N Tekateka ni Boowi
Uotakin te Mwaaka ae Korakora nakon te Bootaki n te Nakoanibonga ae te MEREKITEREKA ao te Bootaki n Aine
Kanakoaki iroun Unimwaane M. Russell Ballard man aia Kooram Abotoro ake Tengaun ma Uoman
N au tai ni mwakuri bwa te Abotoro, I a tia n teimatoa ni kabwarabwara te mwaaka ao kakawakin taian kauntira, n ikotaki ma kauntira n titeiki, uoote, bootaki, ao utu. I kakoaua bwa te mwakuri rinanon te kauntira bon te kawai ae moan te nakoraoi ni karekei mwiia aika koaua.
Te namwakaina aei, ti karaoi tabeua bitaki aika bebete ao aika kakawaki n te karikiram ake a kamatebwaiakaki irouia kaain te Nakoanibonga ae te Merekitereka ao te Bootaki n Aine ngkana a kamatebaia aron aia bootaki n oin aia bobotaki ni katoa Tabati. N ikotaki ma kamatebwaian ana taeka te burabeti ae maiu man te maungatabu aika tibwa nako, ti na “tekateka naba inanon te kauntira” (D&C 107:89) ni bootaki ni maroroakin bwaai aika ti kaaitarai ao kainnanora aika ti kainnanoi.
Ngkai ti reirei aron te kauntira n ae na nakoraoi riki, e na kakabwaiaira te Atua ma kaotioti ao atatai aika bati riki ao te mwaaka ae korakora riki ni kakoroa nanon Ana mwakuri.
Imwain ae karikaki te aonaaba aei, e kakoroa nanon Ana mwakuri te Tama are i Karawa rinanon taian kauntira (taraa D&C 121:32). Ni moanakin karikan Atam ao Ewa, a tia ana aomata te Atua ni ukoukora Ana reirei inanon taian kauntira. Ni koauana, E kainetia te Atua nako Ina bwa “Aia Reirei Aomata” (Mote 7:35). Ni moan n boong aikai, Iotebwa Timiti e moanna ni kaoki “tuan te Kauntira n bong ake rimoa.”1 N te bong aei, e tautaekanaki te Ekaretia man taian kauntira ni karinaniia nako.
N namwakaina aika aki maan n nako, taan kariiri ni kabuta n te Ekaretia a tia n reirei aron kanakoraoan bootaki n te Nakoanibonga ae te Merekitereka ao te Bootaki n Aine n te Tabati. Mwiina bon te karikiram ae boou ae atunaki Nako mai, ao Irirai—Ibukin te Nakoanibonga ae te Merekitereka ao te Bootaki n Aine, ae karikirakea kabonganakin bootaki ni maungatabu ni kabuta ao ni karababa mwakan te reirei inanon ara kooram n te nakoanibonga ao Bootaki n Aine.
“Ti a tia ni karaoa ae raoiroi man karaoan bwaai aika iai iroura n taai aika nako,” e taku Unimwaane Christoffel Golden man te Itingaun, are e ibuobuoki ni kaira te bitaki aei. “Ma te Uea e tangiriira bwa ti na waaki rake. E na roko te rikirake mai mwiin te bitaki aei ni kamatebwaia aia taeka burabeti aika maiu ao n tekateka ni kauntira.”
N te tai ae aki maan n nako, te Beretitentii n te Bootaki n Aine ni Kabuta ao kaain te Kaitingaun a bootaki n ni kauntira ni maroroakinna bwa e kanga te bootaki ma te kauntira ni karekea te kaotioti, karikirakea te katiteuanaki, ao ni uota te mwaaka. A anga reirei aikai, atakina ae ko na kateitei iaon iango aikai ngkai ko kunei kaeka aika a eti ibukim, am uoote ke mwaanga, ao am kooram ke te Bootaki n Aine.
Te Mwaaka inanon te Kaantaninga
“Ngkai kamwa tia n ikotingkami ni kabane … , ao ni bo nanomi ni kaineti ma te bwai ae tii teuana aei, ao n tia ni butiia te Tama n arau, eng kam na bon karekei” (D&C 42:3).
Kauntira bon kawai ake ti na kona iai n “ukoukora nanon te Uea.”2 N taekana teuana, e aki tau n tii tibwauai iango; ni bootaki ni kauntira, ti kaoa te kaotioti bwa tiaonga n reiakina te bwai ae tangiria te Uea bwa ti na karaoia n ara kaangaanga. Ti na karekei riki mwaitin nakoraoira ni karekean te aeka ni kaotioti anne ngkana ti uring bwaai aikai:
1. Kabanea nanom iai—moanna ma te bwai ke nanona ae onoti, kee uaana. Kabanea am iango iaon te bwai ke te kainnano ae e kakorakora man ara konabwai ni karaoi kawai aika uaana. Te taratara e buokiira naba n noora are iaon ara kona (tera te bwai ae riki) ao n ukeuke ibukin ataakin aron rikiia (bukin tera ao e kanga n rotiia aomata). Te katooto, ti kona n kauntira arora bwa ti na kanga ni kairiia ao n reitiia ara kairake ma karawa nakon maroroakinan te tai ibukia kairake bwa ana taraa raoi taian tikuriin.
2. Te Taratara—katea te kaangaanga ke te kainnano bwa te titiraki. Atuun te rongorongo ae koreaki bwa kanga te titiraki e kona ni buokiira ni karekei otara aika iai tamnei iai. Ti kona n titiraki, “Ti na kanga n taekina te kaangaanga n te kawai ae ibuobuoki ao ni kamaiu?” ke “Tera te reirei, ae ana oota riki iai, e na buoka katokan te kaangaanga?”
3. Te Mwaaka—ukoukora te kaotioti. Ngkai kauntira a kona ni karikirakea ao ni maroroakin katokakiia, te kantaninga n te kauntira bwa e na ukoukora ana kantaninga te Atua, tiaki ti koreakin kawai aika moan te nakoraoi ake a tia ni kariaiakaki ke n taekinna, “Aio aron karaoana n au uoote are mai imwaina.” N aron are e reirei Unimwaane David A. Bednar man te Kooram n te Tengaun ma Uoman, ti aki kainnanoi bootaki; ti kainnanoi taneiai n atatai aika kaokaki.3 Te uaia n reitaki ni karaoa te kauntira e karekea katokaia aika mwaaka ni kaairaki ma te mwakuri.
Te Mwaaka ni Irakin te Marooro
“Rineia mai ibuakomi te tia reirei, ao aki riai ni bane n riki bwa taan taetae n ti te taina ma e riai n taetae temanna i mwin temanna ao a riai ni bane n ongora nakon ana taeka, bwa aonga ni bane ni karikirakeaki mai irouia ni kabane ngkana a bane n tia n taetae, ao bwa aomata ni kabane a aonga n titebo tibwangaia” (D&C 88:122).
Inanon te kauntira, bwaai aika a mamatenanoia iai aomata nako bon te bootaki—te uoote ke te mwaanga—a roko ni kabane n te kawai ae onoti, ti ngkana a oota ni bwaai aikai taan iria:
1. Iai tabeia ae kakawaki kaain te kauntira n tatabemaniia. A riai kaain te kauntira n rangin ni kaoti aia iango inanona ma tiaki anakin te tai ae rangin ni bati n tain te marooro ni kabwarabwara ana iango ao ana kantaninga ni kaineti ma kaain te kauntira ake tabeman. N aron are e reirei Bauro, “Ao e aki kona ni kangai te mata nakon te bai, E aki kai nanou ngkana akea ngkoe: ao ai aron naba te atu nakon te wae, E aki kai nanou ngkana akea ngkami. Ma moan te kai te nano iai ngkana akea bwain te rabwata aika atongaki bwa moan te mamaara” (1 I-Korinto 12:21–22).
2. Kain te kauntira a ukoukora ni karina te oota. E reirei te Burabeti Iotebwa Timiti “bwa aomata ni kabane, imwain are e karaoa te totoko nakon te bwai teuana are e uotaki nako matan te kauntira ibukin iangoana, a riai ni kakoaua bwa e kona ni karina te ota nakon te bwai anne nakon ae na karekea te roo, ao bwa e na kuneaki ana totoko n te raoiroi.”4
3. Kain te kauntira a ukoukoria bwa ana katiteuanaaki. N aki tabe ma kakaokoron babaire, a katiteuanaki kaain te kauntira ni ukoukoria ni “karekea te kairi mairoun te Tamnei ae Raoiroi.”5 Iotebwa Timiti n te taina e taku n tain te kauntira bwa “karekean te kaotioti ao kakabwaia mai i karawa e riai bwa ti na katikui ara iango iroun te Atua ao ni kamwakura te onimaki ao n riki bwa ti teuana nanoia ao teuana aia iango.”6
Te Mwaaka inanon Babaire ni Mwakuri
“Bwa aonga aomata ni kabane ni mwakuri inanon te reirei ao te tua ibukin taai aika a na roko, ni kaineti ma te inaomata n rinerine ae e riai are I a tia n anganna” (D&C 101:78).
E aki bwanin te kauntira n akean babaire ni mwakuri iaon kaotioti aika a karekeaki. Naake a ira te kauntira a riai ni kaoaki bwa a na karaoi aia motinnano ake a na mwakuri iaoia. “N tokin am kauntira, ko kainnanoia bwa ana iai katabeam,” e taku Titita Jean B. Bingham, Te Beretitenti ni Kabuta n te Bootaki n Aine. “Te moan mwakuri ae kakawaki a riki inanon bobotaki.”
Te tia kairiiri e kaira te kauntira nakon te oota ao te boraraoi. Ngkane teuanne ke neienne e kairiiri ni karaoan ao n tauan mwiin mwakuri ibukin rinanoaia n taai aika ana roko. Titita Sharon Eubank, te Moan Kauntira n te Beretitentii ni Kabuta n te Bootaki n Aono, e reitia: “E mena te mwaaka iroura. Ngkana ti kabaeaki bwa ti na mwakuri, te Uea e na katabui ara mwakuri (taraa D&C 43:9). Te mwakuri n anganano ibukin ao kaokan ribooti iaon katabeara bon te mwakuri ae kakawaki n te berita ae tabu.”
Taben te Tia Kairiiri
“Bwa e aki raoiroi riki te tia kabwarabwara nakon te tia ongora, ao te tia reirei e aki raoiroi riki nakon te tia reireinaki; ao aio are a katiteboaki iai” (Aramwa 1:26).
Ni kanakoraoa ara kauntira, ti totokoi aron kairiiri n te aonaaba. N abanuean te Uea, te tia kairiiri bon “aia kaaunga aomata ni kabaneia” (Mareko 10:44). N aron aei, te tia kairiiri n te kauntira, tao te tia tararua ae kariaiakaki ke te tia reirei, a katauraoi bwaai aika kakawaki ma tiaki te iango ae kakawaki. Teuanne ke neienne e totokoia bwa e na aki riki bwa te aomata ae na taua angiin te taetae ke bairean te kaetieti imwain ongoraeakinana man te kauntira.
Te tia kairiiri n te kauntira e karaoa te mwakuri ae kakawaki ni kamataata te kantaninga, kabebetei maroro, ao ni kaoia taan roko bwa ana karaoa aia motinnano bwa ana mwakuriia. E nakoraoi riki ana mwakuri te kauntira ngkana taan kairiiri n te kauntira a kakauongo, kairi, kaoia, kamanoi, ao ni kamatoai.
1. Kakauongo. Taan kairiiri aika tamaroa a kakauongo nakon te tia taetae ao nakon te Tamnei ae Raoiroi. “I kakoaua bwa te bwaintituaraoi n otam rinanon am namakin e na nakoraoi riki,” e taku Unimwaane Bednar, “ngkana ti kakauongo e kaokoro riki ma are ngkana ti taetae.”7
2. Kairi. Te tia kairiiri n te kauntira e kaira te marooro, ni kariai iango bwa ana taekinaki. E riai, te tia kairiiri ni bita aron te marooro ke ni kairia ma te tangira.
3. Kaoia. Te Uea e tibwaua te kaotioti imarenaia kaain te kauntira. Ni kaoia aomata ni kabane—n raonaki ma taan rawa—n anga iango e karikirakea te kona n ongo ana kantaninga te Uea.
4. Kamanoa. Te tia kairiiri n te kauntira e karekea te tabo ibukin tibwauakin te kamanomano ao te tararua ae tau man tabeakinaia naake a tibwaua ao ni kamanoia man te kakauntaeka ao te motikitaeka. Atuun rongorongo aika a kai rootaki a tangira te kairi ae iangoaki raoi. Bwaai aika a tabu taekinaia a na tiku n aroia.
5. Kakoauai. Ngkai a tibwauai aia iango ao aia kantaninga, te tia kairiiri e kakoauai karinrin man anganakiia te kakaitau ao aekan n iango n reitaki. Te kabebete aei e buokiia aika roko n namakina mwakoron te waaki ni kabebete ao ni kaetiia ni kakoaua bwa aia karinrin e ibuobuoki.
Te Karikiram ae Boou, ao te Motinnano ae Boou
Ma te ririki ae boou aei ao te ae boou e a karokoa tain te motinnano ae boou. Ti kakabwaiaaki ma ana euangkerio Iesu Kristo ae kaokaki. Bon tabera ao ara tai n ukoukora Ana kairi ao ni karaoa Ana mwakuri. Te maneka ni waaki rake aei n ara bootaki n te Tabati n te Nakoanibonga ae te Merekitereka ao te Bootaki n Aine tiaki ti ibukin karekean te reirei iaon te mwakuri; ma ti “tekateka inanon te kauntira” ao ni karikirakei mwakuri aika raoiroi—mwakuri ake a na “ikotiia aomata aika mwaiti nakon Tion ma kunan te kimwareirei ae akea tokina” (D&C 66:11).