Moronaai ao te Mwakaeneke

Iroun Unimwaane Claudio R. M. Costa

Man te Itingaun

“Ao a na tararuaki iroun te ataei” (2 Nibwaai 30:12).

N ririki aika mwaiti n nako, a buti n te kaa ara utu man mweengara nako São Paulo, Brazil, imwiin kawarakiia ara koraki. Ngkai ti buti n te kawai ae kamaraa, e a mate ara kaa.

Ti kataia ni manga kamaiua te kaa inanon tabeua te miniti. Ma e bon aki maiu. A mwaiti taian kaa ake a rimoara nako. Akea ae kan tei n ibuobuoki.

N tokin te tai I tuangiia kaain au utu bwa ti riai n tataro. Natiu te mwaane ae onoua ana ririki, Moronaai, e taku, “Tai raraoma, Tamau. I a kaman tia n tataro.”

“Tera ae ko bubuti ibukina n am tataro?” I titiraki.

“I tataro nakon te Tama are i Karawa bwa e na iai te aomata ae e na roko ae rabakau ae e na buokiira,” e taku.

N te tai ae waekoa uoua tauran moan te kaa aika otamwaaka a kaoti mai ibukin ara kaa. Bon te turaki ni katikii bwaai. Bon te mwakaeneke te turaiwa.

“Kam rang tekeraoi,” e taku. “E a bane au mwakuri ibukin te bong aei ao iaon kawaiu n okira mweengau.”

E karaoa ara kaa. Ngkanne e rirmwiira ni kakoaua bwa ti roko raoi ni mweengara.

I titirakina Moronaai ngkana e ataia bwa kakawakira te taneiai aei. “E koaua,” e taku. “E kaeka au tataro te Tama are i Karawa. Ngaia are ngkai e a reke oin au koaua! I aki manga kan tangoia riki mairoum,” Tamau! E riingaki nanou n ana katooto Moronaai ae kaonaki n te onimaki.

E a ikawai ngkai Moronaai, ma I teimatoa n uringa ana katooto ae tamaroa man inanon uarerekena. E ngae ngke ko ataei, ko kona n riki bwa te katooto nakoia am utu ao raoraom.