Kaaro ao taan kairiiri irouia kairake, Ngkoe, Kairake, ao te Botoniango n te Miutuo
E na kanga te botoniango n te miutuo n reitiira?
Ni katoa ririki Beretitentii ni Kabuta n te Bootaki n Ataenimwaane ao n Ataeinnaine a kaoia kairake bwa a na kamatebwai, n reiakina taekan, ao ni maiuakina te botoniango man booki aika tabu are e a tia n kariaiakaki irouia kaain te Moan Beretitentii. N reiakinaki ao ni maiuakin reirei n te botoniango n te Miutuo a kona ni kakorakora te onimaki ao kakoaua ao ni boboota te kooram, kiraati ao utu.
Te Botoniango n 2018
Te botoniango n te ririki aei e reireiniia kairake ni kunea te rau are e roko mairoun Iesu Kristo. N Doctrine ao Covenants 19:23, e kakao te Uea, “Reirei Mairou, ao ongo n au taeka; nakonako n nimamannein Tamneiu, ao kona karekea te rau mai irou.” N te aonaaba are e kona ni kaonaki ma te nanououa ao te maaku, aio te berita ae korakora.
Te boki ae tabu aei e anganiia aia tai kaaro, taan kairiiri, mataniwi aika mwaatai, ao taan reirei n reireiniia te banna are e na kona n reireiniia kairake rinanon taai ni kaangaanga.
N na Kanga ni Kabongana te Botoniango Aei?
Beretitentii n te Botaaki n Ataeinnaine ao n Ataenimwaane a kaoira bwa ti na kamatenikunai booki aika tabu, ni kamatebwaia te tua, ao ni maiuakin reirei inanon maiura. E ngae ngke a kona ni karaoaki bwaai aikai n ae onoti, karaoakiia ni kabane a kona ni buoka ni bobootia ao ni kaungaia kairake ao aia utu.
A mwaiti taai n reita te botoniango aei nako nanon maiuia kairake. E kona ni kabonganaaki ni bootaki te utu n te tairiki, n taian reirei n te taromauri ao n te tieminari, bwa atuun te reirei ibukin aia tai n taetae kairake n te bootaki n toa, ni katamaroai waaki ni kaukuuki n te Miutuo, ao ni katauraoi nanora ibukin aia waaki ni kakukurei kairake, n raonaki ma te kaembwa, maungatabu ibukiia kairake, ikotakin waaki ni kakukurei. Te Moan ni Waaki, ao bootaki n taromauri.
Tabeua Iango ibukin Waaki ni Kakukurei
Akana imwiina bon tabeua iango ibukin reireitan te botoniango ibukin te Miutuo ni kabuta te ririki. Ibukin tabeua riki rongorongona, kawara youth.lds.org.
“Reirei Irou”
N reiakina taekan Iesu Kristo e kakawaki kunean te rau Irouna. Iai te rau ao te kakoaua n ataakina bwa aekakira Ngaia, n reiakinna bwa E kanga ni maiu, ao n oota bwa tera ae E karaoia ibukira.
Ngke 14 ana ririki ni maiu, e titirakinaki Beretitenti Spencer W. Kimball (1895–1985) ngkana e a tia ni wareka te Baibara mai moana ni karokoa e bane. “I a tia ni wareki booki aika mwaiti n te tai anne, beeba aika kangare, booki aika mmanii, ma e taku nakoiu nanou ae tataumwanta, ‘Ngkoe, Spencer Kimball, ko bon tuai wareka te boki ane tabu anne. Bukin tera?”1 Man te tai anne, Beretitenti Kimball e karaoia bwa te moanibwai ni “kakukurei ngkami n ana taeka Kristo” (2 Nibwaai 32:3).
-
Iangoia n titirakiniia kairake bwa a na kawakina aia boki ni koroi bwaai ake a reiakin n rongorongon Iesu Kristo ao Ana euangkerio.
-
Ko na bae ni kaoiia kairake ni motinnanoia n anaa ana kakaewenako Beretitenti Russell M. Nelson ni “katabui mwakoron [aia] tai ni katoa wiiki ni kamatebwai bwaai ni kabane ake e taekin ao ni karaoi Iesu n aron are e koreaki inanon [booki aika tabu].”2 Inanon te kiraati ke ni bootakin te utu n te tairiki, ko kona ni butiia bwa a na anga aia ribooti iaon bwaai ake a reiakin ao a kanga ni kamwakuri inanon maiuia.
Bwaai n Ibuobuoki
-
“Te Kristo Ae Maiu: Aia Koaua Abotoro,” Riaona, Eberi 2000, 3.
-
Russell M. Nelson, “Drawing the Power of Jesus Christ into Our Lives,” Riaona, Meei 2017, 39–42.
-
David A. Bednar, “A Christlike Character,” Riaona, Okitobwa 2017, 50–53.
“Ongo n Au Taeka”
N ongo n ana taeka te Tia Kamaiu e raonaki ma tiaki tii te ongora ma ni kakauongo (ke n ongotaeka). Te rau ae korakora ao te kakoaua a kona n roko man ataakina bwa e booraoi maiura ma Ana reirei.
Ngke waniua ana ririki ni maiu, e baireia Beretitenti Thomas S. Monson bwa e na kaembwa irarikin te ai ma raoraona ae Danny. Tii iai teuana te kaangaanga—te marae are a kan kabongana e bon mwautakataka, kai rootaki, ao e onrake n te uteute. N te tai anne iai ana iango Beretitenti Monson: “I taku nakon Danny, ‘Ae ti kainnanoia bwa ti na karaoia ti na kabuoki uteute aikai n te ai. Ti na tii kabueka te mronron inanon te uteute!’ E rang ni kariaia, ao I biri nakon ara kaebin n anai tabeua matiati. …
“… I iangoia bwa e na aki ura te ai tii ngkana ti tangiria ao tao ngkanne e na bon mate urana i bon irouna.
“I kakiaa te matiati iaon te atibu ao ni kabuoki uteute iaon te ai.” I waekoa n ataia bwa ngaia e aki kona ni mate te ai i bon irouna, a biri ataeinimwaane ibukin buokara, ao e a tibwa mate te ai imwiin tabeua te aoa mwakuriana.
“Ngai ao Danny ti reiakin kaangaanga tabeua ma reirei aika a kakawaki n te bong anne,” e taku Beretitenti Monson, “man te bwai ae uarereke bon man kakaawakin te ongotaeka.”3
-
Butiia kairake bwa a na kamatebwaia te ongotaeka ni mwakoro 6 man Tataekina Au Euangkerio, n raonaki ma te ongotaeka ni mwakoron te anua n te waaki ni kakukurei n tokin te mwakoro.
-
Maroroakin iango ake ngaia ake a na kona ni katabetabeira n ongo ana taeka te Uea. N aron te katooto, ko kona ni kaoiia kairake n onea mwiin te tebwina ni miniti iaon bwaai aika maiu n te iti ma te tebwina ni miniti ni kamatebwai booki aika tabu.
-
Kabonganai taai aika ko taneiai iai n titirakiniia kairake bwa tera ae a na karaoia ibukin man bwaai aika a tia n reiakin.
Bwaai n Ibuobuoki
-
“Ongotaeka,” Tataekina Au Euangkerio: Te Kairi nakon aia Mwakuri n Ibuobuoki Mitinare (2004), 122.
-
Hadley Griggs, “Ten Minutes a Day,” Riaona, Tebetembwa 2017, 58–61.
-
Robert D. Hales, “Ngkana Kam Tangirai, Kawakini Au Tua,” Riaona, Meei 2014, 35–38.
“Nakonako n Nimamannein Tamneiu”
Te reiakinaki ao te ongora e kabwarabwarai bwaai ake ti riai ni karaoi. N nakonako n nimamannei Tamneina aei aron ae ti riai ni karaoia.
N nimamannei nanona “keiakinan te maraki ma te taotaonakinnano ao n akea te un,”4 te bwai are e kainnanoa te korakora ao te nanorinano. N 1838, Thomas B. Marsh, te Moan Beretitenti n te Kooram n Abotoro n te Tengaun ma Uoman, e kitana te Ekaretia, n tii ngaia ibukin unna ngkai taan kairiiri n te Ekaretia a aki boutoka kainnabana n ana kauntaeka ibukin ana miriki. N ana ririki ake imwiina, e bwaebwaeti ni kabuakin taian kakabwaia ao e okira te Ekareita, ao e taku: “N mwaitin te tai I tangiria ni kan ataia bwa e kanga n riki bwakau bwa moan [kitanan te koaua] irou, ao I a roko n tokina bwa I kabua Tamnein te Uea mai inanou. …
“… I namakina te un ao te bononnano; ao e a moanna ni kitanai Tamnein te Uea, n aron are e taekinaki ni booki aika tabu, I kamatakiiaki.”5
-
E aki beebete maiun te Tia Kamaiu. Kakaei katooto inanon booki aika tabu n taai ake e kaota iai te nimamannei Iesu ni kaitara ma taian kaangaanga. Maroroakinna ti na kanga ni kamwakura ana katooto te Tia Kamaiu ni bwaai ake ti na kaitara ma ngaai ni boong aikai.
-
Teuana te kawai ni kan riki nimamannei bon man te beku ibukiia aomata. Iangoi tabeua mwakuri n ibuobuoki ake a kona ni karaoi kairake n tii ngaiia ke n te kurubu.
Bwaai n Ibuobuoki
-
Ulisses Soares, “Be Meek and Lowly of Heart,” Riaona, Nobembwa 2013, 9–11.
-
Neal A. Maxwell, “Meekness—A Dimension of True Discipleship,” Ensign, Maati 1983, 70–74.
“Ko na Karekea te Rau Mai Irou”
Te rau e kona n nanonaki ni bwaai aika kakaokoro nakoia aomata aika kakaokoro—te kantaninga bwa te kamaiuaki e kona n reke, n te koaua are iai te kawai rinanon taai aika kaangaanga, ke ni kakoaua bwa ti mena n te kawai ae eti.
-
Kakaei rongorongo bwa a kanga tabeman ni kunea te rau iroun Kristo n Mormon.org/easter ao n iteraniba 60 ao 63 man te rongorongo aei. Ko na kanga ni kunea te rau?
-
Iangoia ni mataku n tamnein te Itita 2017, “te Uea n Raoi,” n Mormon.org/easter. Ko kona ni kaoiia kairake bwa a na tibwaua te tamnei aonraain ma aia koaua bwa a kanga ni kunea te rau iroun Kristo.
Bwaai n Ibuobuoki
-
W. Christopher Waddell, “A Pattern for Peace,” Riaona, Meei 2016, 90–93.
-
Quentin L. Cook, “Personal Peace: The Reward of Righteousness,” Riaona, Meei 2013, 32–36.