Au Tataro n te Ruu are te Kabane mai Eta

K. Jones

Michigan, USA

N te bong ni kakarau teuana, I nakon te ruu n te kabane mai eta ao I noora te raran. E timtim te ran i tabon te neera imarenan uoua te kaabwa. Ririki ake mai imwaina, I a tia ni karaoi uruaki nakon mweengau ao I aki maaku ni karaoi karikirake aika a boou. Ma n te tai aei I kaitara te kaangaanga ao e bua au onimaki. I namakinna bwa akea korakorau ni kaitara te raran, e ngae ngke I ataia bwa I riai ni karaoa te bwai teuana imwaain rokon te winta.

Teuana te wiiki ke uoua imwiina, I toka i taubukin au auti ma te biti, te biti ni bonobono, ao te kati ni bonobono ae on n te taa. I kunea bwa I tii riai ni kakaea te bwai ae karekea te raran ao n rabunna n te taa. Ma I aki ataia bwa tera. I namakina te bwarannano. I toki ao I tataro, ni bubutiia te Uea bwa e na kairaki nakon te tabo are N na kona ni bonota iai te raran. I kantaningaia bwa e na tii anganai te tabo. Ma, teuana te taeka e roko n au iango: Kakaea.

Aio tiaki te kaeka ae I tangiria, ma I waaki n tarataranako. Matau e toka iaon te bwangabwanga. I raea uoua tabona teutana man te bwangabwanga ao I noora te bwai are e karekea te raran. I korea te taa ae e a maan ni kanakoa, ao I katoka ae boou. I onea te rabuna, ao te maan ae e aki reke teuana te aoa ao e a tia te mwakuri. Rawawatan nanou e a bebete, ao I kukurei ibukin te bwai are I a tia ni karaoia ni katoka te kaangaanga. Ni bwakan te karau are imwiina, I nako n noora te raran n te ruu are mai eta ao bon akea!

I iangoa Oliver Cowdery, are e a tia n “[rineia] n aki iango n titiraki” (D&C 9:7). N aekakin teuanne, I kantaninga te Uea bwa e na tii kaeka au tataro ao akea te bwai ae N na karaoia man au itera. Ao I iangoa aron bebeten tamneiu ngke I karimoa au mwakuri “ni kamatebwaia raoi” (D&C 9:8)—ni kakaea. I reiakinna bwa te Uea e an bon aki karaoi bwaai ni kabane ibukira. E na buokiira ni kairiira, ma ti kantaningaaki naba bwa ti na karaoa are ti konaa ibon iroura ibukina bwa aio ae karekea te rikirake.