Botoniango ibukin te Miutuo 2018
Te Rau Iroun Kristo
Tai tabe bwa tera am kangaanga, ko kona n tainako ni karekea te rau iroun Iesu Kristo.
N te aonaaba ae onrake n te mangaongao, te kakauntaba, taian kariiri, ma iango aika karioaki, kakaean te rau e na bon aki bebete. Ma ana berita te Tia Kamaiu ae kuneaki inanon te Doctrine ao Covenants 19:23 (te 2018 Botoniango ibukin te Miutuo 2018) e katauraoa te kawai nakon te rau: “Reirei Mairou, ao ongo n au taeka; nakonako ma te nimamannei n Tamneiu, ao ko na karekea te rau mai irou.”
Ngkai ngaira kaain te Beretitentii ni Kabuta n Ataeinnaine ao n Ataeinimwaane, ti kakoaua bwa e koaua anne. Ti a tia n noria n oin matara, ao ngkana ko ira te baeten aei, te Atua e na kakoroa naba nanon Ana berita inanon maium.
A mwaiti mai ibuakomi ae a ingainga nanoia ao n tabeaianga n aron te bwai ae na anganiko nakon taai aika a na roko. A mwaiti mai ibuakomi aika a raraoma n tarakimi, am konabwai, ke am katautau. Ma tai tabe ma tera ae ko kaitara ma ngaia, ko kona ni karekea te rau. E aki nanonaki n ae titiraki ke raraoma ni kabane a na bane ni waekoa n toki, ma ko kona n namakina te koaua ae maraara ae a na bane n nakoraoi bwaai ni kabane. Ma ae kakawaki riki, ko kona n namakina ana tangira Iesu Kristo bon ibukim, ao anne e na uota te rau ae korakora.
Ti a maroroakina kanoan teuana te kibu aei.
Reirei Mairou
Karekean kinakin te Tama are i Karawa ao Iesu Kristo bon mwakoron mwanangam ae kakawaki ni maium. E taku te Uea, “Ao aio te maiu are aki toki, te ataiko ae te Atua ae ti temanna ae koaua, ao Iesu Kristo, ae ko kanakomaia” (Ioane 17:3). Ngkana ko a kina raoi riki Kristo, ko kona n ataia bwa aekakira raoiroina, wanawanana, akoina, ao Ana tangira. Am onimaki Irouna e na rikirake, ao ko na karekea te nano ae korakora riki ni kan Iria ao te Tama are i Karawa.
Ongo Au Taeka
E taetae Iesu Kristo nakoira rinanon booki aika tabu, burabeti aika maiu, ao te Tamnei ae Raoiroi. Ti kainnanoia ni warekia, iangoia, ao ni kamwakuri taeka aikai ni maiura. N am kamatebwai n Ana taeka te Uea, kabanea am tai iaon Ana Boki Moomon bukina bwa bon te boki ae te kabanea n eti mai buakon booki nako iaon te aonaaba, ao boni ngaia kiingin ara ekaretia,” e reirei Iotebwa Timiti, “ao e na kaania riki te Atua te aomata ngkana e iri nanon reirei ake a taekinaki inanona, nakon taian boki riki tabeua.”1 Ana kakao ae moan te mwaaka ibukira Beretitenti Thomas S. Monson n te maungatabu ni kabuta n Eberi 2017 bwa ti na wareka Ana Boki Moomon ni katoa bong e na buokiira ni kakauongo nakon ao n oota n ana taeka Kristo.2
Nakonako n Nimamannein Tamneiu
Te kakauongo nakon ana taeka Kristo e na kona ni bitiira ngkana iai nanora ni karinei. Aio e na kainnanoa te nimamannei iroura. E tangiriira bwa ti na mwaninga oin kawaira ao n nakonako ni Kawaina. N tabetai ti taku n ara iango bwa a nakoraoi riki ara kawai. Ma ngkana ti nimamannei ao n Iria n te tabo ae E kairiira nako iai, ti na teimatoa n toua te kawai ae te kabanea n tamaroa.
Ko na Karekea te Rau Irou
Aio te berita ae moan te tamaroa: ngkana ko na karaoi bwaai aika teniua aikai—reirei, kakauongo, ao n nakonako ma te Tia Kamaiu—ko na karekea te rau inanon maium. E na iai iroum te koaua ae e memena te Atua irarikim ao E na tararuaiko, n aki tabe ma taian maaku, kararaoma, ke mamaara aika ko karekei. Ko kona ni karekea te onimaki—tiaki ti iroum ma iroun naba Iesu Kristo ao Ana tangira ao mwaakana.
Ti kaoia kairake ni kabane n te Ekaretia bwa a na kamatenanoa te kibu aei. Kabongana bwa te kairi inanon maium. Ngkana e roko iaom te bubu n nang ae roo ao n taraa ni korakora, ko na kona ni kaoka uringakin te kibu aei nakon am iango, ira ana baeten, ao kabanea am iango nakon aan ni koaua Iesu Kristo.