Lucas ao te Tia Iowawa
Lucas e namakina te raunnano ae korakora n te bwai are e taekinna … ni karokoa e noora moan Pedro.
“Ti na tataekini taeka aika raraoi imarenara ni mweengara ao taabo ake ti mena iai” (Anene n Taromauri, no. 232).
“O akea ngaira! Ae e a roko Pedro!”
Ni kabane kaain te reirei a ataia bwa Pedro te tia iowawa. E bubura, ao e unuun! E tataebuakaia ataei, ao e anai kanaia, ao e kakiokioia ni katobibia te kaawa n reirei. Akea ae e kan airiiri ma ngaia.
Predro e rirarikin Lucas ao raraona, Arthur. E araniia bwa a “kii biubiu” ao e kebutia Arthur.
Lucas e kua iroun Pedro n arona n iowawa. N aki bae n iangoia, e takarua, “Katokia, Pedro!”
Lucas e aki kona ni kakoaua. E a tia n tei ni kaitara te tia iowawa n te reirei!
Pedro e nanobubu ao e taua Lucas man ana kabaraaki. “Tera ae ko taekinna?” E tata manawan Lucas n te aro are e a kuri n otinako mai bwabwaana! “Nna anganiko riki teuana te kauring,” e taku Pedro. “Ma ko riai n tarataraiko!” E notuanako Lucas ao e taonnako.
Imwiin anne, Lucas e karaoa ana kabanea n tamaroa ni kararoa Pedro, ma Pedro e kunea n taai nako. E aki toki n totokoa Lucas man te takakaro, kebutiia n tain te dodgeball, kabwakaa n te tabo n amwarake, ao n taetae n aki akaka nakoina.
N te bongina Lucas ao Arthur a takakaro n ana booro Arthur. Pedro e raweia mai akuun te aroka ao e taua.
“Taiaoka karemai,” e taku Arthur.
“Antai ae e na kairoroai bwa N na kaokia?” Pedro e kebutiia nakon te aroka ao e ngare.
eEbon rang ni maraki nanon Lucas. E a bon rangin un! “Ko ataia bwa tera, Pedro?” E taku Lucas. “Bon ngkoe te kabanea ni buakaka n ataei ae I ataia! Bon akea ae tatangiriko. Ni kabane aomata a tangiria bwa a na akea ngkoe!”
E toki ngaren Pedro. E namakina te raunnano ae korakora Lucas ngke e taekinna … ni karokoa e noora moan Pedro. E aera e na tang? Pedro e waekoa ni baraaki ao e taonnako.
E waekoa n roko te nanokaawaki iroun Lucas. Inanon te bong anne, n aki tabe bwa matoara are e a tia ni kataia, Lucas e aki kona ni kanakoa te namakin anne. N te tairiki anne, e nibwara iaon ana kainiwene. E teimatoa n iangoa nanokawakin Pedro.
“E kanga n nanokawaki Pedro?” E iango Lucas. “E aki tabe ngkana e iowawa nakoia ataei tabeman. I bon riai n taekina te bwai ae eti?” Mwaitin iangoana iroun Lucas, mwaitin riki are e ataia bwa e bon eti bwa e na tei ibukina ma raraona. Ma e bon kairua n taekin taeka aika aki raraoi.
Lucas e katorobubua irarikin ana kainiwene ao e bubutia Tamara are i Karawa bwa e na kabwara ana bure. E butiia Tamara are i Karawa bwa e aki tangiria ni kammaraka temanna imwiin aei. E tangiria bwa e na akoi. Ngke e tia n taekina “amen,” e ataia bwa tera are e riai ni karaoia.
Imwiin te katawanou n te bong are imwiina, Lucas e kaitibo ma Pedro n tei n raraa te oo n tii ngaia. E nako nanon Lucas. Tera ae e kona ni karaoia Pedro? Lucas e karina angina ao e nakoina.
“Um, Kabwara au bure ibukin te bwai are e riki ngkoananoa.”
E tara ni mimii Pedro. “Ko kabwara am bure?”
“Eng. I taekini bwaai aika aki raraoi nakoim, ao I bon riai n aki. Kabwara au bure.”
Pedro e baraaki n taatarai ana kau. “E Raoiroi.”
E a tang te beero. Lucas e waaki n rianna n okira ana kiraati. E a rang n rau nanona. Ma iai te bwai riki teuana ae e kan taekinna. E rairaki n tanrikaaki. “Ti kona ni butibooro n te motirawa ningabongngkana ko tangiria.”
E moangare teutana Pedro. “E tangiraoi anne.”
Imwiin anne, a tabe n nakoraoi bwaai ma Pedro. E bon iowawa naba n tabetai, ma ai tiaki arona are mai imwaaina. E bon takakaro naba ma Lucas tabeua te tai n te motirawa. Ao e bon kaunga! Ni banen te ririki, Pedro e tuanga Lucas bwa e nang mwaing nako. Imwiina e taekina te bwai teuana are e kubanako iai Lucas.
“Ko rabwa ngkai ko riki bwa raoraou,” e taku Pedro. “Riki ngkai I aki rang iraorao.”
E roko te namakin ae rau inanon Lucas bwa arona n akoi n taainako bon te rinerine ae tamaroa.