Mau ture ’āpī, mau fa’anahora’a ’āpī, mau mātēria ’āpī

E fa’anu’u te mau tamari’i ’e te feiā ’āpī i te piha ’aore rā te pupu autahu’ara’a nō muri iho ’ei pupu matahiti i te ’āva’e Tēnuare, ’aita fa’ahou i tō rātou mahana fānaura’a.

Parau nō ni’a i te hiero. ’Ua pūhara te Peresidenira’a Mātāmua i te hō’ē parau i te 2 nō Tēnuare 2019, teie te tahi tuha’a nō te reira : « I te roara’a o te mau tenetere, i terā tau ’e terā tau, e mau fa’atanora’a tei ravehia i ni’a i te tahi mau ’ohipa ri’i nō ni’a i te hiero, mai te reo, te huru patura’a, te tūreiara’a ’e te ha’apa’ora’a i te mau parau. ’Ua ha’api’i te mau peropheta ē, e’ita te reira mau huru fa’atanora’a e fa’aea mai te au i te arata’ira’a a te Fatu i tāna mau tāvini. »

Fa’anu’ura’a nō te mau tamari’i ’e te feiā ’āpī. I teienei, e fa’anu’u te mau tamari’i o te Paraimere ’e te feiā ’āpī i te piha ’aore rā te pupu autahu’ara’a nō muri iho ’ei pupu matahiti i te ’āva’e Tēnuare, ’aita fa’ahou i tō rātou iho mahana fānaura’a. Te aura’a ra, e ti’a i te feiā ’āpī ’ia fāri’i i te hō’ē parau fa’ati’a nō te hiero tei tā’ōti’ahia, nō te taime mātāmua, i te ’āva’e Tēnuare o te matahiti e ti’a ai tō rātou 12 matahiti, ’e e ti’a i te feiā ’āpī tamāroa ’ia fa’atōro’ahia i te Autahu’ara’a a Aarona i te ’āva’e Tēnuare o te matahiti e ti’a ai tō rātou 12 matahiti.

Mau rāve’a tāvinira’a rahi atu ā. ’Ua fa’aara te fa’anahora’a LDS Charities i tōna ’āpitira’a i te fa’anahora’a JustServe.org nō te ’ōmua i te ’ōpuara’a #YouCanDoSomething e tītau-manihini-ra’a i te mau ta’ata ’ia tāvini i tō rātou iho vāhi ’e ’ia hōro’a i te ō i te mau ’ōpuara’a maita’i nā te ao nei nō te tauturu i te tauira’a i te ao nei. Nō te ha’amata, ’a haere i ni’a i te ’api « How to Help » i ni’a ia LDSCharities.org.

Mātēria ’āpī nō te tāvinira’a aupurura’a. ’Ua fa’a’āpīhia te tahua natirara Teie te aupurura’a [This Is Ministering] (ministering.ChurchofJesusChrist.org) ’e ’ua tu’uhia te tahi mau parau ve’a ’āpī ’e te mau video ’āpī. E nehenehe te mau mātēria i ni’a i te tahua natirara e tauturu i te feiā e tai’o mai, nō te toro atu i te rima ma te aumihi, nō te fa’atupu i te mau aura’a pāpū a’e, nō te ha’amaita’i i tō rātou ’aravihi ’ia fa’aro’o ’e tē vai atu ra. I roto i teie mau mea ’āpī, tē vai nei te tahi mau parau ve’a nō ni’a i te mau parau tumu nō te aupurura’a tei pūharahia i roto i te mau ve’a Ensign ’e te Liahona, te tahi mau hono i te mau a’ora’a o te ’āmuira’a rahi e paraparau nei nō te aupurura’a, nā reira ato’a te tahi mau video, mau parau fa’ahiti ’e te mau pāpa’ira’a mo’a e nehenehe e ’ōpere atu.

Te tīa’ira’a ’e te rāpa’aura’a nō te mau ta’ata tei ro’ohia i te hāmani-’ino-ra’a. Tē vai nei hō’ē tahua natirara ’āpī a te ’Ēkālesia, abuse.ChurchofJesusChrist.org, ’o tē pūpū nei i te mau mātēria ’e te mau maura’a au nō te ta’ata tei ro’ohia i te hāmani-’ino-ra’a, ’e nō te ta’ata ato’a e hina’aro e ārai i te hāmani-’ino-ra’a. ’Ua pūhara ato’a te Peresidenira’a Mātāmua i te hō’ē rata i te 26 nō Māti 2019 ra, tei fa’aitoito i te feiā fa’atere o te ’Ēkālesia ’ia toro i te rima here ’e te rima tauturu ia rātou tei māuiui i te hāmani-’ino-ra’a. ’Āpiti i te rata, ’ua tu’uhia te hō’ē parau tauturu e fa’a’āpī i te mau arata’ira’a nō ni’a i te huru te mau ’episekōpo ’e te mau peresidenira’a titi e paraparau i te mau ta’ata tei māferahia ’e e rave i te mau uiuira’a ’e te mau melo o te ’Ēkālesia. ’Ua pūhara ato’a te ’Ēkālesia i te hō’ē video « Protect the Child [Pāruru i te tamari’i] », ’e ’ua fa’a’āpī ato’a i te parau ve’a i roto i te Mau tumu parau nō te ’evanelia [Gospel Topics] nō ni’a i te hāmani-’ino-ra’a.

Te mau tuha’a ’e te mau fa’anahora’a rorouira ’āpī. Maoti te tuha’a Tārena tuatāpapara’a [Study Plans] i roto i te pūharara’a ’āpī o te fa’anahora’a Vaira’a buka ’evanelia i noa’a ai ia ’outou ’ia ha’amau i te hō’ē tārena nō te tuatāpapa i te mau mātēria e vai ra i reira. E mauha’a ’āpī te Mau ’ōro’a ineine [Ordonnances prêtes] nō te fa’anahora’a FamilySearch ’o tē fa’a’ōhie i te ’imira’a i’oa nō te hiero, ’ua noa’a atura ia ’outou i te taime rahi a’e nō te tāvini i tō ’outou ’utuāfare ’e nō te ’oa’oa i te mau ha’amaita’ira’a o te hiero. ’E tē vai nei fātata e toru ’ahuru ma ono ’ohipa ’āpī e nehenehe e rave i te fare, mai te « Hāhaere nā te vāhi tā rātou i haere [Walk Where They Walked] », nō te tauturu i te mau feiā ’āpī o te ’utuāfare ’e te ’ā’amu ’utuāfare. Tē vai nei te reira nā roto e 10 reo.

’Aita te mau ha’utira’a ta’ata ora rahi roa ’ino e fa’aitoitohia ra. E mea au te mau ’ōro’a ha’amana’ora’a i te hīro’a tumu ’e te ’ā’amu i te mau vāhi, ’āre’a rā, ’aita te ’Ēkālesia e fa’aitoito nei i te mau ’ōro’a ha’amana’ora’a rarahi mai te mau ha’utira’a ta’ata ora rahi roa ’ino. E tāmau noa e toru ha’utira’a ta’ata ora rahi : te Nauvoo Pageant i Illinois (Marite), nā te pū fa’atere o te ’Ēkālesia e turu atu ; te Mesa Pageant i Arizona (Marite), tei raro a’e i te feiā fa’atere o te ārea ; ’e te British Pageant, tei raro a’e i te feiā fa’atere o te ārea, e fa’atupuhia i te maha matahiti ato’a. ’Ua fa’a’ore ato’a te ’Ēkālesia i te mau ’ōro’a ’orira’a a te feiā fa’atere nā mua a’e i te ha’amo’ara’a o te hō’ē hiero, e monohia te reira e te hō’ē purera’a e te feiā fa’atere o te ’Ēkālesia e tere mai.