Te Kaeka ibukin Lucia
E maeka te tia korokaraki i California, USA.
E nanououa Lucia n aron te bwai are e taekinna ana tia reirei te aine. Antai ae kona n ibuobuoki?
“I tangiria ni wareki booki aika tabu, ao, ni katoa tai ngkana I karaoia, I namakina te Tamnei ae rikirake inanou—te kakoaua ae a bon koaua” (Aia Boki n Anene Ataei, 109).
E kaoa rannimatana Lucia ae waanako man tangina. E aki tangiria bwa ana nooria ataei ake tabeman n tang. E kitana te tabo n reirei ao ni waekoa n okira mweengana.
E maeka Lucia n te aba ae uarereke, n tikiraoi. Ti ngaia kaain te Ekaretia n te reirei. Ataei ni kabane ake tabeman a nakon te aro ni kiritian ae ti tabo tetataro iai. A bwainingarea Lucia ao aki takakaro mangaia bukina bwa e kaokoro.
Tiaki ti anne te kaangaanga. N tabetai taan reirei aki kubwara Lucia ngkana e tabeka baina.
“Ma te bong aei bon te kabanea ni buakaka ni bong karekea!” Lucia e iangoia n ana iango te koroboki are mai imwaina. E taamwakaa te atibu inanon kawaina. N tain te kiraati, te tia reirei e wareki tabeua kiibu man te Baibara ae aki oota iai Lucia. A kaota nakoina bwa Te Tama are i Karawa, Iesu, ao te Tamnei ae Raoiroi bon aomata aika tii temanna. Ngkanne te tia reirei e taku bwa iai tabeua ekaretia aika aki kakoaua te bwai ae taekinaki n te Baibara. E karekea taraan Lucia ana tia reirei. Ataei ni kabane n te kiraati a bane ni ngare.
E a nanououa Lucia. Tiaki aomata aika a kaokoro te Tama are i Karawa, Iesu, ao te Tamnei ae Raoiroi? Tera ae karaoaki?
N te tai ae waekoa e reke ana iango ae kakukurei. E na konaa titirakiniia mitinare! A nanakon ana kaawa Lucia ni katoabong. “Ana ataia bwa ana kanga ni buokia!” e iango.
Ngke e roko ni mweengana Lucia, e noora Titita Brown ao Titita Ruiz. A ibuobuoki ni bwamwiia te ran nakon te tangke iaon taubukin te auti.
E kanakoa ana titiraki Lucia n te tai naba anne. “Bukin tera te Baibara e taekinna bwa te Tama are i Karawa ao Iesu bon aomata aika tii tebo?”
E moangare Titita Brown. “Anne te titiraki ae tikiraoi. Imwiin te amwarake n te tawanou ti na kakaai tabeua kiibu man booki aika tabu ibukin tabeua ibuobuoki.”
E kaangaanga iroun Lucia bwa e na katoonga te kuuka ae kangkang te ropa vieja ae a tia ni karaoia Mama. Te bwai ae ekan ataia bon ti te reke!
N tokina e toki te amwarake n te tawanou. Lucia ao mitinare a kauki aia boki aika tabu. A wareka rongorongon miin Iotebwa Timiti. Imwiina a wareka taekan bwabetitoakin Iesu. Kiibu aika uoua aikai a kaotia bwa Te Tama are i Karawa, Iesu, ao te Tamnei ae Raoiroi a bon kaokoro.
“Ngaia ae bukin tera kiibu ake tabeua a taekinna bwa ti tebo?” e titiraki Lucia.
Titita Brown e moana rairan taian iteraniba. “Ti a wareka Ioane 17. Anne are e tataro ia Iesu nakon te Tama are i Karawa iaon taekan Ana Abotoro.”
A wareware temanna imwiin temanna. Inanon booki aika tabu, e tataro Iesu bwa a kona Ana Reirei “n ti teuana” n aron Ngaia ao te Tama are i Karawa bon ti teuana. Lucia e wareka teniua taina aika kaokoro ngke E taekinna.
“Aki kona Abotoro n riki bwa aomata aika ti tebo,” e taku Titita Ruiz. “Ma a kona n riki n teuana n aron aia koaua ao aia mwakuri. Anne aron rikin te Tama are i Karawa, Iesu, ao te Tamnei ae Raoiroi n riki teuana.”
E moanna n namakina te rau Lucia inanona. E ataia ae te Tamnei ae Raoiroi. E taekinna n nakoina bwa tera te bwai are e taekinna Titita Ruiz e bon koaua.
Te Tama are i Karawa ao Iesu bon tiaki aomata aika ti tebo. Ma ti tebo n te bwai ae A taekinna ao ni karaoia. Ma e ataia Lucia bwa A bon tangiria.