Elder Adilson de Paula Parrella

Vitusagavulu, Vakaitutu Raraba

Ni yabaki walu o Elder Adilson de Paula Parrella, rau sa tekivu vakavulica na daukaulotu ki na nodratou matavuvale baleta na Parofita o Josefa Simici kei na Vakalesui mai ni Kosipeli.

“Niu se gonelailai sara mada ga au sega ni bau vakatitiqataka na dina ni a raica dina na Kalou kei Jisu Karisito o Josefa Simici,” e kaya o Elder Parrella, ka a tokoni ena 1 ni Epereli, 2017, me dua na Vitusagavulu Vakaitutu Raraba. “Au sega vakadua ni bau vakatitiqataka oqori mai na gauna koya ka lako yani.”

A sucu o Elder Parrella ena 1962 e Guarujá, Brazil, ena baravi ni Atalanitika volekati São Paulo, vei rau o Fioravante kei Vany de Paula Parrella.

Erau a kaulotu ruarua na tuakana. Na nodrau ivakaraitaki vakakina na nona na bisopi dauloloma, o Angelino Borges de Freitas, ka dau tuberi koya ena Matabete i Eroni, a vakacaudreva e lomana na gagadre ni kaulotu tudei. Na veiqaravi ni kaulotu e vaqaqacotaka vua “ni tiko dina na Kalou kei na Luvena ka da Luvena kece na Kalou o keda.”

Ni oti na veiqaravi ena Tabana ni Kaulotu na Brazil Porto Alegre a laki vuli o Elder Parrella ena Brigham Young University mai Provo, e Utah, Amerika, ka rawata kina e dua na bejila diqiri ni veitaratara kei na masita ni veiliutaki vakabisinisi. A cakacaka vakamanidia dairekita ni Kodak Polychrome Graphics ka itokani ena Korn Ferry International. Ena dua na gauna wale toka oqo a dua na itokani o koya ena Caldwell Partners.

A vakamautaki Elaine Finholdt ena Tiseba 1988 ena Valetabu na São Paulo Brazil. Erau nodra itubutubu e lima na gone.

Sa veiqaravi oti o Elder Parrella vakaperesitedi ni tabana, bisopi, lewe ni matabose e cake, daunivakasala ena dua na mataveiliutaki ni iteki, Vitusagavulu ni iWasewase, ka peresitedi ni Tabana ni Kaulotu na Brazil Belo Horizonte mai na 2009 ki na 2012.

Tekivu mai na gauna a sotavi rau kina na daukaulotu, sa yaco na nona bula me ilakolako me kila vinaka na veika a vakila ni se yabaki walu. Sa veivuke ena kena vakarabailevutaki na nona rai mai na tiki lailai ni dina a soli vua ni se qai yabaki walu, na nona dau lako i lotu, toso tikoga nona vuli mai na vosa ni Kalou, kei na segati me bulataki na ivunau. “Oqo dina na matanitu ni Kalou e vuravura,” e kaya o koya.