Bwanaaia Aika Itiaki ni Bong Aika Kaitira
Kaekaakin Ara Tataro i Marenara
Kamataata n te tamnei iroun Allen Garns
E nang bon bane au mwakuri ni mitinare i illinois Chicago n te Mition are i Maiaki ngke I karekea te kariaiakaki ae onoti ni kawara te tabo ae I a tia ni kawaria mai imwaaina ni kaitairiki ma ana utu Tremillo. I a tia ni makuri n aia uoote teuana te ririki ae bwanin ao I a rang kinaia.
N tain te katairiki, te Tari Tremillo e kaungai bwa N na tibwa teuana te rongorongo ni kakukurei iaon kawaiu n okira mweengau. E taku bwa te Uea e na katauraoa temanna iaon te kiba are N na toka iai are e na kainnanoa au ibuobuoki. I berita nakoia bwa N na karaoia.
Man te tai anne ni karokoa te tai are I kiitana iai Chicago, I tataro bwa N na karekea te kamatoaki bwa te Uea e na butimwaea au anganano ibukin karaoan au mition.
Teniua te wiiki imwiina, I toka n te wanikiba are e na uotai n okira mweengau. Ngke I kaea au kaintekateka, te aomata are e tekateka irarikiu e tararake n taraai. “I aki kakoaua!” E taku neienne. “I aki kona ni kakoaua!”
Au moan iango, “E tamaroa, neiere e riribaia kain te Moomon!” Ngke I tekateka, e tuangai bwa arana Kelly ao e a tibwa rairaki. E kaota aron kukureina ngkai e tekateka irarikin te mitinare. Kelly e karakinna nakoiu bwa te kabanea n aomata are e tekateka irarikina bon te aomata ae ririba te Moomon ao e akea ana katei are bon anne arona ngke e moan karekea ana onimaki. E rang n un Kelly ao e kau titiraki. E a tia ni kataia n tatataro ibukin kaekaan ana titiraki ao te karaunano.
I tataro inanou ao I kaota koauan te euangkerio ao ana tangira te Atua ibukiia Natina, n ikotaki ma neiei. I tuanga ana taeka te Tari Tremillo are e anganai. I taekinna bwa te Atua e a tia ni karekea te tai ae onoti anne bon tii ibukina.
Ma rannimatana, Kelly e karabwaai. E taku naba, “I kona n tuangko bwa bon te mitinare ngkoe ae tamaroa ao te Uea e butimwaea am anganano.” N te tai anne, I namakina ana tangira ae nano te Atua nakoiu. E a manga boo au tai n tang. Ma rannimatau, I karabwa Kelly ao I tuangnga bwa bon ngaia kaekaan au tataro. I kaekai tabeua riki ana titiraki, ao ti kaai ni kaabibitii ara aetureti n te imeeri.
E tiku ara wanikiba ao ti uaia ni kaboo ngke e kaea kibana are imwiina. I kakaitau n taai nako bwa Tamara are i Karawa e tatauraoi n taai nako ni kakabwaiaiara n aaro nako n aekan aei.