Tauasinira’a ta’ata tei tauturuhia nā roto i te mau tauto’ora’a nō te maita’i o te ta’ata
Tē ti’a ra te hō’ē tuati ma’i i Inidonesia i pīha’i iho i te hō’ē metua vahine ’āpī. ’Ua rave te mau tuati ma’i i roto i teie pū fānaura’a i te mau ha’api’ira’a tauturura’a i te mau ’aiū e huti i te aho, tei fa’aterehia e LDS Charities.
Tē ’ata’ata ra te hō’ē taure’are’a i Ghana i te tu’ura’ahia ’oia i roto i te hō’ē pārahira’a tūra’i i pīha’i iho i te hō’ē ti’a ’aravihi nō LDS Charities technician.
’Ua ’āmui te fa’anahora’a a te ’Ēkālesia nō te maita’i o te ta’ata, te LDS Charities, i e 2 885 ’ōpuara’a i roto e 141 fenua i te matahiti i ma’iri, ma te ’āpiti i e 1 900 fa’anahora’a nō te maita’i o te ta’ata. Mai te matahiti 1985, ’ua pūpū te LDS Charities hau i te 2,2 miria tārā marite tauturura’a—mai te moni, te mau tao’a tumu ’e te tahi ato’a mau tao’a i roto e 197 fenua ’e tuha’a fenua, ’ia au i te parau fa’a’ite matahiti a LDS Charities nō te matahiti 2018 tei pūharahia i te 19 nō Fepuare 2019.
Tē ravehia nei te mau tauto’ora’a a te ’Ēkālesia nō te maita’i o te ta’ata nā roto i te aumihi ’e te here nō te mau tamari’i ato’a a te Atua, ma te tūra’i e toru parau tumu arata’i—ha’apa’o i te feiā i roto i te ’ati rahi, fa’auru i te fa’arava’ira’a iāna iho ’e fa’aitoito i te hōro’ara’a i tōna taime ’e te tāvinira’a. ’Ua niuhia teie mau parau tumu i ni’a i te fa’aro’o ia Iesu Mesia, ’e tē hōro’a nei te reira i te mana i te mau ta’ata ’e te mau ’utuāfare ta’a ’ē noa atu tō rātou nūna’a ta’ata, tō rātou fa’aro’o ’e tō rātou ti’ara’a tīvira.
Tē tauturu nei te ’Ēkālesia i te mau hina’aro rū (nā reira ato’a te mau ta’ata e hōro’a i tō rātou taime), te mau matapō, te mau metua vahine ’e tā rātou ’aiū fānau ’āpī, nō te pape mā ’e te tāmāra’a, te mau pātia ārai ma’i, te hāmanira’a i te mau pārahira’a tūra’i ’e te tahi ato’a mau rāve’a nō te huma ’ia haere, nō te fa’afāna’o te ta’ata ia rātou iho i te mā’a ma te tahi mau rāve’a ’e mau mātēria i reira, ’e te hina’aro rū ’e te hina’aro tau maoro o te mau tītīhoria. Tē ’āmui ato’a nei te ’Ēkālesia i roto i te mau ’ōpuara’a ’oire o e 43 tuha’a fenua ’e mau mata’eina’a i te fenua Marite ’e Canada nō te tauturu i te ta’ata fare ’ore, nō te fa’ata’a i te nohora’a ’āpī nō te tītīhoria, ’e tē vai atu ra.
« Tē ’ite nei mātou i te māuruuru rahi ’e te aura’a ’e te mau ta’ata tāta’itahi ato’a tei tauturu mai ’ia manuia i te ’ohipa nō te maita’i o te ta’ata i te matahiti 2018 », te parau ïa a te tuahine Sharon Eubank, peresideni nō te LDS Charities ’e te tauturu mātāmua i roto i te peresidenira’a rahi nō te Sōtaiete Tauturu. Tē nā ’ō nei ’oia ē, e fa’ahōho’ara’a teie parau fa’a’ite nō te maita’i o te mau ta’ata e rave rahi ’ahuru tauasini.