Kain Rarikiu ae Kamiimi
E maeka te tia korokaraki i Victoria, Aotiteria.
I mena n te maiu ae mangori, ma te nako n taromauri ma kaain rarikiu e bitii bwaai ni kabane.
Kamataata n te tamnei iroun Rafael Mayani
Tabeua te ririki n nako I nanokawaki ibukina I namakina ae kanga akea ae N na taetae mangaia. A raroa nako au utu ao akea raoraou, ngaia are I aki kona n noora riain te manga maiu riki.
I maeka ma ai tinau ao ai tamau, ao tii te bwai ae a tuangai ae N na aki taetae nakon te mwaane ae ikawai ae maeka irarikiu. A taku bwa e kamimii, ao a bon karakaa rongorongona bwa a na kakamaakai.
E ngae n anne, te Kaonobong teuana ngaia ma uoman ataeinnaine aika bon rorou a butiiai buokaia ni katea oon rarikiia. I kariaia ni buokiia ao ni waakina te mwakuri ni katean te oo.
Imwiin taratarakiia ataeinnaine aikai, I nooria bwa a tikiraoi, ngaia are I a moanna ni kataetaeiia, are e kairiia nakon te marooro iaon taekan Ana Ekaretia Iesu Kristo ibukiia Aika Itiaki ni Boong Aika Kaitira. A rangi ni mwaiti au titiraki, ake a bon kaekai. I moanna ni kukurei. E kaoai kaain rarikiu bwa N na nako n taromauri mangaia n te bong are imwiina n nooria ngkana I tangiria. I mena inanon maiu ae mangori, ngaia are I kunea bwa akea te bwai ae na bua.
Te nakonako rinanon mataroan te umwantabu n te bong are imwiina, I namakina te rau inanou are I aki oota iai, ma I ataia te ekaretia bon te tabo ae I riai ni mena iai. I kabwarabwaraaki nakoia mitinare n te ingabong are imwiina, ao I nooria bwa a kanga n ataia bwa e koaua te Ekaretia.
I moanna n ongora n taian reirei aika kakaokoro mairouia mitinare. I kuri n aki butiia te Tama are i Karawa ni kanakomaia uoman mitinare akana a tatangira, mwamwannano, ao n iai irouia te tamnei n te tai ae tamaroa. Rinanon aia ibuobuoki I karekea te atatai mairouia n taekan te euangkerio.
Imwiin ongoraau irouia n tibwauaan aia atatai ibukin te Tama are i Karawa ni buokiia n aia kaangaanga, I namakinna ae I riai n tataro n nooria ngkana te bwai are a taekinna e bon koaua. Imwiin au tataro, I namakina te bwai ae kakukurei, ae rau, ao ni bebete inanou. I ataia bwa I a tia ni karekea te kaeka n te tairiki anne rinanon te Tamnei ae Raoiroi.
Karekean te atatai aei, e waekoa ni karikirakea au koaua. Inanon kaainakin te Ekaretia n 2013, I a tia n noori ni koaua kakabwaia n ataakin te Tama are i Karawa are e anganai. I kakaitau ibukiia mitinare akanne ao ibukin kaain rarikiu ni kaoai nakon Kristo.