Elder Alan R. Walker

Hitu ’Ahuru Hui mana fa’atere rahi

’Ua riro te ha’api’ira’a ’e te pārahira’a i roto i te mau ta’ere ’āpī ’ei ’ohipa au nā Elder Alan R. Walker, ’o tē tauturu maita’i iāna i roto i tōna pi’ira’a ’ei Hitu ’Ahuru Huimana fa’atere rahi.

’Ua fānauhia ’oia i Buenos Aires (Rāparata), nā Victor Adrian Walker ’e Cristina Ofelia Sparrow Walker i te 2 nō Tēnuare 1971, ’ua pa’ari Alan Roy Walker i roto i te mau tuha’a rau i Amerika ’Apato’a ’e ’Apato’erau.

I tōna ’āpīra’a, ’ua ora ’oia i Rāparata hou ’a fa’anu’u ai tōna ’utuāfare i Boston (Massachusetts, Marite), ’e i muri iho i Mexico City (Mehiko), nō te ’ohipa a tōna metua tāne.

« ’Ua riro te ha’api’ira’a i te reo peretāne ’ei ha’amaita’ira’a rahi roa », ’ua parau ’oia. ’E maoti tōna pa’arira’a i roto i te ’evanelia i rahi ai tōna ’itera’a pāpū ’e i fa’aineine ai ’oia i tōna ’āpīra’a nō te hō’ē misiōni. ’Ua haere Elder Walker i Brigham Young University hō’ē matahiti, i muri iho ’ua tāvini ’oia ’ei misiōnare rave tāmau i roto i te misiōni nō Tennessee Nashville.

Nō te tauturu i te rāpa’aura’a i tōna metua tāne i muri iho i te hō’ē ’ati rahi, ’ua fa’ataime Elder Walker i tāna mau ’ōpuara’a e ho’i i te ha’api’ira’a i muri iho i tāna misiōni, ’e ’ua ho’i atu ra i Rāparata. I reira tōna fārereira’a ia Ines Marcela Sulé i te hō’ē ’orira’a nō te institut. Va’u ’āva’e i muri mai, i te 12 nō ’Ātete 1993, ’ua fa’aipoipohia rāua i roto i te hiero nō Buenos Aires (Rāparata). Te mahana nō muri iho, ’ua fa’anu’u nā ta’ata fa’aipoipo i Provo (Utah, Marite), i reira Elder Walker te fa’aotira’a i tāna parau tū’ite Licence i te pae nō te fa’arava’ira’a faufa’a i te matahiti 1996.

’Ua ’ohipa Elder Walker e toru matahiti ’ei ha’apa’o moni taiete nō Citibank, e ono matahiti ’ei ta’ata hi’opo’a nō te ’Ēkālesia i te ārea nō Amerika Apato’a, te tuha’a apato’a, e 11 matahiti i te ārea nō Mehiko, ’e ’aita i maoro a’enei ’ei ti’a fa’atere nō te mau ’ohipa pae faufa’a nō Amerika Apato’a, te tuha’a apato’a. I te matahiti 2010, ’ua pi’ihia Elder Walker nō te peresideni i te misiōni nō Mehiko i Monterrey East.

E mea au nā Walker mā ’e tā rāua tamāhine ’ia tāvini i te ta’ata, ’ia rātere ’e ’ia hi’o i te mau vāhi ’āpī ’e te mau ta’ata ’āpī.

Hou tōna pi’ira’a ’ei Hitu ’Ahuru Huimana fa’atere rahi, ’ua tāvini Elder Walker i ni’a i te mau pi’ira’a rau o te ’Ēkālesia, ’ei Hitu ’Ahuru ārea, ’ei tauturu i roto i te hō’ē peresidenira’a titi, ’ei melo ’āpo’ora’a teitei, ’ei ’episekōpo, ’ei tauturu i roto i te ’episekōpora’a ’e ’ei ta’ata fa’atere ’ohipa misiōnare nō te pāroita.