Elder Brian K. Taylor
Vitusagavulu, Vakaitutu Raraba
A tokoni o Brian K. Taylor me Vitusagavulu Vakaitutu Raraba ena 1 ni Epereli, 2017.
A sucu o Elder Taylor ena 1964 e Ogden, Utah, Amerika, vei rau o Lowell Moon kei Marie King Taylor. A tubucake e Kaysville ka toka voleka, e ikava ena dua na matavuvale lima na kena gone dau taleitaka na siwa kei na qito.
A dua na nona sikolasivi ni qito basketbol ena Utah State University mai Logan, Utah, na tuakana o Craig ka tovolea tiko me lewa me kaulotu se sa tomana ga nona vuli ena koliji.
“Ena dua na gauna ni vakayakavi au kaya [vua], ‘Ei kevaka o laki kaulotu, au na lako ki kaulotu,’” e nanuma lesu o Elder Taylor. Rau mani laki veiqaravi ruarua na veitacini, lako o Elder Taylor ki na Tabana ni Kaulotu na Spain Seville.
Ni bera nona kaulotu, a qito o Elder Taylor ena timi ni basketbol ni Brigham Young University mai na 1982 ki na 1984 vata kei Devin G. Durrant, ka veiqaravi tiko ena gauna oqo vaka-Mataveiliutaki Raraba ni Wilivola ni Sigatabu.
A sotavi koya talega ena qai watina e muri, o Jill Featherstone, e BYU. A vakavulica tiko o koya na kalasi ni iVakavuvuli ni Kosipeli ena nona tabanalevu ni gonevuli. Ni sureti koya o tuakana, a lako o Elder Taylor ki na nona kalasi ka rau sota kina. A buroro e dua na veidomoni, ka rau vakamau ena 30 ni Epereli, 1987, ena Valetabu e Salt Lake. Erau nodratou itubutubu e vitu na gone.
O Sisita Taylor e yalewa duadua ga vei ira na lewe vitu na luvedrau o Elder Vaughn J. Featherstone, Vakaitutu Raraba vakaemeretesi, kei Sisita Merlene Featherstone. “Erau sa rui dau veiciqomi ka yalovinaka,” e kaya o Elder Taylor baleti rau na vugona. “Au vakila totolo sara noqu lomani.”
Ena dua na bejila diqiri mai BYU, sa tara rawa o Elder Taylor e vica na bisinisi, okati kina e dua na kabani dau cakava na parokaramu ni kompiuta me ciqoma na qiri ni leqa vakasauri vei ira na tabana ni veiqaravi raraba.
Sa veiqaravi oti o koya vakaqasenivuli ni inisitute, lewe ni matabose e cake, peresitedi ni Cauravou ena tabanalevu, peresitedi ni iteki, vakakina, ena gauna e kacivi kina ki na Vitusagavulu, peresitedi ni Tabana ni Kaulotu na Texas Dallas.