Ni Karokoa Ti A Manga Kaitiboaki
Te Kantaninga Ibukin te Karikibwai
Man te “Celestial Marriages and Eternal Families,” Ensign, Meei 1980, 15–18. Tibeering ao bwangtueition a katiteuanaaki.
Ti kona ngaira n tatabemaniira nako ni karika mweengara bwa karawa iaon te aba.
Ti a iangoa … te kaantaninga ni karikan te aonaaba. E kamatataaki ni booki aika tabu bwa te kantaninga ibukin karikan aonaaba bwa e … na katauraoa te tabo ibukiia natin te Atua mwaane ao aine n te maiu aei ao ni kakoauaia bwa a tau, rinanon kawakinan taian tua, n oki nako matan te Atua man taabo ake a roko mai iai.
Imwiin karikakan te aonaaba, “Ao E taku te Atua, Ti na karaoia aomata ba ai arora, ni katotongira. …
Ao te Atua E karika te aomata ba katootongana, E karikia ni katotonga arona; E karikia ba te m’ane ao te aine.
“Ao e kakabwaia nakekei te Atua; ao E taku te Atua nako ia, Kam na bati ni kariki, ao kam na kabatiaingkami, ao kaona aonaba, ao katea ana kai;” (Karikani Baai 1:26–28).
Ngke e karika te aine te Atua ao ni kaira neienne nakon te mwaane, ao e taku:
“Ma ngaia ae e na kitana tamana ma tinana te aomata, ao e na nim ma buna: ao a na riki n ti te irikona nakai” (Karikani Baai 2:24).
Eng, te mare e kariaiakaki iroun te Atua, ao imwiin te moan kaongora anne nakoia bu mwaane ao aine, ti kunei koroboki aika tabu riki tabeua bwa te bwai ni kakoaua ae a riki mwaane ao aine bwa bu mwaane ao bu aine rinanon te bootaki ni mare. … Tiaki mena ikai bwa ti na ti “amwarake, mooi, ao ni kimwareirei” (2 Nibwaai 28:7). …
E kakawaki ibukira bwa ti na ataia, ngkai ti kona n reiakinna man booki aika tabu, bwa te Atua bon akea tokina, bwa Ana karikibwai bon akea tokiia, ao bwa Ana koaua bon akea tokiia. Ngaia are, ngke E anga Ewa nakon Atam bwa buuna, te reitaki anne bon akea tokina. …
… Ngkana kaaro a ataa te kaantaninga ibukin karikaia, are bon ngaia naati n tamnei iroun Tamaia are i Karawa ao are iai tabeia ni kariki rabwata aika mamate ibukiia tabeman, ngkanne a kimwareirei n ni kakain te bungiaki ngkana a kunea ae ngaia ae iai rekerekeia ma te Atua ni karikiia ataei n tatabemaniia nako aika a roko inanon mweengaia. …
I ataia bwa rinanon ana euangkerio Iesu Kristo, ao rinanon kawakinan ana tua te Atua ao berita aika tabu aika ti karaoi ma Ngaia, ti kona ngaira n tatabemaniira ni karaoa mweengara bwa karawa iaon te aba ngkai ti katauraoira ma ara ataei n okira Tamara are i Karawa.