Te Tīa’i māmoe maita’i, te ’Ārenio a te Atua
E pi’i Iesu Mesia ia tātou ma tōna reo ’e i tōna i’oa. E ’imi ’oia ’e e ha’aputuputu ’oia ia tātou. E ha’api’i ’oia ia tātou nāhea i te tāvini nā roto i te here.
E te mau taea’e ’e te mau tuahine, e pō ānei ’aita i topa te ta’oto ’e ’ua tāmata ’outou i te tai’o i roto i te ferurira’a i te mau māmoe ? E ’ōu’a terā māmoe veuveu nā ni’a i te ’āua : ’a tahi, ’a 2, 3… 245, 246… 657, 658…1
Iā’u nei, e’ita e topa te ta’oto i te tai’ora’a māmoe. E ha’ape’ape’a vau ’o te ma’iri hō’ē iā’u ’aore rā e mo’e atu hō’ē, e vai ara noa ïa vau.
I te tama tīa’i māmoe ra tei riro mai ’ei ari’i, tē parau nei tātou :
« ’O Iehova tō’u tīa’i, e ’ore roa vau e ’ere.
« Tē fa’ata’oto nei ’oia iā’u i te mau ’āua he’euri ra, tē arata’i nei ’oia iā’u nā pīha’i iho i te pape atati’a ra.
« E fa’aho’i ā ’oia i ta’u vārua ».2
I teie pu’e tau Pāsa, tē fa’ahanahana nei tātou i te Tīa’i māmoe maita’i, ’o ’oia ato’a ho’i te ’Ārenio a te Atua. I roto i tōna mau ti’ara’a hanahana ato’a, ’aita e mea aromanava a’e ’e te ha’amāramarama a’e. E ’ite rahi tā tātou e ’apo nei i te paraura’a te Fa’aora iāna iho ’ei Tīa’i māmoe maita’i ’e i te fa’a’itera’a te mau peropheta iāna ’ei ’Ārenio nā te Atua. E tū’ati rahi teie nā ti’ara’a ’e nā tāpa’o te tahi i te tahi—’o vai ho’i tē tauturu maita’i a’e i te ’ārenio iti maori rā te Tīa’i māmoe maita’i, ’e ’o vai ho’i tē Tīa’i māmoe maita’i a’e nō tātou maori rā te ’Ārenio a te Atua ?
« I aroha mai te Atua i tō te ao, ’e ’ua hōro’a mai i tāna Tamaiti fānau tahi », ’e ’ua tu’u te Tamaiti fānau tahi a te Atua i tōna ora nō tōna hina’aro e ha’apa’o i te parau a tōna Metua.3 Tē fa’a’ite nei Iesu : « ’O vau te tīa’i māmoe maita’i. E hōro’a te tīa’i māmoe maita’i i tōna iho ora nō te māmoe ».4 E mana tō Iesu nō te tu’u i tōna ora ’e nō te rave fa’ahou mai i te reira.5 Tāhō’ē ’e tōna Metua, e rāve’a hō’ē roa tā te Fa’aora nō te ha’amaita’i ia tātou, ’ei Tīa’i māmoe ’e ’ei ’Ārenio nā te Atua.
’Ei Tīa’i māmoe maita’i nō tātou, e pi’i Iesu Mesia ia tātou ma tōna reo ’e i tōna i’oa. E ’imi ’oia ’e e ha’aputuputu ’oia ia tātou. E ha’api’i ’oia ia tātou nāhea i te tāvini nā roto i te here. Feruri ana’e i teie nau tumu parau e toru, nā mua te pi’ira’a ’oia ia tātou ma tōna reo ’e i tōna i’oa.
’A tahi, « e ta’o atu [tō tātou Tīa’i māmoe maita’i] i tāna iho māmoe ma te fa’ahiti atu i te i’oa… ’Ua ’ite ho’i rātou i tōna reo ».6 ’E « tē ti’aoro nei ho’i ’oia ia ’outou i tōna iho i’oa, ’oia ho’i, i te i’oa o te Mesia ».7 ’Ia ’imi tātou ma te mana’o pāpū ’ia pe’e ia Iesu Mesia, e tae mai te fa’aurura’a ’ia rave i te maita’i, ’ia here i te Atua ’e ’ia tāvini iāna.8 ’A tuatāpapa ai tātou, ’a feruri ’e ’a pure ai ho’i ; ’a fa’a’āpī ai tātou i tā tātou mau fafaura’a nō te ’ōro’a ’e nō te hiero ; ’e ’a ani ai tātou i te mau ta’ata ato’a ’ia haere mai i te ’evanelia ’e i te mau ’ōro’a, tē fa’aro’o ra ïa tātou i tōna reo.
I tō tātou nei anotau, ’ua parau a’o te peresideni Russell M. Nelson ia tātou ’ia parau i te ’Ēkālesia i fa’aho’ihia nā ni’a i te i’oa i heheuhia mai e Iesu Mesia : Te ’Ēkālesia a Iesu Mesia i te Feiā Mo’a i te mau Mahana Hope’a Nei.9 ’Ua parau te Fatu : « Te mau mea ato’a tā ’outou e rave, nā ’outou ïa e rave i tō’u ra i’oa ; nō reira e parauhia ai te ’ēkālesia i tō’u ra i’oa ; ’e e pure atu ’outou i te Metua i tō’u i’oa, ’ia ha’amaita’i ’oia i te ’ēkālesia nō’u ra.10 Noa atu te vāhi nā te ao nei, i roto ānei i tō tātou ’ā’au ’e i tō tātou fare, tē pi’i nei tātou i te Metua nā roto i te i’oa o Iesu Mesia. ’Ua māuruuru tātou nō te ha’amaita’ira’a rahi o te tuatāpapara’a ’evanelia ’e te mau fa’a’oa’oara’a au tei fa’atumuhia i ni’a i te ’utuāfare, turuhia e te ’Ēkālesia.
Te piti, tē ’imi nei tō tātou Tīa’i māmoe maita’i ia tātou ma te ha’aputuputu ia tātou i roto i tāna ’āua hō’ē ra. ’Ua nā ’ō ’oia : « ’O vai ïa ta’ata i’ō ’outou nei, hō’ē hānere ana māmoe, ’ia mo’e rā te hō’ē, e ’ore e vaiiho i te iva ’ahuru ’e iva ti’ahapa i te medebara ra, ’a haere ’a ’imi ai i tei mo’e ra, ē ’ia ’itea atu ? »11
Tē toro nei tō tātou Fa’aora i tōna rima i te hō’ē ’e i te iva ’ahuru ma iva, e mea pinepine i te hō’ē ā taime. ’A tāvini noa ai tātou, tē māuruuru nei tātou i te iva ’ahuru ma iva e vai ’eta’eta nei ’e ’o tē vai ’āueue ’ore nei, noa atu ā tō tātou māna’ona’ora’a i terā hō’ē tei hahi ’ē. Tē ’imi ’e te fa’aora nei tō tātou Fatu ia tātou nā « te mau vāhi ato’a »,12 « i nā hope’a e maha o te fenua nei ».13 Tē ha’aputuputu nei ’oia ia tātou nā roto i te fafaura’a mo’a ’e tōna toto tāra’ehara.14
’Ua parau tō tātou Fa’aora i tāna mau pipi nō te Faufa’a ’Āpī ē : « E māmoe ’ē atu ā tā’u, e ’ere i tō teie nei ’āua ».15 I Amerika, ’ua fa’a’ite te Fatu ti’afa’ahou i te mau tamari’i nō te fafaura’a, te mau tamari’i a Lehi ra : « E māmoe ’outou nā’u ».16 ’Ua nā ’ō rā Iesu ē e māmoe ’ē atu ā tē fa’aro’o i tōna reo.17 ’Auē ïa ha’amaita’ira’a te Buka a Moromona ’ei ’ite fa’ahou ā nō te reo o Iesu Mesia !
Tē ani nei Iesu Mesia i te ’Ēkālesia ’ia fāri’i i te mau ta’ata ato’a e fa’aro’o i tōna reo18 ’e ’o tē ha’apa’o i tāna mau fa’auera’a. Tei roto i te ha’api’ira’a tumu a te Mesia te bāpetizora’a i te pape ’e i te auahi, nā reira ato’a te Vārua Maita’i.19 Tē ui ra Nephi : « E mea ti’a i te ’Ārenio o te Atua ra, i tei mo’a, ’ia bāpetizohia ’oia i roto i te pape, ’ia fa’ati’a i te mau parau ti’a ato’a, inaha, e mea ti’a roa atu ā ia tātou, i te feiā mo’a ’ore, ’ia bāpetizohia tātou, ’oia ïa, i roto i te pape ra ! »20
I teie mahana, tē hina’aro nei tō tātou Fa’aora ’ia pi’i atu te mea tā tātou e rave ’e te ta’ata tā tātou e riro, ’ia haere mai iāna ’e ’ia pe’e iāna. Haere mai ’ia ’ite ’outou i iāna ra i te here, te ora, te tū’atira’a ’e te tā’amura’a a te fafaura’a, i roto ato’a i te hiero mo’a a te Atua, i reira te mau ’ōro’a mo’a nō te fa’aorara’a e ha’amaita’i i te mau melo ato’a o te ’utuāfare, ’a ha’aputuputu ai ia ’Īserā’ela i nā pae e piti o te pāruru.21
Te toru, ’ei « Tīa’i ia ’Īserā’ela »,22 tē fa’ahi’o nei Iesu Mesia nāhea te mau tīa’i māmoe i ’Īserā’ela e tāvini nā roto i te here. ’Ia ui te Fatu ē, ’ua here ānei tātou iāna, mai tāna i rave nō Simona Petero, tē tāparu nei ïa tō tātou Fa’aora : « ’A fa’a’amu i ta’u mau ’ārenio… ’A tīa’i i ta’u mau māmoe… ’A fa’a’amu i ta’u mau māmoe. »23 ’Ua parau fafau te Fatu ē, ’ia fa’a’amu tāna mau tīa’i māmoe i tāna mau ’ārenio ’e mau māmoe, tei roto i tāna ’āua, « e ’ore atura rātou e mata’u fa’ahou, e ’ore e horuhoru, e ’ore ho’i rātou e nā-reira-fa’ahou-hia mai ».24
Tē fa’aara nei tō tātou Tīa’i māmoe maita’i ē, ’eiaha te mau tīa’i māmoe i ’Īserā’ela ’ia ti’aruhe,25 ’eiaha ato’a ’ia ha’apurara ’aore rā e fa’ahahi ’ē i te māmoe,26 ’eiaha ato’a ’ia ’imi i tō tātou iho ’āpī i tā tātou iho rāve’a.27 Te mau tīa’i māmoe a te Atua, e ha’apūai ïa rātou, e fa’aora, e tā’amu i te mea fati, e fa’aho’i mai i tei ti’avaruhia, e ’imi mai i tei mo’e.28
Tē fa’aara ato’a nei te Fatu e ara maita’i i tei tārahuhia « ’aore ’oia e ha’apa’o i te māmoe »,29 nā reira ato’a te « ’orometua ha’avare, ’o tei haere mai ia ’outou ma te huru o te māmoe ra, ’āre’a ’o roto ra, e luko taehae ïa ».30
Tē ’oa’oa nei tō tātou Tīa’i māmoe maita’i ’ia fa’a’ohipa tāta’ihō’ē ana’e tātou i tō tātou ti’amāra’a ’ia mā’iti ma te mana’o pāpū ’e te fa’aro’o. ’O rātou i roto i te ’āua, e hi’o rātou i tō tātou Fa’aora ma te māuruuru nō tāna tusia tāra’ehara. Tē fafau nei tātou ’ia pe’e iāna, ’eiaha rā ma te haere noa, ’aore rā mai te matapō ’aore rā « ma te ha’amā », e nā reira rā tātou ma te hina’aro ma tō tātou ’ā’au ato’a ’e te mana’o, ’ia here i te Atua ’e i tō tātou ta’ata tupu, ma te amo i te mau hōpoi’a te tahi ’e te tahi, ’e ma te ’oa’oa i tō te tahi ’e tō te tahi ’oa’oara’a. Mai tā te Mesia i pūpū hua atu i tōna hina’aro i te hina’aro o te Metua, e nā reira ato’a tātou i te rave tura i ni’a ia tātou i tōna i’oa. E ’imi tātou ma te ’oa’oa i te ’āmui i tāna ’ohipa nō te ha’aputuputura’a ’e nō te tāvinira’a i te mau tamari’i ato’a a te Atua
Te mau taea’e ’e te mau tuahine, ’o Iesu Mesia tō tātou Tīa’i māmoe maita’i roa. Nō tōna tu’ura’a i tōna ora nō tātou, ’e i teienei ’ua riro ’ei tino ti’afa’ahou ’e te hanahana, ’ua riro ato’a Iesu Mesia i te ’Ārenio maita’i roa a te Atua.31
E taipe te ’Ārenio a te Atua e fa’atusiahia, mai te ha’amatara’a mai ā. ’Ua parau te melahi ia Adamu ē, tāna tusia « e hōho’a [ïa] nō te tusia o te Fānau tahi a te Metua » ’o tē ani nei ia tātou ’ia « tātarahapa… ma te ti’aoro atu i te Atua nā roto i te i’oa o te Tamaiti ē a muri noa atu ».32
’Ua ’ite te Metua Aberahama ē, ’oia tei ha’amau i te mau ha’amaita’ira’a nō te mau nūna’a ato’a o te fenua nei nā roto i te fafaura’a, i te aura’a nō te pūpūra’a i tāna tamaiti fānau tahi.
« ’Ua parau maira Isaaka i tāna metua ia Aberahama, nā ’ō maira, E ta’u metua, ’ua nā ’ō atura ’oia, Teie au, e ta’u tamaiti. ’Ua nā ’ō maira ’oia, Inaha te auahi ’e te vahie ; tei hea rā te pinia māmoe…?
« ’Ua parau atura Aberahama, E ta’u tamaiti, nā te Atua iho e ’imi i te hō’ē pinia mamoe ».33
’Ua ’ite ātea ’e ’ua ’oa’oa ho’i te mau ’āpōsetolo ’e te mau peropheta i te misiōni a te ’Ārenio a te Atua i fa’atōro’a-ātea-hia. ’Ua fa’a’ite pāpū ’o Ioane i te Ao tahito ra ’e ’o Nephi i te Ao ’āpī ra nō te « ’Ārenio a te Atua »,34 « ’oia ïa, te Tamaiti a te Metua hau mure ’ore… te Fa’aora o te ao nei ».35
’Ua fa’a’ite pāpū ’o Abinadi nō te tusia tāra’ehara a Iesu Mesia : « ’Ua haere ’ē anaʼe tātou, mai te māmoe ra ; ’ua fāriu ’ē tātou, ’o te taʼata ’o tōna ’ēʼa, ’e ’ua fa’airi te Fatu i niʼa iāna i te ʼutuʼa o tā tātou atoʼa nei hara ».36 ’Ua parau Alama i te tusia rahi ’e te hope’a a te Tamaiti a te Atua « ’o te hō’ē mea ’ē hau roa ïa i te maita’i ». ’Ua fa’aitoito Alama : « ’Ia noa’a ia ’outou te fa’aro’o i te ’Ārenio a te Atua », « ’a haere mai, ’eiaha e mata’u ».37
’Ua fa’ati’a mai te hō’ē hoa vahine nāhea te noa’ara’a tōna ’itera’a pāpū tao’a rahi nō te tāra’ehara a Iesu Mesia. ’Ua pa’ari mai ’oia ma te mana’o ē, e utu’a rahi noa te hope’a o te hara, ’e nā tātou noa iho e amo i te reira. ’Ua tāparu ’oia i te Atua nō te māramarama i te vaira’a o te fa’a’orera’a hara hanahana. ’Ua pure ’oia ’ia māramarama ’e nō te ’ite nāhea e ti’a ai ia Iesu Mesia ’ia fa’a’ore i te hara a te ta’ata e tātarahapa, nāhea te aroha e pāhono ai i te tītaura’a a te parau ti’a.
I te hō’ē mahana, ’ua pāhonohia tāna pure nā roto i te hō’ē ’ohipa pae vārua tei taui roa iāna. Tē horo mai ra te hō’ē taure’are’a i rāpae i te hō’ē fare toa, e piti pūtē mā’a tāna i ’eiā. ’Ua horo ’oia nā te hō’ē aroā ta’ata, ’e tē a’ua’u ra te fa’atere fare toa iāna, roa’a mai nei iāna ’e tūtuō a’era ’e taputō a’era. ’Aita te mana’o ha’avā i puta mai nō taua taure’are’a ’eiā ra, ’e ma te māere, ’ua ’ī tōna ’ā’au i te aumihi rahi nōna. Ma te feruri ’ore ’e ma te māna’ona’o ’ore i tōna pāruru, ’ua haere ti’a atu ’oia i nā taata e piti ra. ’Ua fa’aro’o a’era ’oia i tōna reo i te paraura’a ē : « Nā’u e ’aufau nō te mā’a. ’A tu’u iāna. Vaiiho nā’u e ’aufau nō te mā’a. »
’Ua muhumuhu te Vārua Maita’i iāna ’e ’ua ’ī ’oia i te here ’aita ’oia i putapū a’enei, ’ua nā ’ō mai ’oia : « Te mea noa tā’u i hina’aro e rave, ’o te tauturura’a ïa ’e te fa’aorara’a i taua taure’are’a ra. » Parau a’era tō’u hoa ē, tē ha’amata ra ’oia i te māramarama ia Iesu Mesia ’e tāna tāra’ehara—nāhea ’e nō te aha Iesu Mesia, ma te here ateate ’e te maita’i roa, i fa’atusia ai nā roto i tōna iho hina’aro, nō te riro mai ’ei Fa’aora ’e ’ei Tāra’ehara nōna, ’e nō te aha ’oia i hina’aro ai iāna ’ia nā reira.38
’Aita e māere e hīmene tātou :
Hi’o, tē ’imi nei te Tīa’i māmoe maita’i,
Tē ’imi nei i te mau fanau’a mo’e,
Nō te fa’aho’i ia rātou ma te ’oa’oa,
Ma te fa’aorara’a ho’o fāito ’ore.39
’Ei ’Ārenio a te Atua, ’ua ’ite tō tātou Fa’aora i te taime e tae mai tō tātou mana’o ’ōtahi ’e te ha’aha’a ’e te pāpū ’ore ’e te mata’u. I roto i te ’ōrama, ’ua ’ite Nephi i te mana o te ’Ārenio a te Atua « i te poura’a mai i ni’a iho i te feiā mo’a o te ’Ēkālesia a te ’Ārenio ra, ’e i ni’a iho ho’i i te feiā i mā’itihia e te Fatu ra ». Noa atu ’ua « purara i te mau fenua o te ao ; ’o te parau ti’a ’e te mana o te Atua i te hanahana rahi ra, ’o tā rātou ïa mauha’a ».40
Teie parau fafau nō te tīa’ira’a ’e te tāmāhanahana, tei tō tātou ato’a ïa anotau.
’O ’outou ana’e ānei te melo nō te ’Ēkālesia i roto i tō ’outou ’utuāfare, i te fare ha’api’ira’a, i te vāhi ’ohipa, ’aore rā i roto i te huira’atira ? Tē mana’o ra ānei ’outou e mea na’ina’i tō ’outou ’āma’a, ’e tei te vāhi mo’emo’e ? ’Ua fa’anu’u ānei ’outou i te hō’ē vāhi ’āpī, penei a’e e reo ’e e peu mātau ’ore roa ? Penei a’e ’ua taui tō ’outou orara’a, ’e tē fa’aruru nei ’outou i teienei i te mau mea ’aita ’outou i mana’o ? Tē ha’apāpū mai nei tō tātou Fa’aora, ta’a ’ē noa atu tō tātou vaira’a, ’e ta’a ’ē noa atu ’o vai tātou, mai tā Isaia i parau : « E ha’aputu ’oia i te mau fanau’a ri’i i roto i tāna rima, ’e ’ei roto rātou i tāna ’ōuma ’ia hōpoi ; e arata’i ri’i māite ’oia i te mau maia’a fa’a’ote pinia ra ».41
Te mau taea’e ’e te mau tuahine, tē pi’i nei tō tātou Tīa’i māmoe maita’i ma tōna reo ’e i tōna i’oa. Tē ’imi, tē ha’aputuputu ’e tē haere mai nei ’oia i tōna mau ta’ata. Nā roto i tāna peropheta ora ’e ia tātou tāta’itahi, tē ani nei ’oia i te tā’āto’ara’a ’ia ’ite mai i te hau, te fā, te ora ’e te ’oa’oa i roto i te ’īra’a o tāna ’evanelia i fa’aho’ihia mai ’e i ni’a ato’a i te ’ē’a nō te fafaura’a. Nā roto i te hi’ora’a maita’i, tē ha’api’i nei ’oia i te mau tīa’i māmoe i ’Īserā’ela nei ’ia tāvini nā roto i tōna here.
’Ei ’Ārenio a te Atua, ’ua fa’atōro’a-ātea-hia te misiōni hanahana a Iesu ’e ’ua ’oa’oa te mau ’āpōsetolo e te mau peropheta i te reira. ’Ua riro tāna tāra’ehara hope ’ore ’e te mure ’ore i te pū o te fa’anahora’a nō te ’oa’oa ’e te tumu ho’i nō te hāmanira’a. Tē ha’apāpū nei ’oia ia tātou ē, tei pīha’i iho tātou i tōna māfatu.
Te mau taea’e ’e te mau tuahine, ’e hina’aro tātou ’ia riro ’ei ta’ata « pe’e ha’eha’a noa atu i te Atua ’e te ’Ārenio ho’i »,42 ’e penei a’e ’ia tae i te hō’ē mahana, e pāpa’ihia tō tātou i’oa i roto i te buka ora a te ’Ārenio ra,43 nō te hīmene i te hīmene a te ’Ārenio ra,44 nō te haere mai i te ’amura’a ru’i a te ’Ārenio.45
’Ei Tīa’i māmoe ’e ’ei ’Ārenio, tē pi’i nei ’oia : ’A haere fa’ahou mai « i te ’ite mau ra… [o tō ’outou] Fa’aora… [tō ’outou] Tīa’i māmoe mau ’e te rahi ».46 Tē parau fafau nei ’oia ē i « tōna aroha [e] riro [tātou] ’ei ta’ata maita’i roa i te Mesia ra ».47
I teie pu’e tau Pāsa, tē ’ārue nei tātou iāna :
« E au te ’Ārenio ! »48
« Hosana i te Atua ’e te ’Ārenio ! »49
Tē fa’a’ite pāpū nei au nōna, tō tātou Tīa’i māmoe maita’i roa, te ’Ārenio maita’i roa a te Atua. Tē pi’i nei ’oia ia tātou i tō tātou i’oa, nā roto i tōna i’oa—’oia ho’i te i’oa mo’a ’e te hanahana o Iesu Mesia—’āmene.