Elder James R. Rasband

Hitu ’Ahuru Hui mana fa’atere rahi

I te pi’ira’ahia Elder James R. Rasband i roto i te hō’ē peresidenira’a titi e rave rahi matahiti i ma’iri, ’ua tae mai te mana’o ineine ’ore. « ’Ua hape paha rātou », ’ua mana’o ’oia.

’Ua tū’ati te reira mana’o ineine ’ore i tōna mana’o i te 19ra’a o te matahiti, i te tomora’a ’oia i te pū ha’api’ipi’ira’a misiōnare nō Provo, nō te fa’aineine iāna nō tāna misiōni rave tāmau i Seoul (Korea ’Apato’a). « E nāhea pa’i au e rave i te reira ? », ’ua uiui tōna mana’o.

I nā taime to’opiti, ’ua tae mai teie pāhonora’a : « ’A fa’aea i reira. E tae mai te ’oa’oa. » ’Aore rā, nā roto i te parau a tōna metua vahine : « ’Aita i pu’e noa te mau ta’ata fāito maita’i nā te Fatu. ’A rave noa i te ’ohipa. »

Tē ’ite nei Elder Rasband i taua taiā ra i teienei ’a feruri ai ’oia i tāna pi’ira’a ’āpī ’ei Hitu ’Ahuru Huimana fa’atere rahi, ’ua ’ite rā ’oia i te pāhonora’a : « ’Ua hina’aro noa te Metua i te Ao ra ’ia haere tātou e ’ohipa ’e ’ia hōro’a i te poro’i fa’aora ’e te ’oa’oa a tāna Tamaiti ’e a te tusia tāra’ehara a tāna Tamaiti. »

’Ua fānauhia James Richard Rasband i Seattle (Washington, Marite), nā James E. ’e Ester Rasband i te 20 nō Māti 1963. ’Ua pa’ari ’oia i Pebble Beach (California, Marite), i roto i te hō’ē fare e 200 ti’ahapa metera i te pae tātahi.

’Ua mātau Elder Rasband ia Mary Diane Williams i tōna matahiti mātāmua i Brigham Young University. ’Ua pāpa’i rāua ia rāua ’a haere ai ’oia e pae ’āva’e i ’Īserā’ela nō te ha’api’ira’a ’e i muri iho, ’a tāvini ai ’oia i te misiōni nō Korea i Seoul. ’Ua fa’aipoipohia rāua i roto i te hiero nō Los Angeles (California) i te 11 nō ’Ātete 1984. E maha tamari’i tā rāua.

I te otira’a tāna misiōni, ’ua noa’a mai tāna parau tū’ite Licence i te pae nō te reo peretāne ’e te ’ohipa tuatāpapara’a i te parau nō te mau fenua Piri Hiti’a o te rā i BYU i te matahiti 1986 ’e i muri iho e parau tū’ite i te pae nō te ture i te fare ha’api’ira’a nō Harvard Law i te matahiti 1989. E pae matahiti ’oia i te ’ohipara’a i roto i te ture i Seattle, ’ua ho’i atu ra i BYU i te matahiti 1995 nō te ’āmui i te tuha’a ha’api’ira’a a te J. Reuben Clark Law. ’Ua tāvini ’oia ’ei mātua nō te fare ha’api’ira’a ture mai te matahiti 2009 i te matahiti 2016, i terā taime ’ua riro mai ’oia ’ei peresideni mono nō BYU.

’Ua tāvini Elder Rasband ’ei Hitu ’Ahuru ārea, ’ei peresideni titi, ’ei tauturu i roto i te peresidenira’a titi, ’ei melo ’āpo’ora’a teitei, ’ei ’episekōpo, ’e ’ei peresideni Feiā ’Āpī Tamāroa nō te pāroita.