E tāpa’o te ha’amo’ara’a nō te « ananahi ’aita i ’itehia a’enei »

« E ananahi ’aita i ’itehia a’enei ’e te fāito ’ore e hiti mai ra nō te ’Ēkālesia », ’ua parau te peresideni Russell M. Nelson i te ha’amo’ara’a o te hiero nō Roma (’Ītāria) i te ’āva’e Māti ra nō 2019. « Tē patu ri’i noa nei tātou nō te mea e haere mai ra. »

I te ha’amo’ara’a, ’ua putuputu ’āmui mai nō te taime mātāmua te mau melo ato’a nō te Peresidenira’a Mātāmua ’e nō te pupu nō te Tino ’Ahuru Ma Piti ’āpōsetolo, i te hō’ē vāhi i rāpae i te fenua Marite. « ’Ei mau ’āpōsetolo nā Iesu Mesia i teie ’anotau », tē parau ra te peresideni Nelson, « te poro’i tā mātou i teie mahana ’o te hō’ē ā poro’i ïa i fa’a’itehia e te mau ’āpōsetolo i mūta’a ihora—’oia ho’i, tē ora nei te Atua ’e ’o Iesu te Mesia ».

Ta’a ’ē noa atu te ha’amo’ara’a hiero, ’ua paraparau te peresideni Nelson i te feiā ’āpī nō te mata’eina’a o te hiero ’e ’ua fārerei i te Pāpa François, te taime mātāmua ’ua fāri’ihia te hō’ē Peresideni nō te ’Ēkālesia ’e te upo’o o te ’Ēkālesia Katolika nō Roma.

Tai’o i te mau parau nō ni’a i te hiero nō Roma (’Ītāria) ’e e māta’ita’i i te mau hōho’a nō Roma i ni’a ia ChurchofJesusChrist.org/prophets-and-apostles.