Ia Sai Koya Oqo na Bula Tawamudu

May 2017

Ia Sai Koya Oqo na Bula Tawamudu

Mai vei Elder C. Scott Grow

Ena Vitusagavulu

Na Kalou e kilai iko ka sa sureti iko tiko mo kilai Koya.

Au na vosa vei kemuni na itabatamata tubu cake tiko mai—na itabagone kei na itabagone qasecake, vakamau se sega—kemuni na iliuliu ni mataka ena Lotu oqo. Ena veika butobuto kece, ka vakatani, rere, kei na veilecayaki ena vuravura nikua, au na vosa vakamatata sara vei kemuni me baleta na lagilagi kei na veivakalougatataki ni noda kila na Kalou.

E vuqa na dina e vakatavulica o Jisu Karisito e vakamacalataka na nona ituvatuva ni bula marau na Tamada Vakalomalagi kei na nomu tikina. Au na raicamatua mada e rua vei ira oqo ena vukea mo ni kila vinaka na kemuni yavu dina vakaluve ni Kalou kei na kemuni inaki ena bula oqo.

iMatai: “Ni sa lomani ira na kai vuravura vakaoqo na Kalou, me solia kina na Luvena e duabau ga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”¹

iKarua: “Ia sai koya oqo na bula tawamudu, me ra kilai kemuni na Kalou dina duadua ga, kei Jisu Karisito, ko koya ko ni a tala mai.”²

Yalovinaka ni dau vakasamataka tiko na dina oqo—era vakavulica na cava na vuna—niu vakasaqara meu vakamacalataka na sala oiko kei keda kece me rawa ni da kila na Kalou.

Mo Kilai Koya ena Masu

Kemuni na noqu itokani itabagone, sa rawa meda tekivu kila na Kalou ena masu.

Enai ka 7 ni Epereli , 1829, ni sa yabaki 22 o Oliver Cowdery a tekivu cakacaka vaka-vunivola vei Josefa Simici e yabaki 23. Rau a tamata gone talega—vakataki kemuni. A kerea kina o Oliver na veivakadeitaki mai vua na Kalou baleta na Vakalesuimai kei na nona cakacaka kina. A saumi mai vua, ena ivakatakila oqo:

“Raica, ko sa kila ni ko sa kerekere vei au kau sa vakararamataka na nomu vakasama. …

“Io, Au sa kaya vei iko, mo kila ni sa sega tale e dua, na Kalou duadua ga e kila na nomu vakasama kei na inaki ni lomamu. …

“… Kevaka ko sa gadreva e dua tale na ivakadinadina, mo nanuma lesu ga na bogi ko a masu ka tagica kina vei au ena yalomu. …

“Au a sega li ni vakaceguya na nomu vakasama … ? Ai vakadinadina uasivi cava tale ko rawa ni taukena me vakatauvatani kei na kena mai vua na Kalou?”³

Ni ko masu ena vakabauta, o na vakila na loloma ni Kalou ni sa na vosa na Yalona ki yalomu. Se cava sara na nomu galili se veilecayaki o na vakila ena so na gauna, ni o sega ni tiko duadua ena vuravura oqo. Na Kalou e kilai iko, vakaidina sara. Ni ko masu, o sa na kilai Koya.

Mo Kilai Koya ena Vulica na iVolanikalou

Ni ko vulica na ivolanikalou, o na sega walega ni vulica na veika e baleta na iVakabula, ia sa rawa mo na kila vakaidina na iVakabula.

Ena Epereli ni 1985, a vosa o Elder Bruce R. McConkie ena koniferedi raraba—ni vo toka e 13 na siga me mate kina. A tinia ena ivakadinadina oqo:

“Au sa dua vei ira sa vakadinadinataki Koya, ka na yaco na siga meu tara kina na we ni ivako ena Ligana kei na yavana kau na vakasuana na yavana ena wai ni mataqu.

“Ia ena sega tale ni dua na ka meu kila cake vakalevu ia na noqu sa kila ga ni sai Koya na Luvena na Kalou sa Cecere, ni sai Koya na noda iVakabula ka Dauveivueti, ni veivakabulai ena yaco ga mai ena nona dra ni veisorovaki ka sega ni dua tale na sala.”⁴

Kivei keda a rogoca na vosa nei Elder McConkie ena siga o ya eda sega ni guilecava na ka eda a vakila. Ni sa tekivu vosa, a vakatakila na vuna a kaukauwa kina na nona ivakadinadina. A kaya:

“Ni da veivosakitaka na veika lagilagi oqo, au na vakayagataka ga na noqu vosa, ko ni na nanuma beka ni sa lako mai na ivolanikalou. …

“E dina ni ra a cauraka taumada eso, ia sa noqu kina nikua, ni sa vakatakila vei au na Yalo Tabu ni Kalou ni sa ka dina, ia oqo sa vaka ni sa vakatakila mai vei au na Turaga me vaka ga ni sa kena imatai ni gauna. Au sa qai rogoca na domona ka kila na nona vosa.”⁵

Ni ko vulica ka vakasamataka titobu na ivolanikalou, o na rogoca talega na domo ni Kalou, kila na Nona vosa, ka kilai Koya. Ena vakatakila na Kalou na Nona dina tawamudu kivei kemuni vakayadudua. Ena yaco na vunau kei na ivakavuvuli oqo me kemu ituvaki dina ka na vure mai na yalomu.

Me ikuri ni vulica yadua, na vulici ni ivolanikalou vakamatavuvale e ka bibi.

Eda vinakata ena noda itikotiko me ra vulica ka kila na luveda na domo ni Yalo. Eda vakadinata ni na yaco oqo ni da vulica vakamatavuvale na iVola i Momani ena veisiga. A vaqaqacotaki na noda ivakadinadina ni da veivosakitaka na dina tabu.

Sa yaco kina na vuli ivolanikalou me sala ni nona solia vei keda yadua na Yalo e dua na veivakavulici tudei. Ni ko vulica na ivolanikalou e veisiga, vakai iko kei na nomu matavuvale, o na vulica mo kila na domo ni Yalo ka kila kina na Kalou.

Mo Kilai Koya ena Nomu Cakava na Lomana

Me ikuri ni noda masu kei na vulica na ivolanikalou me da na kila kina na Kalou, sa na gadrevi meda cakava na Lomana.

Sa ivakaraitaki cecere dina na noda iVakabula. A kaya, “Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai”⁶

Ni sa rairai na iVakabula sa tucaketale vei ira na Nifai, a kaya o Koya, “Ka raica, koi Au na rarama kei na vu-ni-bula kei vuravura; ka’u sa gunu oti mai na bilo wiwi ka a solia vei au na Tamada, ena noqu colata na ivalavala ca ni vuravura me vakalagilagi kina ko Tamada, ia au sa vakayacora na lomai Tamada na veika kecega mai na ivakatekivu.”⁷

O iko kei au daru na cakava na lomai Tamada ni rokovi na noda veiyalayalati, maroroya na ivakaro, ka qarava na Kalou kei ira na wekada raraba.

Oi au kei na watiqu o Rhonda, erau tawavanua tu ga na neirau dui itubutubu—me vakataka beka eso na nomuni itubutubu. Ia e dua ga na ka au taleitaka baleti rau na neirau itubutubu ni rau dinata na qarava na Kalou, ka rau vakavulica me keirau cakava vakakina.

Ni se qai vica toka ga na yabaki ni nodrau vakamau na itubutubu nei Rhonda, a kacivi o tamana yabaki 23 me laki daukaulotu tudei. A biuta tu mai na watina gone kei na luvedrau yalewa yabaki 2. Sa qai kacivi talega o marama watina me laki veiqaravi vata kei koya ena iotioti ni vitu na vula ni nona ilesilesi—ka biuta tu mai na luvedrau yalewa vei ira na wekana.

Ni oti e vica na yabaki, ka sa va na luvedrau, ratou sa toki sara ki Missoula, Montana, me rawa vei tamai Rhonda me vuli ena univesiti. Ia, e vica walega na vula nodratou tiko e kea sa kacivi mai vei Peresitedi Spencer W. Kimball kei Elder Mark E. Petersen o tamai watiqu me isevu ni peresitedi ni iteki tauyavutaki vou o Missoula. A se qai yabaki 34 walega. Na vakasama ni univesiti sa biu tu mai ka sa guta me cakava na loma ni Turaga—sega ni lomana.

Na noqu i tubutubu e rau a veiqaravi ena valetabu ni rauta ni sivia e 30 na yabaki—a dauveivauci o Tamaqu ka liganicakacaka o Tinaqu. Rau a vakailesilesi tudei talega—mai Riverside, California; Ulaanbaatar, Mongolia; Nairobi, Kenya; na Valetabu e Nauvoo Illinois; kei na Valetabu e Monterrey Mexico. Rau a cakacaka vagumatua mai Mexico me rau vulica e dua na vosa vou, ka sega ni rawarawa ena yabaki 80.Ia rau sa saga me rau cakava na loma ni Turaga ka sega ni saga na ka rau gadreva ena bula oqo.

Kivei kemuni kece na Yalododonu Edaidai sa yalodina vakaoqo e vuravura raraba, au voqataka kina na vosa ni Turaga kivei parofita Nifai: “O sa kalougata, … ena veika ko sa vakayacora … ko sa sega ni guce … [ko] sa sega ni segata mo maroroya na nomu bula, ia ko sa segata ga mo vakayacora na lomaqu ka muria na noqu ivunau.”⁸

Ni da vakasaqara meda cakava na loma ni Kalou ena noda qaravi Koya kei ira na wekada raraba, eda na vakila ni sa vakadonui keda ka kilai Koya vakaidina sara.

Mo Kilai Koya ena Nomu sa Vakataki Koya

E kaya vei keda na iVakabula ni sala vinaka duadua meda kila na Kalou o ya meda sa vakataki Koya. A vakavulica: “Ia a cava na ivalavala sa kilikili kei kemudou? Au sa kaya vakaidina vei kemudou, mo dou vakataki au.”⁹

Na bula kilikili sa ka bibi meda sa vakataki Koya kina. A vakarota o Koya, “Vakatabui kemudou; io, dou vakasavasavataka sara na lomamudou, ka savata na ligamudou … meu vakasavasavataki kemudou kina.”¹⁰ Na tekivu ena sala meda na vakataki Koya, meda veivutuni, ciqoma na Nona veivosoti, ka na vakasavasavataka o Koya na yaloda.

Me vukea noda toso yani vua na Tamada, sa yalataka kina na Turaga vei keda oqo: “Ena qai yaco, ni ko ira na yalo kecega era na biuta laivi na nodra ivalavala ca ka lako mai vei au, ka masuta na yacaqu, ka talairawarawa ki na domoqu, ka muria na noqu ivakaro, ena raica na mataqu ka kila ni sai au.”¹¹

Ni da vakabauta na Nona solibula ni veisorovaki, sa yaco na iVakabula me vakasavasavataki keda, vakabulai keda, ka rawa vei keda meda kilai Koya ena noda sa vakataki Koya. E vakavulica o Momani, “Mo dou masuta na Tamada ena yalomudou taucoko, … mo dou [luvena tagane luvena yalewa] na Kalou; ia ni sa rairai mai ko Koya eda na tautauvata kaya.”¹² Ena noda saga meda vakataka na Kalou, sa rawa Vua me buli keda vakauasivi cake mai na noda saga vakai keda ga.

Mo Kilai Koya ena Vakamuri Ira na Dauveituberi

Me vukea noda sasaga, sa solia vei keda na Kalou na ivakaraitaki ni tamata kei na dauveituberi. Au gadreva meu wasea noqu nanuma baleta e dua na noqu, o Elder Neal A. Maxwell. Sa dau saga tu ga me solia na lomana ki na loma ni Tamada ena sasaga me sa vakataka na Kalou.

Sivia na 20 na yabaki sa oti, a wasea vei au na nona nanuma ni oti toka ga nona sa laurai ni sa tauvi kenisa. A kaya vei au, “Au vinakata meu tiko ena timi, ena yasana oqo [ni ilati] se yasana kadua. Au sega ni vinakata meu dabe tiko ena yasa ni laini. Au vinakata meu na qito.”¹³

Ena vica na macawa e tarava, a dredre me kerea na Kalou me vakabulai koya; a gadreva ga me cakava na loma ni Kalou. A kaya na watina, o Colleen, ni imatai ni tagi nei Jisu ena were o Kecisemani a vakaoqo “Kevaka e rawarawa, me lako tani mada vei au na bilo oqo.” A mani kaya kina na iVakabula,“Ia me kakua ga ni vaka na noqu lewa, me vaka ga na nomu lewa.”¹⁴ A vakayaloqaqataki Elder Maxwell me muria na ivakaraitaki ni iVakabula, me kerea na vakacegu ka qai solia na lomana ki na loma ni Kalou ka cakava sara.¹⁵

Ni sotava na rarawa ni veiqaravi levu vakavuniwai ka dredre volekata ni dua na yabaki, sa taucoko vakaoti na lesu “ki na qito.” A veiqaravi me vitu tale na yabaki.

A vica tale na neirau ilesilesi vata ena vica na yabaki e tarava mai. Au a vakila na nona yalovinaka, yalololoma, kei na loloma. Au a vakadinadinataka na tubu cake ni nona vakasavasavataki vakayalo ena gauna ni nona rarawa kei na nona veiqaravi tikoga ni saga voli me na vakataka na iVakabula.

Na usutu ni ivakaraitaki uasivi kei na dauveituberi, sa tiko me noda kece, sai koya na noda Turaga ka iVakabula, o Jisu Karisito, ka a kaya, “Oi au na sala kei na vu-ni-dina, kei na vu-ni-bula, sa sega ni torovi Tamaqu walega e dua na tamata, e na vukuqu ga.”¹⁶ “Mo lako mai mo muri au.”¹⁷

Kemuni na taciqu kei na ganequ itabagone, na kila na Kalou sa sasaga ni bula taucoko. “Ia sai ikoya oqo na bula tawamudu, me [ra] kilai kemuni na Kalou dina duadua ga, kei Jisu Karisito, ko koya ko ni a tala mai [na Tamana].”¹⁸

“Meda kakua beka ni tomana tiko na inaki cecere vakaoqo? … Na yaloqaqa, kemudou na [noqu itokani itabagone]; ka toso tikoga ki liu, ki liu ki na qaqa!”¹⁹

Na Kalou e kilai iko ka sa sureti iko tiko mo kilai Koya. Masu vua na Tamada, vulica na ivolanikalou, vakasaqara mo cakava na loma ni Kalou, ka saga mo na vakataka na iVakabula, ka muri ira na dauveituberi ivalavala dodonu. Ni ko cakava oqo, o na yaco mo kila na Kalou kei Jisu Karisito, ka ko na rawata na bula tawamudu. Oqo na noqu veisureti vei kemuni niu sa Nodrau ivakadinadina tabaki. Erau bula. E rau lomani kemuni. Au sa vakadinadinataka oqo ena yaca i Jisu Karisito, emeni.