Ara Tabo
I Kataia ni Kamwakura Au Onimaki
Kamataata n te tamnei iroun David Malan
Au kabo n te ping-pong ma raoraou ae Erfrey e toki ngke iai teniua te karebwerebwe iaon ana mataroa. I ongo te bwanaa ae I aki ongongo mai imwaina ma te ee n Hiligaynon, taetaen abara.
Erfrey e kawaekoa nakon te mataroa, ni kantaningaia bwa e na kaitibo ma ngaiia. “Nakomai!” e taku nakoiu. “I tangiria bwa ko na kaitibo ma raoraou!”
A kabaraakiniia n te mainaina ao a roko bwa a na reirei ma tarin Ertrey are e uarereke bwa a na katauraoia nakon te bwabetito. I taetae ni Imatang nakoia, ao a rang kukurei n tuangai ngkana I kona n raitaeka n tain aia marooro ma tarin Erfrey.
I iangoia bwa nakoau bon tii te raitaeka. Ma I a riki bwa te tia marooro ngkai e rangin rootaki nanou n aia taeka. E reke irou te namakin ae I aki kona ni kabwarabwara, te namakin ni kukurei ae I tuai man namakinna mai imwaaina.
Imwiin te namakin anne, I tuangiia mitinare bwa a na reireiniia au utu. Ma ngke a roko, au karo a katerea bwa akea aia tabo kaain te Momon n roko n ara utu.
I tangiria bwa N na bwabetitoaki, ngaia are I a kamwakura au onimaki. I aki mamatam ao I tataro. I kataia n riki bwa te banna ni katooto nakoia.
Uoua te ririki imwiina, rinanon au onimaki ae reke ao ana boutoka n tangira Tamara are i Karawa, e a marau nanon tamau ao e a tiaina au beebwa ni bwabetito. I kukurei n taekinna bwa au koaua n te euangkerio ae e a tia ni kaokaki bon au bwai ae moan baan te kakaawaki.
Arnel M., Negros Occidental, Biribin
Man te Buraimwari nakon te Bootaki n Ataeinnaine
I a tia ni kunea bwa e kaangaanga aron te bibitaki nakon bwaai aika a boou. Anne bukina e nako nanou ngke I kiitana te Buraimwarii ao ni waaki n te Bootaki n Ataeinnaine. N te moan tai I bon aki taneiai iai. Te Bootaki n Ataeinnaine bon te otabwanin ae kaokoro—akea te tai n anene, akea te tai n tibwatibwa. Ti karaoa naba te Miutuo inanon te wiiki.
I tii tangiria n rin ao n namakina te mweengaraoi, ngaia are I a ira tain au tiketuo. I tataro ni mwaitin te tai, ao I a tabe n taneiai nakon te tai ae boou ao ni kabaeaki ma ataeinnaine ake tabeman.
Inanon waakin te wiiki, I a moanna n ataia bwa I a bon ira ana burokuraem te Bootaki n Ataeinnaine. I a reakina riki taekan te euangkerio, e a reke riki au tai ni karekea ae raoiroi ni katoa wiiki, ao I a kona n nako n te tembora ao n namakina Tamnein te Uea inanon Ana auti.
Ngkai I kakaitau ibukin te Bootaki n Ataeinnaine. I rang kukurei ni karekea te tai aei ao au tai mai roun Tamara are i Karawa.
Bethany W., Florida, USA
Te Tamnei ae Itiaki: E kakawaki riki nakon te Kaboo
N te kawaniua ni koraki I kaaina te kirabu ni boki. Ni katoa namwakaina ti kaitibo ni maroroakina te boki, ao ni banen te ririki ti karaoa te kaboo n nooria bwa antai ibuakoia kain te tiim ae atatai riki ni kanoan taian boki. Teuana te tua are ti taua n tainako bwa ti na wareka te boki ae itiaki.
Teuana te namwakaina, ngke I waaki ni wareka te boki are imwiina, I namakinna bwa e aki itiaki. Ma I riai ni warekia ngkana I tangiria bwa e na moanna au tiim n te kaboo. I aki riai ni uotiia rikaaki. Tabeua te mwakoro imwiina, e a moanna ni buakaka. N tokina, I a katikua. I ataia bwa I riai n aki warekia—kawakinan itiakin tamneiu e uaana riki nakon te moanna n te kaboo.
Ma I rang raraoma n tuangiia kaain au tiim Te tairiki imwina boowin ara kirabu, I tataro nakon Tamara are i Karawa bwa e na buokai n anganai te ninikoria ni kaitaraia.
Te bong are imwiina I a rang raraoma. I tekateka ma au tiim. N te tai are e waaki iai te boowi, ao N nang kataia ni kabwarabwara nakoia bwa I aki kona ni wareka te boki. Ma imwaain ae I teirake, ao te tia kairiiri e teirake ao e kabwarabure. E kabwarabwara bwa e tuai man wareka te boki imwaain ae e katoka iaon ara rinan ni boki ao e aki ataia bwa tera te boki arei. E taku bwa e na kanakoa mai ikekei. Ngke I okira mweengau, I karabwa Tamau are i Karawa.
I ataia bwa ngkana ti kawakina ara kainibaire, te Uea e na kawakiniira. E aki kakaraoa are e karaoia nakoiu n te tai arei n tainako, ma E na anganai n taai nako te ninikoria ni karaoi babaire aika tamaroa.
Ashleigh A., Utah, USA