Kamatebwaia Ana Taeka te Tia Kamaiu
Iroun Beretitenti Russell M. Nelson
Beretitenti n te Kooram n Abotoro ake Tengaun ma Uoman
Man te rongorongo iaon lds.org/blog.
I aki tii karekea au koaua ae korakora iroun te Uea ao te Tia Kamaiu, Iesu Kristo, ma I karekea naba kamatoaan te tititem are e kabongana Iotebwa Timiti ibukin rairan Ana Boki Moomon bon te bwaintangira mairoun te Atua.
Inanon Tianuare 2017, te bootaki n taromauri ibukiia kairake, I kakaewenakoia naake a mataku bwa a na karikirakea aia koaua iroun te Tia Kamaiu n anaa tabeua te tai ni katoa wiiki n:
-
Kamatebwai bwaai ni kabane ake e taekini Iesu ao ni karaoi ake a koreaki n te O Tetemanti.
-
Kamatebwaia ana tua ake a koreaki n te Nu Tetemanti.
-
Kamatebwaia Ana tua are e koreaki n ana Boki Moomon.
-
Kamatebwaia Ana taeka ake a koreaki n Doctrine ao Covenants:
I berita bwa naake a kakauongo bwa ngkana a waakinako n reiakini ni kabane ake a kona n rongorongon Iesu Kristo, aia tangira ibukina ao ibukin ana tua te Atua a na rikirake n ae riaon are a kona n iangoia.
Te bwai are I aki taekinna n te marooro aei bwa I ataia bwa aio te berita ae koaua ibukina bwa I mena i nuukana katiaan te mwakuri naba anne n te moan tai.
N Ritembwa 1, 2016 I karekea au koroboki ae tabu ae bwanin ao I waaki ni karaoa te mwakuri naba anne are I a manga anganiia kairake inanon Tianuare. Ngke e bane tabeu anne onoua te wiiki imwiina, I a tia n noori 2,200 kibu ake a kabonganaaki man booki ake aua n booki aika a tabu.1
Irou, te kona ni katia te tibwanga aei bon te bwai ae moan te kakukurei.
Te bwai ae I kunea bwa e rang boongana bwa te Tia Kamaiu e tuangiira rongorongona rinanon taai aika a kakaokoro—O Tetemanti, Nu Tetemanti, tain Kaokanbwaai, ao n ara bong. Ni booki ni kabane ni koroboki aika a tabu, te rongorongo bon titebo ao te Tia Karaki bon titebo naba.
I a tia ni kabanea mwaitin au ririki aika 93 n reiakina taekan te Tia Kamaiu, ma e karako te tai ae I kona iai n reiakina ae mwaiti ngke I karaoa aio inanon onoua te wiiki. Ni koauana, I reiakina ae mwaiti n rongorongona man te kamatebwai aei are I baireia n tibwaia n au marooro are I katauraoi iai ngkai.2
Ni moan karaoan te beku aei, I aki kantaningaia bwa te kamatebwai aei e na buokai ni karekea au koaua n ana mwakuri Iotebwa Timiti mai karawa—ma e reke! Te kaotioti are e raweaki iroun Iotebwa Timiti ao te atatai are e kuneaki n te Baibara bon bwaai aika a ririki. E bon rang kakukurei irou n nooria bwa aio au kamatebwai.
Iotebwa Timiti e bon aki kona n reke ana tai ni kaai n noori ao ni katitebooi ma te Baibara n te tai ae tawe n te tai are e raira iai Ana Boki Moomon—ma a bane ni mena ikai!
Ngaia are I aki tii karekea au kakoaua ae korakora riki iroun te Uea ao te Tia Kamaiu, Iesu Kristo, ma I karekea naba kamatoan rairakiu bwa te tititem are e kabongana Iotebwa Timitin raira ana Boki Moomon bon te bwaintangira mairoun te Atua.
Ngkai, I a ataia bwa tabeman mairoumi a bae n inangoia bwa ko bon aki kona ni katia te tibwanga ae aekakin aei.
I ataa aron am namakin. I iangoa naba anne—ae akea te anga ae ti na kona iai ni karaoi aikai ni kabane. I riai ni kauringai bwa te taetae n aron aei bon tiaki te te taetae ae karikirakea te onimaki. Te taetae ni kakorakorakin te onimaki e na kangai “I ataia bwa akea au tai ibukin aei, ma N na karekea taina. Ao N na kakoroa bukina n taina are e kona n reke.”
Ngaira n tatabemaniira nako ake ti butimwaea te kakaewenako aei e na bon bane n oin ara tai. Irou, kakukurein riki aei bon man katiaana inanon ti onoua te wiiki. Te kamatebwai inanon te ribwantai aei inanon te tai ae uarereke e reke iai irou kakaitauan aron bwaninin te reirei are I karekea inanon te O Tetemanti, Ana Boki Moomon, te Nu Tetemanti, ao Doctrine ao Covenants:
Nakoimi ake kam namakinna bwa akea ami tai, ngkana kam anganano, kam na bon anganaki kaniwangami ao kam na bon rang ni kukurei ibukin bitakin ami kantaninga, karikirakea am atatai, ao ni karekea rairakimi ae nano. I ataia bwa e koaua aei ibukin bwa I a tia n noora aekakin te kanuanga anne inanon maiu.
N aron are I taekinna n tain te bootaki n taromauri, ni boong aika a na roko, ko na tei imatan te Tia Kamaiu. Ko na bon kukurei ni kaonaki ma rannimatamngkana ko roko n tei imatana. Ko na inimaki ni kakai taeka ni kaitaua ibukin kabooan am bure, ibukin kabwaraan am bure n arom n riibuaka nakoia tabeman, ibukin kamaoan manekan ikoakim ao motibuakan te maiu aei.
Ti na kaitaua ibukin kakorakoraakim ni karaoa ae aki kona ni karaoaki, ibukin rairakin te kabwaka nakon te korakora, ao ibukin karekean am tai ni maeka ma ngaia ao am utu n akea tokina. Kinaakina, Ana Mwakuri ni Kamaiu, ao Anuana e na riki bwa anuan maium ao e na koaua nakoim.
Ma koa riai n aki tataninga ni karokoa nningai ngkanne. Rineia bwa ko na riki bwa Ana Reirei ni koaua ngkai. Ko na riki bwa temanna are e tangiria ni koaua, are e tangiria ni kan beku ibukina ma te koaua ao ni kairiiri n ai Arona. I berita bwa ngkana ko kamatebwaia Ana taeka, am konabwai n riki n ai Arona e na rikirake. I ataia e koaua aei.