaivolanikalou, e dua na drotini, se dua na ivakarau, sai koya na kuila ka vakasoqoni kina na tamata ena duavata ni inaki. Ena veigauna makawa, e dua na ivakarau me ra duavata kina na sotia ena ivalu. Ena vosa vakatautauvata, na iVola i Momani kei na Lotu vakalesui mai i Jisu Karisito erau sa ivakarau ki na veimatanitu kece. (Raica na iDusidusi ki na iVolanikalou, “Masu,” scriptures.lds.org.)

Sega ni vakatitiqataki, ni dua na ivakarau cecere ena gauna oqo na koniferedi raraba vakasakiti oqo, sa dau tukuni tikoga kina na cakacaka cecere kei na ituvatuva ni Tamada Vakalomalagi “me vakavuna na tawamate rawa kei na bula tawamudu ni tamata” (Mosese 1:39).

Na kena dau vakayacori tikoga na koniferedi raraba sa dua na ivakadinadina cecere ni da Yalododonu Edaidai eda, “vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na veika ena qai vakatakilai mai me baleta tiko ga na Matanitu ni Kalou” (Yavu ni Vakabauta 1:9).

Na cava gona, sa vakatakila na Turaga mai vei Peresitedi Monson eda gadreva me da tomana tiko me rawa kina ni dua na ivakarau ki na veimatanitu na noda rarama. Na cava beka eso na ka bibi e dodonu me caka ena gauna talei oqo ni kena tara cake tiko ko Saioni ka vakasoqoni vata o Isireli?

E sa dau vakatakila tiko na Lomana na Kalou vei keda “vosa ena vosa, na ivunau ena ivunau, vakalailai eke, ka vakalailai e kea” (2 Nifai 28:30). Sa dau vakatakila mai vei keda na Turaga na Lomana ena “vosa ena vosa, na ivunau ena ivunau, vakalailai eke, ka vakalailai e kea;” o koya e sega ni dodonu me da kidroa ena veika e sa rui ka lalai baleta ni ra sa rui rawarawa ka dau tukuni wasoma, ni sa veivakasalataki oti kina na Turaga, ka tukuna vei keda “sa kalougata ko ira era sa vakarorogo ki na noqu ivunau, ka vakatudaliga ki na noqu ivakasala ni ra na vulica na yalomatua; ia kivei koya sa ciqoma au na solia vakalevu cake vua” (2 Nifai 28:30).

Au vakadinadinataka ni “vosa ena vosa, na ivunau ena ivunau, vakalailai eke ka vakalailai e kea” kei na noda vakarorogo ki na nodra ivakasala na noda iliuliu, ena tawa tiko kina na noda cina ena waiwai ka na rawa kina vei keda me da tucake ka cila yani me vaka sa vakaroti keda kina na Turaga.

Ni levu tu na ka eda rawa ni cakava, e tolu au gadreva meu vakanamata kina ka na rawa kina vei keda me da tucake ka cila yani: rokova na Siga ni Vakacecegu; vakusakusataki na cakacaka ni veivakabulai ena yasa ruarua ni ilati; kei na veivakavulici ena ivakarau ni iVakabula.

Na rarama eda tukuna tiko e yaco mai ena noda yalodina ki na vakarokorokotaki ni Siga ni Vakacecegu, ena Lotu vakakina e vale, sai koya na rarama ka na tubucake ni da sa vakasavasavataki keda tiko mai vuravura; sai koya na rarama e yaco mai ena noda vakacabora na noda sakaramede ena Nona siga tabu kei na noda qaravi koya ga sa Cecere Sara, na ka kece oqo ena rawa kina ni tiko vata kei keda na Yalona. Sai koya na rarama ka na tubu ka yaco me laurai votu ni da sa lesu ki vale ena yalo ni veivosoti ka tukuna tiko o Peresitedi Henry B. Eyring ena koniferedi raraba ni Okotova sa oti ka kaya kina: “Ena veivakalougatataki kece sara eda rawa ni wilika, o koya e cecere duadua me yacova mai oqo sai koya na noda vakila na veivosoti ni da sa vakaivotavota ena sakaramede. Eda na vakila na loloma cecere cake kei na vakavinavinaka ena vukuna na iVakabula, o koya sa rawa ni da savai mai na ivalavala ca ena isoro tawayalani” (“Gratitude on the Sabbath Day, Liaona, Nove. 2016, 100).

Ni da rokova tiko na Siga ni Vakececegu ka vakaivotavota ena sakaramede, eda sega walega ni vakasavasavataki, sa na serau cake na noda rarama.

Sa na levu cake talega noda rarama ena noda solia ka vakatabuya na gauna me da vaqara na yacadra na tubuda, kauta na yacadra ki na valetabu, ka vakavulica vei ira ena noda matavuvale kei ira tale eso me ra vakayacora vakakina.

Na cakacaka cecere oqo ni valetabu kei na tuvakawa eda wasea vata kei ira na Yalododonu ena yasa ruarua ni ilati sa toso tiko ki liu vakalevu cake mai na veigauna kecega ni sa ra tara tiko na valetabu ni Turaga. Oqo ni sa tu na ituvatuva vakatabakidua ena veivaletabu me baleta na ilawalawa vakamatavuvale ka ra kauta voli mai na nodra dui kadi ni yaca, keirau sa dau sotava kei watiqu eso na gauna taleitaki ni keirau veiqaravi ena valetabu kei ira na luvei keirau kei na makubui keirau.

Ni da raica ka kauta na yaca ki na valetabu ka vakavulica vei ira tale eso na kena icakacaka, eda sa cila tiko me ivakarau.

Noda vulica me da veivakavulici me vaka na nona veivakavulici na iVakabula e dua tale na sala e rawa ni da tucake ka cila yani kina. Au reki vata kei ira kece sara era sa vulica tiko me ra veivakavulici me vaka na iVakabula. Meu wiliwili mada mai na waqa ni ivolavakarau ni veivakavulici: “Na takete ni qasenivuli taucoko ni kosipeli—na itubutubu taucoko, na qasenivuli kacivi taucoko, na dauniveisiko taucoko, kei ira na daumuri Karisito taucoko—oya mera vakatavulica na ivunau savasava duadua ni kosipeli, ena Yalotabu, me rawa ni ra vukei kina na luve ni Kalou ena taraicake ni nodra vakabauta kivua na iVakabula ka vakataki Koya vakalevu cake.” (Veivakavulici ena iVakarau ni iVakabula [2016]).

Ena gauna sara ga oqo, e udolu vakaudolu na noda qasenivuli yalodina era taura cake tu e dua na rarama ena nodra vulica tiko me ra veivakavulici ena ivakarau ni iVakabula. Ena ituvatuva oqo, na soqoni vou ni matabose ni qasenivuli sa ivakarau me ra tucake ka cila yani kina ni ra sota na gonevuli ena ivakarau ni vunau i Karisito, baleta “na idola ni veivakavulici me vaka na veivakavulici ni iVakabula sai koya me da bula me vaka na nona bula na iVakabula” (Teaching in the Savior’s Way, 4).

Ni da veivakavulici ka vuli ena Nona ivakarau, ka yaco me vakataki Koya vakalevu cake, sa na cila me rarama vakalevu cake na noda dui rarama ka sega ni rawa ni vunitaki ka yaco me ivakarau vei ira era vaqara na rarama ni iVakabula.

Kemuni na taciqu kei na ganequ, me kakua vakadua ni vunitaka na noda rarama. E sa vakaroti keda na noda iVakabula me caudre tiko na noda rarama me vaka na koro sa toka ena ulunivanua se vaka na rarama sa tu ena kena itutu. Ni da cakava vakakina, eda sa vakalagilagia na Tamada sa tiko mai Lomalagi. Na kosipeli ni iVakabula kei na Nona Lotu vakalesuimai e solia vei keda na madigi me rawa ni yaco na noda rarama me tiki ni ivakarau cecere ki na veimatanitu.

Au vakadinadinataka ni sai Jisu Karisito na rarama e dodonu me da vakacilava, ena yaca i Jisu Karisito, emeni.