Kaurai Ami Taura
Iroun Beretitenti Thomas S. Monson
Man “Riki bwa Ootan te Aonaaba” (Brigham Young University devotional, Nobembwa 1, 2011), speeches.byu.edu.
Ngaira n tatabemaniira nako ti roko n te aonaaba ma Otan Kristo. E bon nakoira kawakinan otan ara taura bwa e na otamwaaka nakoia tabeman bwa a na nooria ao n iria. Teuana te kawai ae tamaroa ni kawakinan te onimaki are ti kainnanoia bon kamatebwaian koroboki aika a tabu ao te tataro.
Ngkai ko kateimatoa otan am koaua bwa e na otamwaaka, ko na riki bwa otan te kanikina etieti ibukiia ni kabane bwa a na nooria. E taku te Tia Kamaiu, “Kam na kaoti ami oota i mataia aomata n ai aron aikai, bwa a na noori ami mwakuri aika raraoi ao a na neboa Tamami are i karawa iai” (Mataio 5:16).
Tibwangara ni kaota bon akea tiana. A katobibiira ni katoa bong. Ngkai ti irii ana banna ni katooto te Tia Kamaiu, ti na riki bwa te ota inanon maiuia naake irarikira—are a kona n riki bwa kain ara utu, raraora, ke te iruwa.
Ti kona n riki bwa te ota nakon te aonaaba. Kaanga ai aron kauraan te taura kaura inanon te ruu ae rootongitong ni kaonaki n te ota, n riki bwa te banna ni katooto e kona n buoka kaotaan te aonaaba ae rikirake n rootongitong.
Raou, ti kona n riki, n aron are e taekinna Abotoro Bauro, “banna ni katooto irouia taan kakoaua” (1 Timoteo 4:12). Ti kona ni kinaaki n taai nako bwa taan iriira Kristo ao n riki “bwa ota kaanga itoi iaon te aba” (I-Biribi 2:15).