Te Moantaai n Okira te Mweenga N Aron Are e Baireaki
E maeka te tia korokaraki i Arizona, USA.
A mwaiti kawai n reitanako te beku ibukin te Uea ao ni kakaea te bwai ae na tibwauaia imwiin okiran mweengana ni moantai man te mition.
A uaia ni karaoi aia mition au karo. Ngke I kairake i ongo aia karaki n aia mition ao n inagoia (ma te ingainga n nano ae korakora) ibukin te tai are N nako iai ni beku ibukin te Uea bwa te mitinare ae bwanin ana tai.
Te katauraoi ibukin au mition bon teuana mai ibuakon au tai ae moan te kakawaki ni maiu. I a rangin ni kaan riki nakon te Uea n aron are n taai aika nako. I karekea weweteakiu ni mitinare nakon te Budapest Hungary Mition ao n rin n te Provo Missionary Training Center (MTC), ao n rangin n tauraoi ni kabanea au kona ni mwakuri korakora ibukin Tamau are i Karawa.
Menau n te MTC bon te atatai n tamnei ae moan te tikiraoi ibukiu. Ngkai I rikirake ni kaan nakon te Uea, I tataro ma te koaua bwa I tauraoi ni karaoi bwaai ni kabane ake E na tuangai ao ni berita bwa n na tangiriia kain Hungary ma nanou ni kabane.
Nang rorokotokin au kataneiai n te MTC, e roko Irou te aoraki. Imwiin te tai ae uarereke ni mweengau ni kamarurungai, I anganaki te tai n reitanaako au mition nako Hungary. I katukaki irarikin te tia kataneiai ae tikiraoi, Titita Sunshine Nestor, are e reireinai bwa n na kanga ni kina ana nanoanga ao ana kakai te Uea aika teimatoa.
Imwiin tabeua te namwakaina, I a manga aoraki naba. E ngae ngke Titita Nestor ao Ngai ti reitinako ni mwakuri nakon ara kabanea n tamaroa, N na riai ni manga okira mweengau riki.
N au iango I a tia ni uotarikaaki te Uea bukina bwa I a tia n aki karaoa te mwakuri ni mitinare ae “bwanin”. E warenako nanou bwa ana iai riki kaain Hungary ae N na “riai n tia” n reireiniia ngke arona bwa I aki aoraki. I aki koaua iai ngkana e aki tau au onimaki are N na kona ni kamaiuaki iai bukina, bwa te Uea e kamanoia Ana mitinare. I a tia n aki iangoia bwa au anganano nakon te Uea e na aki ti anga teuana ma te iterana te ririki ni maiu, ma n anganano n te aeka ni mition ae I a tia ni kantaningaia.
Au Kakaae Ibukin te Bwai ae n na Karaoia n te Mweenga
Ngke I otinako man te wanikiba n okira mweengau, akea te bwai ae I kona ni karaoia ma I taku bwa I a tia ni katuka te mwakuri ae moan te kakawaki ni maiu n te tabo ni mitinare. E anaa te tai, ma I taku bwa iai te mwakuri n te mweenga are e na uota maiu nakon ae uaana naba.
N aki tabe bwa tera bukina ngkai ko a oki man am mition ni moantaai n aron are e kantaningaaki, iangoia n te bong aei bwa ko na karaoa te taneiai aei bwa te mwaneka ni waaki rake n am waaki, ma tiaki te mwaneka ni kerikaaki. I oki nakon mweengau ibukin te aoraki, ma tabeman a oki nakon mweengaia ma bukina aika kakaokoro, n aron uruakan taian tua. N tokina, tabeua iango aika inano a na aki kaineti nakon am kaangaanga. Tataro nakon te Uea ni kakaai kawai aika ko na beku Ibukina man te mweenga. Te katooto, ngkana ko okira mweengam ibukin uruakan te tua ao n tuai n tau n nakon te tembora, ko bon kona ni kakaai kawai n aron kona nanakonako irarikin te tembora ao ni motinnanoia bwa n te bong teuana ko na oki nakon Ana auti ae tabu.
Irarikin warekan au boki aika tabu, tataro, ao nakon te taromauri, kawai aikai n tatabeua nako a kakawaki nakon kamaiuakiu.
1. Kateimatoa te Reitaki (ma aomata man te mition)
Au moan ni kawai ni kakaea nanona ni maiu bon kateimatoakin au reitaki ma Aika Itiaki ao mitinare n te tabo ae Hungary. Tabetai, I ingainga n tataninga ibukin boong ni katauraoi ngkana N na karekei au imeeri mairoun Titita Nestor ao toau n au MTC. N na kaotia; n tabetai e aki bebete warekan ana mition toau ke n taetae ma kaain Hungary ae I mitiniia n ae korakora. Ma ngkana I tanrikaaki ngkai, I kunea bwa e kakamaaku nakon kamaiuakiu n ongo taekan kakai aika riki ikekei.
2. Intekiting Iaonrain
Tariu ae uarereke riki, e karaurau n anaaki nanona iroun tinanan ae wanawana, e ana nanou bwa n na moana te intekiting. Ni moanakina I boboti aara ni kakukureia, ma n te bong teuana te tia kawakin araia kaain Hungary e uoti iaon au tikuriin. E roko iaou te Tamnei ao n reireinai are I bon teimatoa ni kona ni buokiia tamneia kaain Hungarian nakon Kristo—man buokaia aomata ake a kaman tia ni mate!
3. Katean Kouru
Imwiin te mition, au kouru ni kabane n au mition are mai imwaina e taraa n aki kona ni korobukina n aronaorakiu ae boou. Ma te tai I kunea bwa iai kouru ake I konai ni kakoroi bukiia ngkai iai te aoraki. I atong kouru n aron warekan ana “kouru” Iesu te Kristo ake a kona ni kakoroaki bukiia ngkai I wene ao ni mwakuri iaoia ni katoa bong.
4. Oki Rikaaki nakon te Reirei
Teuana au mition n au kouru bwa N na karekea am beeba man te kaoreti. Ngkai i kaei kiraati e na bae ni kaangaanga ma aorakiu ma e bon teimatoan tangiran karekean au tai ma te taokita, e kaungaai au karo bwa n na anai kiraati Iaonrain man te Brigham Young University Independent Study. Tiaki ti aei te kouru ae kona ni kakoroaki bukina, ma I kunea naba bwa tao I kona ni karaoi kouru riki tabeua n te mition are imwaina nakon are I a tia n iangoia bwa a kona.
5. Karaoan te Beku n te Mition Iaonrain
N te bong teuana n te taromauri, e mwananga te titita nakon tinau ao e taku, “Ko ataia ae e kona Destiny ni beku n te intekiting mition Iaonrain?” Te kaeka ae aki kantaningaki aei bon te kaeka man au tataro. E reke au tai ni beku ibukin te Uea inanon ruaiwa namwakaina bwa te tia boutoka n te Ekaretia n te intekiting-ibuobuoki ni mitinare. Aio te mition ae I kona ni karaoia!*
6. Te Katauraoi n te Angareirei n te Mition
Ngke I a moanna n nakoraoi riki n tararua aron aorakiu, I moana au kamatebwai n te kaoreti n te kaomiunite ngkai I karaoa au mition Iaonrain. I tuangaki bwa n na reirei aron te katauraoi n te mition n te intitute ae kaan. Te angareirei e buokai ni kinaa bwa nanou ibukin te mwakuri ni mitinare e a tia n aki kerikaaki ao bwa e a tia au mition ae uarereke taina n anganai taneiai aika mwaiti aika a kona ni kakawaki ibukin au ataei n te reirei.
7. Waorantiia n te MTC
Imwiin nakoraoin irakin te timetita n te kaoreti ae kaan ma mweengau, I mwaing nako Utah, USA, n rin n te BYU. N te moan tai, I kuri n aki kona n nakonako irarikin te Provo MTC n akean te namakin n namakina tawen rokon namakin aika a kakaokoro. Ma I moana te mwakuri n ibuobuoki ni katoa wiiki n te MTC ao ni kunea bwa e buokai ni kamaiuai ni kaitibo ma mitinare aika tikiraoi aika a tia ni kanakoaki nakon au Hungary ae tangiraki.
8. Karaoan te Mwakuri n te Tembora
Te aine ae kaain Hungary, Edit, are e a tia ni katauraoi e kaniia 150,000 aara ibukin te tembora e tuangai bwa n na anai tabeua ana aara nakon te tembora. Bon te kakimwareirei karaoan otenanti ni kamaiu ibukiia kaain Hungary aikanne!
Karaoan Raoi Te Kamaiu Rinanon Ana Mwakuri
Te mwakuri ni mitinare bon te bwai ae I a tia n tangiria ni kakoroa nanona mi maiu ao, ni koauana raoi, I namakina te rawawata ngke I okira mweengau ni moantaai nakon are e kantaningaaki. Ibukin te tai, I kekeiaki n taetae iaon au mition. N na tokanikai iaon namakin ni kabwaka. N na riai n reiakinna bwa N na kanga ni motika kakawakin au mition man nanou ni beku nakon manin au tai. E ngae ngke I aki namakinna n te tai anne, kawai ni kabane aikai aika iai nanoia ni maiu e uota naba te kamaiuaki.
Inanon ririki I raraoma bwa okiran Hungary e na bon kaangaanga ibukiu n te kakai rootaki. Ngkana I mwananga raoi nako ikekei, bon tiaki te kauoua ni bong are I kunea bwa N aki namakina te maraki, I namakina naba te kimwareirei ae korakora n oki. I ataia ngkanne bwa e a tia n anganai te Tama are i Karawa te tai n namakina mwaakan ana Mwakuri ni Kamaiu te Tia Kamaiu. I ataia ngkai bwa rinanon ana Mwakuri ni Kamaiu Iesu Kristo, bwaai ni kabane ana bane ni kaetaki n tokina.