E Kanga te Intitute ni Buokiko n Reiakina te Euangkerio
Katai kawai aika teniua aikai bwa ko na kona ni karekea riki ae raka man am intitute n taekan te aro.
“Te aonaaba ni boong aikai e a korakora riki iai te kaangaanga nakon are mai imwaina … n ririki aika a nako,” e taku Unimwaane M. Russell Ballard man te Kooram n Abotoro n te Tengaun ma Uoman. “Ara kairake n ataeinnimwane ao n ataeinnaine a mwaiti tinewangaakiia riki nakon aika katauraoi ibukin te mition ao te maiu ni kakukurei n taai aika a na roko.” Ngkai, nakon riki are mai imwaina, ti riai n reiakina riki “aron te kakauongo ao te kaeka nakon te Tamnei ae Raoiroi.”1
Ni buokiko riki bwa ko na kina te tamnei, te Ekaretia e katauraoa te burokuraem n te intitute. Te intitute e kona n anganiko tanaieia aika onoti aika kakawaki ma ana taeka te Atua.”2
Ngkana ko ira te intitute, ko kona n rinerine man kiraati aika a mwaiti. Taan reirei aika a ota ni kainnanoia ao n aia titiraki kairake a na buokiko n reirei man koroboki aika a tabu ao aia reirei burabeti ni boong aika kaitira.
Te bitaki ae e a tibwa karaoaki ngkai e anganiko am tai ni kabonganai (1) Tieno ni kamatebaian te kooti, (2) titiraki iaon te kooti, ao (3) karikirake ibukin reiakinam ibon iroum ni karikirakea am atatai ao ni kakorakora am onimaki iroun Iesu Kristo. Bwaai ni kamatebwai aika teniua aikai a na buokiko n oin am kamatebwai n te euangkerio ao n reiakina aron ana mwakuri te Tamnei iroum.
Tieno ni Kamatebwaian te Kooti
Unimwaane Richard G. Scott (1928–2015) man te Kooram n Abotoro n te Tengaun ma Uoman ekaotinano n tangiran korean te maiu n tamnei n te tieno: “Koreia n te tabo ae mano bwaai aika a kakaawaki ake ko reiakin maiiroun te Tamnei. Ko na kunea bwa ngkai ko korei namakin aika kakaawaki, e na mwaiti riki ae e na roko.”3
Ataein te reirei a kabonganai tieno (iaon te bebwa ke inanon te Gospel Library app) n te kiraati ao n te mweenga ni korei aia namakin ngkai a kamatebwai booki aika tabu. Jayme Dhennz, ataein te intitute i Biribin, e a tia n noora bonganan kawakinan te tieno ni kamatebwai: “I aki kona ni kitana te rongorongo n aki koreia man koroboki aika a tabu ibukina bwa e karabaaba riki au atatai n te euangkerio.”
Te Tari Seiichi Takahashi n te intitute i Nagoya, Japan, e tatangira korean te tieno ibukina bwa e kariaia “waakin te reirei ni kanakoraoia” ao e buokiia ataein te reirei n tauraoia riki n reirei ao n ira te waaki.
Taisia Bartolomeo mai Itare Maiaki e taekinna “Man korean te bwai are I reiakinna, I a kona riki n uringii reirei ngkana I kainnanoi.” Raona n reirei, Mariaterasa Santoro, e reitia, “Au tienoo bon te bwai are I tataraia ni kauringa te reirei are e onoti iaon koaua n te tamnei ke kaotioti ake a onoti nakoim.”
Titiraki n te Kooti
Titiraki ake a kaoti ni moan te kooti e anganiia ataei atuun reirei ake a na iangoi ao ni kamatebwai rinanon nako te kooti. N tokina, ataein te reirei a na karini kaeka ake a kaineti nakoia, iaon kaeka ake a kairaki iroun te Tamnei nakon aia tia reirei.
Ilaria Bellomo, ataein te reirei mai Itare Maiaki, e kabwarabwara, “Taian titiraki a kauringai maiu iaon te koaua are I kamatebwai ibukin te intitute bwa e na buokai n ataa riki Iesu Kristo.”
Jinseop Jeong, ataein te Intitute mai Korea, e taekinna, “Taian titiraki a buokai n iango riki n ae nano n te bwai are I reiakinna ao ni manga okiria. Bon te tai ae kakaawaki ni manga rinanona, iangoia, ao kamwataua raoi te bwai are I reiakinna.”
Rikirakeian maiun tamneia ataein te reirei e riki bwa kakoaua inanon aia kaeka. Titita Seonsim Kang, te tia reirei n te titeiki n te Intitute mai Korea, e taku, “Bon te namakin ae tamaroa irou ni wareware ao n reiakina aia koaua ma aia iango ataein te reirei.”
Karikirake Ibukin Reireiam I bon Iroum.
Angiina ataein te reirei n te Intitute a rinei karikirake aika bongana bwa a na karaoi. Ni boboto iaon te bwai are e bane nanoia iai, ataein te reirei ni katobibia te aonaaba a tia ni karaoi korotamnei aika irekereke ma te euangkerio, katangitang, witeo, ao bwaai ake a kabonganaki ibukin te reitaki n te intanete. Karikirake aikai a kaoia ataein te reirei bwa a na waaki iaon bwaai ake a tia n reiakin inanon te kiraati. Te katooto, temanna ataein te reirei e rineia ni korea tamnein te Tia Kamaiu ni kairia ma te kooti “Iesu Kristo ao te Euangkerio ae Akea Tokina.”
Temanna ataein te reirei ae e ira te kooti n “Eternal Family” e karaoa te karikirake n rongorongon te utu are “karaoaki nanona n te mwananga nakon te tembora ake a ikotaki ni katiai iai 40 kabaebae n te tembora ake a tia ni katauraoaki rinanon taian tiemetita. Aio are e ikotiia riki ara utu.”
Ngkai Cenia Avila Organis, ataein te intitute i Bicol, Biribin, e katereterea, te karikirake iaon reiakinana, “karekei anga aika a bebete,” n anganakiia ataei te inaomata n reiakina ana taeka te Atua ao n namakina te Tamnei ni kabonganaan aia tarena.
E Karikirakea Mwiin te Kekeiaki
Kabonganan kawai n angareirei aikai e kona ni katamaroa am kamatebwai ni kananoa riki am koaua. Man te tebomwaaka riki inanon kamatebwaian te euangkerio rinanon kooti n te Intitute, ko kona riki n ota n aron karaoan nanon ana taeka te Atua inanon maium ao arom ni kakabwaiai maiuia tabeman.