Butibooro, Tabati, ao Kabwaka n te Maiu n Tamnei
Ibukin Will, n rineia n aki takakaro ni bongin te Tabati nanona ko rineia n aki takakaro n teuana mai buakon tiim aika tamaroa.
Ngke I uarereke, Ngai ma raoraou ti takakaro n te takakaro ae arana te “Kiba ke te Tebo.” Ni bon arona, tii te bwai ae ko kainnanoia bon te rawa ae nano ke te nei ao te bwai ae ko na kibaria, n aron te kaibetia n tebo. Arom n takakaro, ko kiba nako nako aon te kaibetia n tebo. N te tai naba anne, e takarua temanna, “kiiba,” are nanona a riai moa n roko waem n te ran, ke n “tebo,” are nanona a riai moa n roko baim n te ran, n am tai n tebo.
Ngkana ko kataia ni kakamwaingaki ni menam n te eea, ko na bqa te bwai are e kabotauaki ma te amwarake are e karaoaki man te burawa ae kiribwabwaoua ke te kabwaka n te maiu n tamnei.
Te maiu tiaki kanga aron te takakaro ni “Kiba ke n Tebo.” Ko kona ni karaoi babaire aika mwaiti ni moantaai ao n totokoi kabwaka n te maiu n tamnei. E aki kangai te burabeti n te O Tetemanti ae Iotua, “Rineia n te tai ae waekoa imwaain ae e na rang oimwii.” E taku, “N te bong aei kam na rinea ae kam na toro irouna” (Iotua 24:15; e kairaki ma katuruturuana).
Will W., 14, mai San Francisco, California, USA, tao e aki kabwaka n te maiu n tamnei ibukina e kakoaua karaoan rinerine imwaain te kabanea ni miniti.
“Ngkana ko karaoa te rinerine ni karaoa ke n aki karaoa te bwai teuana imwaain kaotina, e na taraa ni bebete bwaai,” e taku. “Iangoia ko nako n te bootaki ao temanna e anganiko te mooi te kamanging. Ngkana ko na rinea te eti n anaia ke n aki, e na bae n riirii nanom n anaia. Ma ngkana ko a kaman baireia n te tai ae maan ni kangai tiaki nakon temanna are e na anganiko nimam, ko bon onimakiniko n am babaire. E na akea te tai ae e na kariiriiaki iai nanom. Ko na bae ni kangai tiaki ibukina bwa ko a kaman baireia n te tai ae maan.”
Te Botoniango n te Miutuo n 2018 e kangai, “Reirei Mairou, ao ongo n au taeka; nakonako inanon nimamannein Tamneiu, ao kona karekea te rau irou” (D&C 19:23). Ibukin Will, te rau nanona namakinan te onimakinaki ngkai e rinea te eti ao n aki raraoma ibukin aia taeka ni kabuakaka tabeman. Te rau anne e roko nakon Will man karaoan te babaire ni kakauongo nakon—ao n ongotaeka—n ana taeka Iesu Kristo ni moantaai.
“N tabetai ataei a bwainingareai ibukin te bwai are I karaoia ke n aki karaoia, ma I aki tabe iai ibukina I baireia n te tai ae maan bwa anne aron ae N na maiuakinna,” e taku.
Teuana te bwai ae e a kaman baireia Will ma ana utu n te tai ae rang maan bon kawakinan te bong ae te Tabati n tabuia. Anne te kaangaanga ae uarereke ngke e tokanikai ana tiim Will n te butibooro. N aron are e taku Nibwaai, “E na bon aki anga te kaetieti te Uea nakoia natiia aomata, ma ti ngkana e a tia ni katauraoa te kawai ibukiia are a na kona iai ni kakoroa bukin te bwai ae tua nakoia bwa a na karaoia” (1 Nibwaai 3:7).
Nakon Will, te butibooro bon teuana mai buakon bwaai aika kakawaki inanon maiuna. E taku tinana, “bwaai ake e karaoi Will a irekereke ma te butibooro ibukina bwa e tatangira te butibooro. Bon mamaten nanona ae e rang ni bwakuaku iai.”
Ngaia are ngkana e kaoaki Will bwa e na ira te tiim n takakaro n te aono, e taonako kukureina. Tii te kaangaanga: angiin ana tai n takakaro te tiim a boo n te Tabati. Angiin te tiim a aki butimwaea te tia takakaro ae e na tiku n te Tabati. N rineia n aki takakaro n te Tabati nanona e na kona ni kabuaa ana tabo n te tiim.
Ma e a kaman karaoa te babaire anne Will n te tai ae rang maan. E na kawakina te bong ae te Tabati n tabuia.
Will ma ana utu a kaai n tataro ni kabane ao ni butiia te Tama are i Karawa n nanoia ni kan kawakin Ana tua ao ni bubuti Ana ibuobuoki. Ngkanne Will ao tinana a marooro ma kouti man taian tiim ibukin aia koaua. N aron miimiia, taian kouti a tangira Will bwa e na kaaina te tiim e ngae ngke e aki takakaro n te Tabati!
“I ataia bwa ngkana I karinea te Tabati, N na kakabwaiaaki,” e taku Will. “I bae n aki takakaro n angiin te takakaro n aroia tabeman, ma I a tia n noori kakabwaia, n aron takakaro ake a boo n te Tabati a waekoa naba ni bitaki nakon te bong teuana. I taku bwa e nakoraoi au takakaro ibukina iai au bong ni motirawa.”
E rikirake n tamaroa. E waekoa ni kunea Will bwa temanna kaain ana tiim bon kaain naba te Ekaretia. Tabeua te namwakaina ni kaai n takakaro, te ataeinimwaane temanna e katootonga Will ao e aki naba takakaro n te Tabati.
Ngkana ko namakinna bwa ko aki karekea te kakabwaia n te ongotaeka, tao ibukina ko aki kona n noori bwaai ni kabane ake e katauraoi te Tama are i Karawa ibukim. Ni karaurau ni kakauongo nakon ana taeka Kristo ao ni beku ibukin te Uea bon te babaire ae eti n taainako, ngaia are karaoa te babaire anne ngkai!
“I butii ngkami bwa kam na karaoa te babaire ikai, ngkai naba, n aki tibanako man te kawai are e na kairiko nakon ara kouru: te maiu ae akea tokina ma Tamara are i Karawa,” e taku Beretitenti Thomas S. Monson (“The Three Rs of Choice,” Riaona, Nobembwa 2010, 68).
Tai karaoa maium bwa kanga aron te takakaro ni “Kiba ke n Tebo.” Tai karika maiun tamneim n te kabuanibwai ke n aekakin nako kabwaka n te maiu n tamnei. Rineia naba mangkai n iriira Iesu Kristo ao ni kakukureiko n te rau are E uotia nako nanon maium.