E nehenehe tātou e rave maita’i a’e ’e e ha’amaita’i ia tātou
’A fa’ariro i te fa’atumura’a i ni’a i te tātarahapara’a tāmahana ’ei tuha’a roa ’ino nō tō ’outou orara’a ’e fa’a’ohipa ai ’outou i te autahu’ara’a ma te mana rahi a’e, ’aita a’enei mai te reira.
E au mau taea’e here, e mea fa’auru mau ’ia hi’o i teie ’āmuira’a naho’a rahi nō te nu’u autahu’ara’a a te Fatu. E pūai rahi mau ’outou nō te maita’i ! ’Ua here mātou ia ’outou. Tē pure nei mātou nō ’outou. ’E ’ua māuruuru roa mātou nō ’outou.
’Aita i maoro a’enei, ’ua feruri tō’u mana’o i te arata’ira’a tā te Fatu i hōro’a nā roto i te peropheta Iosepha Semita : « ’Eiaha… e parau ’ē atu i teie nei u’i maori rā ’o te tātarahapa ».1 E mea pinepine teie parau i tē fa’ahitihia i roto i te mau pāpa’ira’a mo’a.2 E hiti mai ïa te uira’a ē : « Tītauhia ānei i te tā’āto’ara’a ’ia tātarahapa ? » Teie te pāhonora’a, ’ē.
E rave rahi roa ta’ata e hi’o nei i te tātarahapa ’ei utu’a—e ’ohipa e ’ape atu ’eiaha rā nō te hape teimaha roa. Nā Sātane rā e fa’atupu nei i teie mana’o nō te utu’a. Tē tāmata nei ’oia i te tāpo’i i tā tātou hi’ora’a ia Iesu Mesia,3 ’o tē ti’a nei ma te rima mahora,4 ma te tīa’ira’a ’e ma te hina’aro ’ia fa’aora, ’ia fa’a’ore i te hara, ’ia tāmā, ’ia ha’apūai, ’ia ha’avi’ivi’i ’ore ’e ’ia ha’amo’a ia tātou.
Te ta’o nō te tātarahapa i roto i te Faufa’a ’Āpī reo heleni, ’o metanoeo ïa. Te aura’a nō te ’atiparau (affixe) meta ’oia ho’i, « e taui ». Te ’atiparau noeo, ’ua tū’ati ïa i te mau ta’o heleni e au i te « ferurira’a », te « ’ite », te « vārua » ’e te « aho ».5
Nō reira, ’ia ani Iesu ’ia ’outou ’e iā’u nei ’ia « tātarahapa »,6 tē ani nei ïa ’oia ia tātou ’ia taui i tō tātou ferurira’a, tō tātou ’ite, tō tātou vārua—’e tae noa atu te huru tātou e huti i te aho. Tē ani nei ’oia ia tātou ’ia taui i te huru tātou e here, e mana’o, e tāvini, e fa’a’ohipa i tō tātou taime, e rave i tā tātou mau vahine, e ha’api’i i tā tātou mau tamari’i ’e e ha’apa’o ato’a ho’i i tō tātou nei tino.
’Aita e ’ohipa fa’ati’amā a’e ’e te fa’ahanahana a’e ’e te faufa’a a’e nō tō tātou tāta’itahi haerera’a i mua maori rā te fa’atumura’a tāmau ’e te fa’atumura’a tāmahana i ni’a i te tātarahapa. E ’ere te tātarahapa i te ’ohipa nō te hō’ē noa taime ; e ’ohipa tau maoro rā. E tāviri te reira no te ’oa’oa ’e te mana’o hau. ’Ia ’āmuihia te reira i te fa’aro’o, e ha’amatara te tātarahapa i te ’ūputa nō te mana o te tāra’ehara a Iesu Mesia.7
Mai te mea tē haere māite ra ’outou i ni’a i te ’e’ā nō te fafaura’a, ’aore rā ’ua he’e, ’aore rā ’ua ta’ahi tō ’outou ’āvae i rāpae i te ’e’ā nō te fafaura’a, ’aore rā ’aita roa atu ’outou e ’ite ra i te ’ē’a nā te vāhi i reira ’outou, tē tāparu nei au ia ’outou ’ia tātarahapa. ’A tāmata i te mana ha’apūai o te tātarahapa tāmahana—i te ha’amaita’i-atu-ā-ra’a i tā tātou ’ohipa ’e ia tātou iho nei, i te mahana tāta’itahi.
’Ia mā’iti tātou ’ia tātarahapa, tē mā’iti nei ïa tātou ’ia taui ! Tē fa’ati’a nei tātou i te Fa’aora ’ia taui i tō tātou hōho’a ’ei hōho’a maita’i roa a’e. Tē mā’iti nei tātou e tupu i te rahi i te pae vārua ’e e fāri’i i te ’oa’oa—te ’oa’oa nō te tāra’ehara i roto iāna.8 ’Ia mā’iti tātou ’ia tātarahapa, tē mā’iti nei ïa tātou ’ia riro mai ia Iesu Mesia te huru !9
E te mau taea’e, tītauhia ’ia tātou ’ia rave maita’i a’e ’e ’ia ha’amaita’i ia tātou nō te mea tei roto tātou i te hō’ē ’arora’a. Te ’arora’a i te hara, e parau pāpū ïa. Tē tāta’imaha nei te ’enemi i tāna mau tauto’ora’a nō te ha’afifi i te mau ’itera’a pāpū ’e nō te fa’ataupupū i te ’ohipa a te Fatu. Tē fa’atara nei ’oia i tāna mau teuteu i te mauiha’a tama’i pūai nō te tāpe’a ia tātou ’eiaha tātou ’ia fāna’o i te ’oa’oa ’e te here o te Fatu.10
’O te tātarahapa te tāviri nō te ’ape i te mamae rahi a te mārei a te ’enemi. ’Aita te Fatu e tītau nei i te fāito maita’i roa ia tātou i teie taime nō tō tātou haerera’a mure ’ore i mua. Tē tītau nei rā ’oia ia tātou ’ia rahi atu ā tō tātou vi’ivi’i ’ore. ’O te tātarahapa tāmahana te ’ē’a i te vi’ivi’i ’ore, ’e nā te vi’ivi’i ’ore e fa’atae mai i te mana. E ti’a i te vi’ivi’i ’ore o te ta’ata hō’ē e riro ’ei mauiha’a mana rahi i roto i te rima o te Atua. Nā tā tātou tātarahapara’a—tō tātou vi’ivi’i ’ore—e ha’amana ia tātou nō te tauturu i roto i te ha’aputuputura’a o ’Īserā’ela.
’Ua ha’api’i te Fatu i te peropheta Iosepha Semita ē « ’ua ha’amau-roa-hia atu te mau ti’ara’a nō te autahu’ara’a i te mau mana nō te ra’i ra, e ’ore roa e ti’a ’ia fa’aterehia te mau mana no te ra’i ra e ’ore roa ato’a ho’i e fa’a’ohipahia maori rā nā roto i te parau tumu nō te parau ti’a ra ».11
’Ua ’ite tātou e aha tē fa’afāna’o atu ā ia tātou i te mau mana o te ra’i. ’Ua ’ite ato’a tātou e aha tē ha’afifi i tō tātou haerera’a i mua—te mea tītauhia ’ia tātou ’ia fa’aea i te rave, ’ia rahi atu ā tō tātou fāna’ora’a i te mau mana o te ra’i. E te mau taea’e, ’a ’imi nā roto i te pure ’ia māramarama e aha tē tārava ra nā ni’a i tō tātou purūmu nō te tātarahapara’a. ’A fa’ata’a e aha tē tāpe’a nei ia ’outou ’ia tātarahapa. ’Ei reira, ’a taui ! ’A tātarahapa ! Tātou pā’āto’a tē nehenehe e rave maita’i a’e ’e e ha’amaita’i ia tātou, rahi atu ā i tei mātāmua a’enei.12
E mau vāhi ta’a ’ē tā tātou e nehenehe roa e ha’amaita’i. Hō’ē vāhi, ’o te huru ïa tātou e ha’apa’o nei i tō tātou tino. Tē māere roa nei au i te semeio o te tino ta’ata nei. E hāmanira’a fa’ahiahia mau, ’e te faufa’a nō tō tātou ta’uma-marū-ra’a i ni’a ’ia tae i tō tātou fāito pūai hanahana hope’a. E’ita e nehenehe e haere i mua ’aita ana’e te reira. ’Ua tu’u mai te Atua i te hōro’a nō te tino, ’ia ti’a ia tātou ’ia haere rahi atu ā i mua nō te rirora’a mai iāna te huru.
’Ua ta’a ia Sātane te reira. Tē riri nei ’oia i te mea ē, nō tōna tāivara’a i te orara’a hou te tāhuti nei, tē ’ere tāmau nei ’oia i te fāna’ora’a i te reira, e pohehae noa ïa ’e te ’ino’ino tōna e vaira’a. Nō reira e rave rahi, ’o te rahira’a paha o te mau ’umera’a ’ia hara tāna e tu’u nei i ni’a i tō tātou ’ē’a, nō te hāmani ’ino ïa i tō tātou nei tino ’aore rā tō vetahi ’ē tino. Nō tōna vaira’a ’ati rahi ’aita e tino, tē hina’aro nei ïa ’oia ’ia ’ati rahi tātou i tō tātou nei tino.13
Tō ’outou tino, ’o tō ’outou iho ïa hiero, tei hāmanihia ’ei fare nō tō ’outou vārua mure ’ore.14 E mea faufa’a rahi ’ia ha’apa’o māite ’outou i te reira hiero. Tē ui nei au ia ’outou te mau taea’e ē, tē ’ana’anatae rahi ra ānei ’outou i te fa’a’ahura’a ’e te fa’anehenehera’a ia ’outou ’ia hi’o mai tō te ao ’ia ’outou, ’aore rā ’ia rahi atu ā tō te Atua aura’a mai ? Tā ’outou pāhonora’a i teie uira’a, e poro’i ïa e tae ’āfaro iāna nō ni’a i tō ’outou mau mana’o i tāna tao’a hōro’a hau a’e nō ’outou. Nō ni’a i te fa’aturara’a i tō tātou nei tino, te mau taea’e, tē mana’o nei au e nehenehe tātou e rave maita’i a’e ’e e ha’amaita’i ia tātou.
Te tahi ato’a rāve’a nā tātou e nehenehe ai e rave maita’i a’e ’e e ha’amaita’i ia tātou, ’o te huru ïa tātou e fa’atura nei i te mau vahine i roto i tō tātou orara’a, ha’amata nā ni’a i tā tātou vahine ’e te mau tamāhine, tō tātou metua vahine ’e te mau tuahine.15
Ma’a ’āva’e i ma’iri, ’ua fāri’i au i te hō’ē rata ’oto rahi a te hō’ē tuahine iti. ’Ua pāpa’i mai ’oia ē : « [Iā’u nei ’e ta’u mau tamāhine], e au ē, e ’umera’a rahi e vai ra i roto ia mātou ’e te mau parau ’āpī hope’a ’ore nō ni’a i te tū’aro, te mau ha’uti video, te mau nūmera i te Bourse, [’e] te hi’opo’ara’a hope’a ’ore ’e te māta’ita’ira’a i te mau ha’utira’a tū’aro ato’a, ’aita tā mātou mau tāne ’e mau tamāroa e tāu’a nei ia mātou. E au ē tē ’ere ra mātou i te pārahira’a mātāmua i mua ’e tā mātou mau tāne ’e mau tamāroa nō te pārahi-noa-ra’a i mua [te mau tū’aro ’e te mau ha’uti] ».16
E te mau taea’e, tā ’outou hōpoi’a mātāmua hō’ē roa ’ei taea’e tei mau i te autahu’ara’a, ’o te herera’a ïa ’e te ha’apa’ora’a i tā ’outou vahine. Te riro-hō’ē-ra’a ’e ōna. Te rirora’a ’ei ’āpiti nōna. ’A fa’a’ōhie i tōna mana’o ’ia fa’ariro ia ’outou ’ei ’āpiti nōna. ’Eiaha te tahi atu hia’ai i roto i te orara’a e nā mua atu i te patura’a i te aura’a mure ’ore ’e ōna. ’Aita e mea i ni’a i te ’āfata teata, te mātini ’āfa’ifa’i ’aore rā te mātini rorouira i te mea faufa’a a’e i tōna maita’i. ’A tāpa’o i te huru ’outou e fa’a’ohipa nei i tō outou taime ’e tei hea tō ’outou pūai. E fa’a’ite mai te reira tei hea tō ’outou ’ā’au. ’A pure ’ia tū’ati tō ’outou ’ā’au i ni’a i te ’ā’au o tā ’outou vahine. ’A ’imi i te fa’atupu i tōna ’oa’oa. ’A ’imi i tāna parau a’o ’e ’a fa’aro’o. E ha’amaita’i tāna e parau mai i tā ’outou ’ohipa.
Mai te peu tītauhia ’ia tātarahapa i te huru ’outou e rave nei i te mau vahine fātata a’e ia ’outou, ’a ha’amata i teienei. ’E ’a ha’amana’o ato’a ē, tei ia ’outou te hōpoi’a e tauturu i te mau vahine i roto i tō ’outou orara’a ’ia fāri’i i te mau ha’amaita’ira’a e noa’a mai nā roto i te orara’a i te ture a te Fatu nō te vi’ivi’i ’ore. ’Eiaha roa atu ’outou ’ia riro i te tumu te hō’ē vahine e ’ore ai e fāri’i i tāna mau ha’amaita’ira’a hiero.
E te mau taea’e, tātou pā’āto’a tei tītauhia ’ia tātarahapa. Tītauhia ’ia ti’a mai tātou mai roto i terā pārahira’a marū, ’e ’ia tu’u i terā télécommande i raro ’e ’ia ara mai tātou i tō tātou ti’aruhira’a. ’Ua tae te taime nō te ’ō’omora’a i te ha’ana tama’i a te Atua ’ia ti’a ia tātou ’ia fa’aō atu i roto i te ’ohipa faufa’a roa a’e i ni’a i te fenua nei. ’Ua tae te taime nō te « māo’a [i tā tātou] mauha’a ’ō’oti ra, ’e ’a ’ō’oti mai tō [tātou] pūai ato’a, ’e [te] mana’o ato’a, ’e [te] itoito ato’a ra ».17 ’Aita te mau pūai o te ’ino i tā’iri a’enei mai tā rātou e tā’iri nei i teie mahana. ’Ei tāvini nā te Fatu, ’aita e ti’a ia tātou ’ia ta’oto noa ’a ’ū’ana noa ai terā ’arora’a.
Tītauhia tā ’outou fa’aterera’a ’e tō ’outou here nō tō ’outou ’utuāfare. Tītauhia tō ’outou pūai nō tō ’outou pupu autahu’ara’a ’e nō te ta’ata i roto i tā ’outou pāroita. ’E tītauhia ’ia ’ite te ta’ata ato’a e fārerei ia ’outou ē, e aha te hōho’a ’e te ’ohipa a te hō’ē pipi mau a te Fatu.
E au mau taea’e here, ’ua mā’itihia ’outou e tō tātou Metua nō te tae mai i ni’a i te fenua nei i teie taime rahi roa, maoti tō ’outou itoito pae vārua hou te tāhuti nei. Tei roto ’outou i te mau ta’ata maita’i roa a’e ’e te itoito roa a’e i fānauhia a’enei i ni’a i te fenua nei. ’Ua ’ite Sātane ’o vai ’outou ’e ’o vai ’outou hou te tāhuti nei ’e ’ua māramarama ’oia i te ’ohipa e mea tītau ’ia rave hou te Fa’aora e ho’i mai ai. ’E nō te mau tauasinira’a matahiti ’oia i te ha’avarera’a i te ta’ata, ’ua ’aravihi roa te ’enemi ’e e’ita e nehenehe e taui iāna.
’Aua’a a’e maoti, e mea pūai roa a’e te autahu’ara’a tā tātou e mau nei, i te rāmā a te ’enemi. Tē tāparu nei au ia ’outou ’ia riro i te tāne ’e te tamāroa tā te Fatu i hina’aro ia ’outou ’ia riro. ’A fa’ariro i te fa’atumura’a i ni’a i te tātarahapara’a tāmahana ’ei tuha’a roa ’ino nō tō ’outou orara’a ’e fa’a’ohipa ai ’outou i te autahu’ara’a ma te mana rahi a’e, ’aita a’enei mai te reira. ’O teie ana’e te rāve’a e pāruru noa ai ’outou ia ’outou iho ’e tō ’outou ’utuāfare i te pae vārua i te mau mahana tāmatara’a i muri nei.
’Ua hina’aro te Fatu i te mau tāne ’ā’au ’uraeva (altruiste) ’o tē tu’u i tō vetahi ’ē maita’i i mua i tōna. ’Ua hina’aro ’oia i te mau tāne e ha’a ma te mana’o pāpū nō te fa’aro’o i te reo o te Vārua ma te pāpū roa. ’Ua hina’aro ’oia i te mau tāne nō te fafaura’a ’o tē ha’apa’o i tā rātou mau fafaura’a ma te ’ā’au ha’avare ’ore. ’Ua hina’aro ’oia i te mau tāne tei fa’aoti roa e vai mā i te pae ’āpeni—e mau tāne ti’amā tē nehenehe e pi’ihia i reira noa iho nō te hōro’a i te mau ha’amaita’ira’a ma te ’ā’au mā ’e te ferurira’a mā ’e te rima ineine. ’Ua hina’aro te Fatu i te mau tāne tei hia’ai roa ’ia tātarahapa—e mau tāne e itoito rahi nō te tāvini ’e nō te riro ’ei tino nō te nu’u ta’ata a te Fatu i te autahu’ara’a ma te ti’amā.
Tē ha’amaita’i nei au ia ’outou nō te riro i te reira ta’ata. Tē ha’amaita’i nei au ia ’outou i te itoito nō te tātarahapa i te mahana tāta’itahi ’e nō te ha’api’i nāhea i te fa’a’ohipa i te mana hope o te autahu’ara’a. Tē ha’amaita’i nei au ia ’outou nō te fa’a’ite i te here o te Fa’aora i tā ’outou vahine ’e te mau tamari’i ’e te feiā ato’a tā ’outou i mātau. Tē ha’amaita’i nei au ia ’outou nō te rave maita’i a’e ’e nō te ha’amaita’i ia tātou. ’E tē ha’amaita’i nei au ia ’outou ē, ’ia rave ’outou i teie mau tauto’ora’a, e ’ite mai ’outou i te mau semeio i roto i tō ’outou orara’a.
Tei roto tātou i te ’ohipa a te Atua Mana hope. ’O Iesu te Mesia. E tāvini tātou nā rāua. ’O tō’u ïa ’itera’a pāpū i te i’oa o Iesu Mesia, ’āmene.